وڭتۇستىك قازاقستان وبلىسىنىڭ اكىمى جانسەيىت تۇيمەباەۆ شىمكەنتتەگى قۇرىلىسى ءجۇرىپ جاتقان مەديتسينالىق نىسانداردى ارالاپ، ساپاسىن قاداعالادى.

ەڭ الدىمەن، وبلىس باسشىسى شىمكەنت قالالىق مەديتسينالىق جەدەل جاردەم كورسەتۋ اۋرۋحاناسىنىڭ جاڭادان قۇرىلىسى ءجۇرىپ جاتقان «ۆ» كورپۋسىنىڭ جۇمىسىمەن تانىستى. ونداعى قابىلداۋ ءبولىمى، وتا جاساۋ بلوگى، جانساقتاۋ ءبولىمى مەن گالەرەيانىڭ جاپسارلاس قۇرىلىسىنىڭ ساپاسىن قاداعالاعان ايماق باسشىسى مەديتسينالىق نىساننىڭ زامان تالابىنا ساي جۇزەگە اسىرىلۋ قاجەتتىگىن ەسكەرتتى.

جوبا قۋاتتىلىعى 21 وپەراتسيالىق بولمە مەن ستاتسيونارلى 27 ورىندى قامتىعان عيمارات قۇرىلىسىنىڭ اياقتالۋى كەلەر جىلعا وتپەلى بولىپ وتىر.

شىمكەنت قالالىق جەدەل جاردەم مەديتسينالىق اۋرۋحاناسى كوپسالالى ستاتسيونارلىق قىزمەتتىك مەكەمە بولىپ تابىلادى. تاۋلىك بويى جۇمىس ىستەيتىن مامانداندىرىلعان اۋرۋحانا حيرۋرگيالىق، تراۆماتولوگيالىق، ۋرولوگيالىق، نەيروحيرۋرگيالىق، گينەكولوگيالىق، نەۆرولوگيالىق جانە تەراپيالىق بەيىندە وبلىس تۇرعىندارىنا شۇعىل جانە جوسپارلى مەديتسينالىق كومەك كورسەتەدى.

قازىرگى ۋاقىتتا قالالىق جەدەل مەديتسينالىق كومەك كورسەتۋ اۋرۋحاناسى 425 ورىنعا شاقتالعان بولسا، ونىڭ 317-ءسى حيرۋرگيالىق ناۋقاستارعا، 108-ءى تەراپيالىق بولىمنەن تۇرادى. كلينيكادا جالپى سانى 1 مىڭعا جۋىق قىزمەتكەر جۇمىس اتقارادى. مۇنداعى  دياگنوستيكالىق جانە تاكتيكالىق سۇراقتاردى شەشۋگە مۇمكىندىك بەرەتىن قۇرال-جابدىقتار زامان تالابىنا ساي جابدىقتالعان.

مۇنان سوڭ، جۇمىسشى توپ وبلىستىق ونكولوگيالىق ديسپانسەرگە جاپسارلاس 75 ورىندىق پالاتالىق كورپۋستىڭ قۇرىلىسىن ارالاپ كوردى. تاپسىرىسشىسى وبلىستىق قۇرىلىس باسقارماسى بولىپ تابىلاتىن عيماراتتىڭ قۇرىلىسىن «تۇر-احمەت ي كومپانيا» جشس مەردىگەر مەكەمەسى جۇرگىزۋدە. وتكەن جىلدىڭ شىلدە ايىندا باستالعان قۇرىلىس جۇمىستارى 2017 جىلدىڭ تامىز ايىندا اياقتالادى دەپ كۇتىلۋدە.

وبلىستىق ونكولوگيالىق ديسپانسەردىڭ باس دارىگەرى وڭىردە بۇگىندە 12 مىڭنان استام ادام قاتەرلى ىسىك دەرتىمەن ەسەپتە تۇرعانىن، ال جىل سايىن  3 مىڭنان استام ازامات ونكولوگيالىق اۋرۋلارعا شالدىعاتىنى انىقتالاتىنىن ايتتى.

جوعارىدا اتالعان مالىمەتتەردى تىڭداعان ءوڭىر باسشىسى قاتەرلى ىسىك اۋرۋىن ەمدەۋدە فرانتسيا مەن بەلگيادان   ماماندار الىپ كەلىپ، ولاردىڭ ەمدەۋ تاسىلدەرىن قولدانىپ، تاجىريبيە الماسۋ ءۇشىن جۇمىستار جۇرگىزىلەتىنىن اتاپ ءوتتى.

ايتا كەتەيىك، وبلىستىق ونكولوگيالىق ديسپانسەردە ءتۇرلى ونكولوگيالىق اۋرۋلارمەن 230-دان استام ناۋقاس ەمدەلۋدە. بۇگىنگى تاڭدا، ونداعى ءار پالاتادا 6-7 ادامنان ورنالاسسا، جاڭا جاپسارلاس قۇرىلىس عيماراتى بىتكەن سوڭ ەمدەلۋشىلەرگە دەگەن پالاتا سانى ارتادى دەپ جوسپارلانۋدا.

Abai.kz