بۇگىن، ياعني 15 قاراشادا  بەيبىتشىلىك جانە كەلىسىم سارايىندا قر ۇلتتىق بانكى «قازاقستان تاۋەلسىزدىگىنە 25 جىل: ۇلتتىق ۆاليۋتا» اتتى كونفەرەنتسيا ۇيىمداستىردى.

كونفەرەنتسياعا قاتىسۋشىلارعا ارناپ قر مەملەكەتتىك حاتشىسى گۇلشارا ابدىقالىقوۆا قۇتتىقتاۋ ءسوز سويلەدى.

ءوز سوزىندە مەملەكەتتىك حاتشى كونفەرەنتسيا ەل تاۋەلسىزدىگىنىڭ 25 جىلدىعىنىڭ سالتاناتتى بەلەسى قارساڭىندا ءوتىپ وتىرعانىن اتاپ كورسەتتى.

«مەملەكەت باسشىسىنىڭ سىندارلى كوشباسشىلىعىنىڭ ارقاسىندا قازاقستان تۇتاستاي داۋىرمەن تەڭەسەتىن جولدان ءوتتى. جارقىن جەتىستىكتەر مەن  تولاعاي تابىستاردىڭ 25 جىلى – ەلباسىنىڭ كورەگەن جانە سارابدال ساياساتىنىڭ سالتاناتىنا اينالدى»، – دەدى گ.ابدىقالىقوۆا.  

مەملەكەتتىك حاتشى «ەلباسى نۇرسۇلتان نازارباەۆتىڭ جالپىۇلتتىق بىرلىك پەن قوعامدىق كەلىسىمنىڭ بىرەگەي ۇلگىسى قازاقستاننىڭ جارقىن جەتىستىكتەرىنىڭ شەشۋشى فاكتورىنا اينالعانىن، قازاقستان حالقى اسسامبلەياسى ونىڭ باستى ۇيىتقىسى بولعانىن» ايتتى.

مەملەكەتتىك حاتشى كونفەرەنتسياعا قاتىسۋشىلاردى كاسىبي مەرەكە – ۇلتتىق ۆاليۋتا كۇنىمەن قۇتتىقتاپ، مەملەكەت باسشىسىنىڭ 1993 جىلى ءتول تەڭگەمىزدى ەنگىزۋ تۋرالى تاريحي شەشىمى كورەگەن، ءارى تاعدىرشەشتى قادام بولعانىن اتاپ ءوتتى.

ءىس-شارا بارىسىندا قر ۇلتتىق بانكىنىڭ توراعاسى دانيار اقىشەۆ تاۋەلسىزدىكتىڭ 25 جىلدىعىنا ارنالعان 10 مىڭدىق سۋۆەنيرلىك بانكنوتتى جانە مونەتانى تانىستىردى. باسقوسۋدا سونداي-اق، وزگە دە مەملەكەت جانە قوعام قايراتكەرلەرى، عالىمدار مەن ەكونوميستەر ءسوز سويلەدى.

اباي-اقپارات

___________________