مەن قازۇۋ (كازگۋ) وقۋعا تۇسكەنىمدە گرۋپپامدا ءبىراز باتىستىڭ قىز-جىگىتتەرى بار ەدى. 1 كۋرستا وقىپ جۇرگەنىمدە ناۋرىزدىڭ 14-كۇنى باتىستىق دوستارىم جاپپاي ء"بىر جاسىڭمەن" دەپ قۇتتىقتاپ جاتىر.

نە بولىپ جاتقانىن تۇسىنبەي، ىشىمنەن اڭ-تاڭ بولىپ، "بۇگىن تۋعان كۇنىم ەمەس سياقتى ەدى" دەپ قويامىن. سويتسەم بۇل "كورىسۋ" دەگەن مەرەكە ەكەن.

ءبىرىنشى رەت ەستىگەندىكتەن مەن ءۇشىن بۇل مەيرام تاڭسىق بولدى. ءۇڭىلىپ قاراسام نيەتى وتە جاقسى مەيرام. ءبىر جاسىڭمەن دەگەنى، قىستان امان-ەسەن شىعىپ، تاعى ءبىر جىلعا امان كەلۋىڭمەن دەگەنى عوي. قازاقتار كوشپەلى كۇن كەشكەندىكتەن، قىستا اۋىل ايماقتىڭ ءبىر-بىرىمەن قاتىناسۋى ءۇزىلىپ قالاتىن. سوندىقتان كوكتەمدە التى اي قىستا كورمەگەن كورشى اۋىلعا "مال-جان امان با، جۇتتان، شاپقىنشىلىقتان امان شىقتىڭ با؟" دەپ كورىسەتىن بولعان. قاراپ تۇرساق كوشپەندىلىك تۋىنداتقان مەرەكە عوي.

بىراق بۇل مەيرامدى جەكە دارا ەمەس، ناۋرىزدىڭ باستاماسى دەپ قاراعان ءجون سياقتى. ناۋرىزعا عانا ءتان "سەلت ەتكىزەر", "تۇلىك جىرى" سياقتى جورالعىلاردىڭ ءبىرى بولۋى مۇمكىن. ويتكەنى شاكارىم بابامىزدىڭ ەڭبەكتەرىندە "قازاقتار ناۋرىزدى اپتالاپ، ايلاپ تويلاعان جانە ونى 13-14 باستاعان" دەگەن سىندى دەرەكتەر بار ەمەس پە؟. ياعني ناۋرىز "كورىسۋ كۇنىنەن" باستالعان بولىپ تۇر عوي.

اتالمىش مەيرامدى كۇللى قازاقستاننىڭ بارلىق ايماعىندا جاڭعىرتۋ كەرەك. ءار ايماقتا ءار ءتۇرلى مەرەكەنىڭ ساقتالىپ قالۋى وتارلىق ساياساتتىڭ سالدارى. بارلىعىن بىرىكتىرىپ، وشكەندى جاعاتىن ءسات تۋدى.

اسحات قاسەنعالي

Facebook-تەگى پاراقشاسىنان