اقشاڭىزدى ۇنەمدەۋگە كومەكتەسىپ، ەلەكتر قۋاتىنا از شىعىندالۋعا مۇمكىندىك بەرەتىن تاسىلدەر كوپ. ونى ءبىرىمىز بىلسەك، ءبىرىمىز بىلە بەرمەيمىز. مۇنداي قۋلىقتاردىڭ كەيبىرى قوسىمشا شىعىن قاجەت ەتۋى مۇمكىن. مىسالى، تەرەزەلەردى جىلىلاۋ. بۇل رەتتە بىراقاتار ادام ەنەرگەتيكالىق ءتيىمدى تۇرمىس تەحنيكالارىن الۋدى ءجون كورەدى. بىراق ەڭ ءتيىمدى ءارى ۇتىمدى امال رەتىندە ەلەكتر قۋاتىن ۇنەمدەپ، قالتاڭىزدان ارتىق شىعىن شىعارمايتىندارىن اتاي الامىز. سونىمەن قاتار تابيعات رەسۋرستارىن ۇنەمدەۋ ارقىلى كۇللى ادامعا ورتاق عالامشارىمىزدى قورعاۋعا اتسالىساسىز. ياعني جەردىڭ، اۋانىڭ لاستانۋىنا، قىشقىلدى جاڭبىردىڭ پايدا بولۋىنا ىقپالىڭىز ازايىپ، پارنيكتىك ەففەكتىنى جەڭىلدەتەسىز. تومەندە اتالعان ادىستەردى قولدانىپ كورسەڭىز، اقشاڭىزدىڭ ۇنەمدەلۋىنە عانا ەمەس، قورشاعان ورتاعا دا تيگىزەر پايداسىن بايقايسىز. باستىسى، وتە ءتيىمدى ءارى تەگىن.

كىر جۋ جانە كەپتىرۋ

كىر كيىمدى سۋىق سۋدا جۋىڭىز. بالكىم، كىرجۋعىش ماشينا باراباندى اينالدىرۋ ءۇشىن، ەلەكتر قۋاتىن كوپ تۇتىنادى دەپ ويلايتىن شىعارسىز. ال شىندىعىندا كىرجۋعىش ماشينا جۇمسايتىن ەلەكتر قۋاتىنىڭ شامامەن 90 پايىزى سۋدى ىسىتۋعا كەتەدى. ەگەر كىردى سالقىن سۋمەن جۋاتىن رەجيمىن تاڭداساڭىز، ءبىراز اقشا ۇنەمدەي الاسىز. جىلى سۋ كيىمدەگى داقتى كەتىرۋدە ءتيىمدى. بىراق ساپالى ۇنتاق تاڭداساڭىز، كىر كيىمدى تازارتۋعا سۋىق سۋ دا ءتيىمدى. سونىمەن قاتار كيىم كەپتىرگىش ماشينانى دا قولدانۋدىڭ قاجەتى جوق. كۇن جىلى بولسا، جۋىلعان كيىمدى دالاعا جايىڭىز. بۇل كەڭەسكە قۇلاق اسساڭىز، تاعى دا ءبىراز اقشاڭىز قالتاڭىزدا قالادى ءارى كيىمىڭىز جۇپار اڭقيتىن بولادى. كيىمدى ۇيدە كەپتىرۋدىڭ دە ءوز تيىمدىلىگى بار. وعان قوسا كيىمىڭىزگە كۇتە بىلگەنىڭىز ءجون. ەگەر كيىمدى كىر جايعىشتان نەمەسە ەلەكترلى كەپتىرگىشتەن ءسال دىمقىل كۇيىندە الساڭىز، ۇتىكتەگەن كەزدە كوپ قينالمايسىز. ال ەلەكترلى كىر كەپتىرگىشتەن باس تارتقىڭىز كەلمەسە، ىلعالدىلىق تەتىگى بار ءتۇرىن تاڭداعانىڭىز ابزال. مۇنداي ماشيناعا كىر كەپتىرۋ ءۇشىن كوپ ۋاقىت قاجەت ەمەس.

كومپيۋتەردى ءوشىرىپ ءجۇرىڭىز

كومپيۋتەردى قولدانباعان ۋاقىتتا قوسىلعان كۇيىندە قالدىرماڭىز. كومپيۋتەر مەن مونيتورىن ءوشىرىپ جۇرسەڭىز، ءبىراز اقشاڭىزدى ۇنەمدەي الاسىز. سونىمەن قاتار ەلەكتر قۋاتىن 80 پايىزعا از جۇمسايسىز. ءوز كەزەگىندە ول اتموسفەراعا شىعارىلاتىن ءيىس گازىنىڭ كولەمىن بىرنەشە كيلوگراممعا ازايتۋىڭىزعا مۇمكىندىك بەرەدى.

ءۇيدى جىلىتۋ جانە سالقىنداتۋ

ەگەر ۇيىڭىزدە تەرموستات بولسا، قىز مەزگىلىندە تەمپەراتۋراسىن تومەندەتىپ قويىڭىز. ال جازدا سالقىنداتاتىن قىزمەتىن ءجيى قوسپاڭىز. ۇيىقتاپ جاتقانىڭىزدا نەمەسە ۇيدە بولماعان ۋاقىتىڭىزدا جىلۋدى ءسوندىرىڭىز. مۇنىڭ ءبارى ءۇيدى جىلىتۋعا جۇمسالاتىن شىعىندى ازايتۋىڭىزعا كومەكتەسەدى. جازدا ءۇيىڭىز تىم سالقىن بولعاندىقتان، جىلى كيىم ىزدەۋدىڭ ورنىنا، كونديتسيونەردى ءوشىرىپ قويعانىڭىز ءجون ەمەس پە؟ ال ۇيىڭىزگە كامين ورناتساڭىز، ونىڭ بولمەدەن جىلۋدى تارتىپ، مۇرجاعا جىبەرەتىنىن بىلگەيسىز. سوندىقتان ءۇيىڭىزدى جىلىتۋعا قانشا كۇش سالعانىڭىزبەن، جىلۋ مۇرجا ارقىلى شىعىپ كەتەتىن بولادى. ياعني اقشاڭىزدىڭ بوسقا اۋاعا ۇشقانى. بۇل رەتتە جابىق جۇيەلى، گازبەن جاعىلاتىن ءتۇرىن تاڭداعانىڭىز ءلازىم. ول – الدەقايدا ءتيىمدى ءارى ۇنەمدى.

جەلدەتكىش، كونديتسيونەر جانە پەردەنى دۇرىس قولدانا ءبىلىڭىز

پەردە مەن تەرەزە – ۇيدەگى تەمپەراتۋرانى قاداعالۋعا مۇمكىندىك بەرەتىن زاتتار. كوپتەگەن ادام ۇيگە جايلىلىق ورناتاتىن ادىستەردىڭ اتالعان ءداستۇرلى تۇرلەرىن ەستەن شىعارىپ جاتادى. پەردە ۇيگە كۇن كوزىن تۇسىرمەيدى. ال تۇندە اۋا تەمپەراتۋراسى سالقىنداعاندا، كونديتسيونەردى ءوشىرىپ، تەرەزەنى اشىپ قويىڭىز. ەگەر جەلدەتكىشتى دۇرىس قويا بىلسەڭىز، كونديتسيونەردى الماستىرا الادى جانە اسەرى ودان ەش كەم تۇسپەيدى. دەسە دە كونديتسيونەردەن باس تارتقىڭىز كەلمەسە، بارىنشا تيىمدىلىگىن ارتتىرعانىڭىز ءجون. ونى ءجيى قولدانساڭىز، ءار اپتا سايىن سۇزگىشىن تازالاپ تۇرىڭىز.

ىستىق سۋدى از پايدالانىڭىز

ەگەر ۇيىڭىزدە بويلەر بولسا، سۋ جىلىتۋ قىزمەتىن ەڭ تومەنگى دەڭگەيدە ۇستاڭىز. ونىڭ ءوزى قاجەتتىلىكتەرىڭىز ءۇشىن جەتىپ جاتىر. ەگەر بويلەر جىلى بولسا، وقشاۋلاعىش ماتەريالمەن نەمەسە جىلى كورپەمەن وراپ قويىڭىز. وسىلايشا ىشىندەگى سۋدىڭ جىلىلىعىن سىرتقى تەمپەراتۋرانىڭ اسەرىنەن قورعاي الاسىز. قۇبىرداعى سۋ جىلۋ ۇستاپ تۇرۋى ءۇشىن دە ونى وقشاۋلاعىشپەن وراپ قويۋىڭىزعا بولادى.

پليتانى قولدانۋ ەرەجەسى

پليتانى قوسار الدىندا ءۇش قايتارا ويلانىڭىز. بىلە بىلسەڭىز، تاماقتى ميكروتولقىندى پەشتە جىلىتۋ ارقىلى، پليتا تۇتىناتىن ەلەكتر قۋاتىن 5 ەسەگە ۇنەمدەي الاسىز. قىستا پليتادان بولىنگەن جىلۋ پايدالى بولار، بىراق جازدا ۇيىڭىزدەگى كونديتسيونەردىڭ جۇمىسىنا كۇش ءتۇسىرۋى مۇمكىن. پليتاعا تاعام دايىندايتىن كەزدە، دۇرىس ىدىس قولدانىڭىز – تابانىڭ كولەمى تەمىرپەش قاقپاعىمەن بىردەي بولۋى ءتيىس. ناتيجەسىندە ەلەكتر قۋاتى از جۇمسالادى. سونىمەن قاتار تاعامدى سۋعا پىسىرگەننەن بۇرىن، بۋعا دايىنداعانىڭىز ءجون. جانە ىدىستىڭ قاقپاعىن جابىق قالدىرىڭىز. سوندا تاعامىڭىز جىلدام ازىرلەنەدى. ەلەكترلى پليتا ساتىپ الار كەزدە، نۇسقاۋلىعىمەن تانىسىڭىز. وندا پليتانىڭ ەنەرگيا تۇتىنۋ دەڭگەيى كورسەتىلۋى ءتيىس. بۇل ەلەكتر قۋاتىن قانشالىقتى كوپ جۇمسايتىنىڭىزدى باعامداۋعا مۇمكىندىك بەرەدى.

مۋلتيۆاركانى قولدانىڭىز

ەگەر تاعامدى مۋلتيۆاركادا دايىنداساڭىز، ەلەكتر قۋاتىن ۇنەمدەۋىڭىز الدەقايدا ءتيىمدى بولماق. كادىمگى پليتامەن سالىستىرعاندا، مۋلتيۆاركا ەلەكتر قۋاتىن از تۇتىنادى.

توڭازىتقىشتى تازا ۇستاڭىز

توڭازىتقىشتى تۇراقتى تۇردە تازالاپ وتىرساڭىز، موتورىنىڭ جۇمىسى جەڭىلدەيدى. وسىلايشا ەلەكتر قۋاتىن ۇنەمدەپ قانا قويماي، توڭازىتقىشىڭىزدىڭ ءومىرىن ۇزارتاسىز.

تەرەزەلەردى جىلىلاڭىز

بارىنشا جىلىلانعان ءۇي – جىلى ءارى جايلى ءۇي. جىلىلاۋ – ءوزىڭىزدى جانە ءۇيىڭىزدى سۋىقتان قورعاۋدىڭ ەڭ جاقسى ءادىسى. پورولون قيىقتارى تەرەزەدەگى ساڭىلاۋلاردىڭ بارلىعىن بىتەۋگە مۇمكىندىك بەرەدى. ول ءۇيىڭىزدى جىلىتۋعا جۇمسالار شىعىندى 30 پايىزعا ازايتادى. سونىمەن قاتار قورعانىس قاباتى بار تەرەزە ورناتۋىڭىزعا نەمەسە ونى تەرەزەگە ءوزىڭىز جاپسىرىپ الۋىڭىزعا بولادى. مۇنىڭ بارلىعى ءۇيىڭىزدى جىلىتۋداعى شىعىنىڭىزدى تومەندەتەدى.

فلۋورەستسەنتتى شامداردى پايدالانىڭىز

مۇمكىن ءسىز شاعىن فلۋورەستسەنتتى شامدى ەشقاشان قولدانىپ كورمەگەن بولارسىز. ولاي بولسا، بايقاپ كورىڭىز! ءبىر عانا شامنىڭ ءوزى بىرنەشە مىڭ تەڭگەنىڭىزدى ۇنەمدەي الادى. وعان قوسا مۇنداي شام كادىمگى قىزۋ شامىنا قاراعاندا الدەقايدا ۇزاق قىزمەت ەتەدى. ال كەپىلدىك تالونىن ساقتاپ قويساڭىز، ساتىپ العان فلۋورەستسەنتتى شامىڭىز ۋاقىتىنان بۇرىن ىستەن شىققان جاعدايدا كوپ كومەگى تيەدى. ناتيجەسىندە ءۇيىڭىزدىڭ جارىعىن قاۋىپسىز ءارى ۇنەمدى ەتە الاسىز.

ءمولدىر ءبايبورى

Abai.kz