جامانقۇلوۆ جىمقىرعان قارجىسىنىڭ 5,3 ملن تەڭگەسىن قايتارىپ بەردى
الماتى قالاسىنداعى №2 مەدەۋ اۋداندىق سوتىندا «فەنيكس» كينوفيلمىن تۇسىرۋگە بولىنگەن قارجىنى جىمقىرۋ فاكتىسى بويىنشا «ش. ايمانوۆ اتىنداعى «قازاقفيلم» اق-نىڭ لاۋازىمدى تۇلعالارىنا جانە «ت.ك. Turan Universal Business» جشس-ءنىڭ قىزمەتكەرلەرىنە قاتىستى سوت وتىرىسى جالعاسۋدا، دەپ حابارلايدى Baq.kz ءتىلشىسى.
سوتتا زارداپ شەككەن تاراپ – مادەنيەت جانە سپورت مينيسترلىگىنىڭ قىزمەتكەرى سەرىك ەستياروۆتان جاۋاپ الىندى. ول تاعىلعان ايىپتاردى تولىعىمەن قولدادى. ايتارلىعى، زارداپ شەككەن تاراپ جان-جاقتى جانە وبەكتيۆتى تەرگەۋ ناتيجەسىندە اقشا جىمقىرۋ فاكتىلەرى تولىقتاي راستالعانىن اتاپ ايتتى.
تەرگەۋ بارىسىندا «قازاقفيلم» اق ءفيلمدى تۇسىرۋگە الدىن الا دايىندىق جۇمىستارىن جۇرگىزۋگە «ت.ك. Turan Universal Business» جشس-نە 79 ملن تەڭگە اۋدارعانى انىقتالدى. سونىڭ ىشىندە 69 ملن تەڭگەنى اتالعان كومپانيا ارقىلى كارتينانىڭ باس ديرەكتورى تۇڭعىشباي جامانقۇلوۆ جىمقىرعانى دالەلدەندى. ناقتىراق ايتقاندا، ۇرلانعان قاراجات قوسالقى مەردىگەرلىك ۇيىمداردىڭ كومەگىمەن قولما-قول اقشا تۇرىندە ت. جامانقۇلوۆقا جەتكىزىلىپ وتىرعان.
سەرىك ەستياروۆتىڭ ايتۋىنشا، بۇگىنگە دەيىن تۇڭعىشباي جامانقۇلوۆ 69 ملن تەڭگەنىڭ 5,3 ملن. تەڭگەسىن مەملەكەت ەسەبىنە قايتاردى.
اباي اقپارات
