وسىدان ءبىراز بۇرىن «اbai.kz» سايتىندا قاينار كەمەلبەكۇلىنىڭ «قادىرالينانىڭ پرەزيدەنت قول قويعان زاڭدى بۇرمالاۋعا حاقىسى بار ما، مىرزاحمەتوۆ مىرزا؟!» (http://abai.kz/post/view?id=12850 ) دەگەن ماقالاسىمەن بىرگە  اقمولا وبلىستىق جەر قاتىناستارى باسقارماسىنىڭ باسشىسى الماگۇل قادىرالينا حانىمنىڭ جەر سۇراعان ورالمان اعايىندارعا بەرگەن جاۋاپ حاتىنىڭ كوشىرمەسى قوسا جاريالانعان بولاتىن.

ەندى سول قادىرالينانىڭ حاتىنىڭ "اۋزىنان تۇسكەندەي" اينىمايتىن حات، اقمولا وبلىسى ەرەيمەنتاۋ اۋدانىنىڭ اكىمى ە. نۇعىمانوۆتىڭ قولى قويىلىپ، اتالعان اۋداننىڭ ولجاباي باتىر اۋىلىنا كوشىپ كەلىپ، شارۋاشىلىق قۇرۋ ءۇشىن جەر تەلىمدەرىن سۇراعان «ورالمان» مارتەبەسى بار قانداستارىمىز ونەربەك سەيىلقان مەن باقىت الپىستىڭ دا قولىنا ءتيىپتى.

قادىرالينا مەن نۇعىمانوۆتىڭ حاتىنا قاراپ وتىرىپ، اقمولا وبلىسى جەر سۇراعان ورالماندارعا جاۋاپ رەتىندە بەرەتىن حاتتى ستاندارتتاپ قويعان با دەگەن ويعا قالاسىڭ. ەكەۋى دە جەر كودەكسىنىڭ 46-بابىنداعى ورالماندارعا جەر ۋچاسكەلەرiن بەرۋ تۋرالى نورمالاردان ات توندارىن الا قاشىپ، ورالماندارعا قاتىسى جوق باسقا ءبىر زاڭ باپتارىمەن وراعىتىپ كەلىپ، «... سوتقا شاعىمدانۋىڭىزعا قۇقىعىڭىز بار» دەپ ءتۇيىپتى. بۇلاردىڭ زاڭ جاعىنان ساۋاتتىلىق دەڭگەيلەرى سول ما، جوق ورالماندارعا جەر بەرگىسى كەلمەي مە، الدە پرەزيدەنتتىڭ كوشى-قون ساياساتىن اتقارۋ نيەتى جوق پا، - تۇسىنىكسىز. قاراپ وتىرىپ، قارنىڭ اشادى...

تاعى ءبىر مارتە قايتالاپ ايتايىن، جەر كودەكىسىنىڭ 46-بابىندا ورالماندارعا جەر ۋچاسكەلەرiن بەرۋ تۋرالى باقانداي 4 تارماق بار. 4-تارماعىندا «ورالماندارعا بەرiلەتiن جەر ۋچاسكەلەرiنە وسى كودەكستiڭ 48-بابىنىڭ نورمالارى قولدانىلمايدى»-دەپ تايعا باسقان تاڭباداي اشىق جازىلعان. دەمەك، «ورالمان» مارتەبەسى بار قانداستارىمىز جەر تەلىمدەرىنىڭ پايدالانۋ قۇقىعىنا كونكۋرسسىز، اۋكتسيونسىز، تەگىن يە بولا الادى.

بۇل – زاڭ!

ەلباسىنىڭ قولى قويىلعان!!

ەشكىمنىڭ بۇرمالاۋعا حاقىسى جوق!!!

سوسىن ەكى جاۋاپ حاتتا دا باسقارما ءتورايىمى مەن اكىم «جەر زاڭناماسىنىڭ كەيبىر نورمالارىن قولدانۋعا موراتوري ەنگىزۋ تۋرالى قازاقستان رەسپۋبليكاسى پرەزيدەنتىنىڭ 2016 جىلعى 6 مامىرداعى №248 جارلىعىن» سىلتاۋراتىپتى.

ال، ەندى ەلباسى جارلىعىن وقىپ كورەيىك:

1. 2021 جىلعى 31 جەلتوقسانعا دەيىن مىنالارعا:

1) "قازاقستان رەسپۋبليكاسىنىڭ جەر كودەكسىنە وزگەرىستەر مەن تولىقتىرۋلار ەنگىزۋ تۋرالى" 2015 جىلعى 2 قاراشاداعى قازاقستان رەسپۋبليكاسى زاڭىنىڭ نورمالارىن قولدانۋعا;

2) شەتەلدىكتەرگە، ازاماتتىعى جوق ادامدارعا، شەتەلدىك زاڭدى تۇلعالارعا، سونداي-اق جارعىلىق كاپيتالىنداعى شەتەلدىكتەردىڭ، ازاماتتىعى جوق ادامداردىڭ، شەتەلدىك زاڭدى تۇلعالاردىڭ ۇلەسى ەلۋ پايىزدان اساتىن زاڭدى تۇلعالارعا اۋىل شارۋاشىلىعى ماقساتىنداعى جەر ۋچاسكەلەرىن جالداۋ شارتتارىمەن ۋاقىتشا جەر پايدالانۋ قۇقىعىن بەرۋگە;

3) جەكە جانە زاڭدى تۇلعالارعا مەملەكەتتىك مەنشىكتەگى اۋىل شارۋاشىلىعى ماقساتىنداعى جەر ۋچاسكەلەرiنە جەكە مەنشىك قۇقىعىن بەرۋگە موراتوري جاريالانسىن.

 ايتىڭىزشى، مۇنىڭ قاي جەرىندە «ورالمان» دەگەن ءسوز تۇر؟!!

موراتوري جەر كودەكسىنىڭ داۋلى باپتارىنا عانا جاريالانعان.

قازىر كوشتىڭ قارقىنى ۇدەپ كەلەدى. 2016 جىلى 16 مىڭ 417 وتباسى نەمەسە 33 مىڭ 754 ەتنيكالىق قازاق تاريحي وتانىنا قايتا ورالىپ، ورالمان مارتەبەسىن الدى، دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى. 2015 جىلعىمەن سالىستىرعاندا جەتى ەسە كوپ. بيىل بۇدان دا مول ورالۋى مۇمكىن.

سول ءۇشىن، بيىل كەلگەن ورالمان اعايىننىڭ  جەرگە قاتىستى ماسەلەسىن بيىل شەشۋ كەرەك. كەلەسى جىلعا قالدىرماعان ءجون!

مەن ەرەيمەنتاۋ اۋدانىندا بوس جەر جوق دەگەنگە سەنبەيمىن، بار. ورالمان وتباسى سىزدەن الدەكىمدەر سياقتى 80 مىڭ گەكتار جەر سۇراپ وتىرعان جوق، 80 گەكتار كولەمىندە بەرىلسە دە قاناعات تۇتادى. ال، شىنىمەن اۋداندا بوس جەر جوق بولسا، جوقتىعىن ايتىپ، قۇلاقتاندىرۋ شىعارىڭىز. ەندىگى كوشىپ كەلۋشىلەر باسقا اۋداندارعا بارىپ قونىستانسىن! سىزگە سەنىپ، جەرسىز قالماسىن!

مەنىڭ ايتارىم، جاسى الپىسقا كەلگەن اقساقال اكىم ەرمەك نۇعىمانوۆ سىلدىر ءسوزدى، قويان بۇلتاقتى قويىپ، زاڭگەرلەرىن شاقىرىپ، جەر كودەكىسىنىڭ 46-بابىن جانە «حالىقتىڭ كوشى-قونى تۋرالى» زاڭنىڭ 23-بابىن دۇرىستاپ وقىسىن! ورالمان قانداستارىنىڭ باسىن قاتىرماي، ۋاقىتىن الماي، زاڭ اياسىندا شارۋاشىلىق قۇراتىن جەر تەلىمدەرىنىڭ پايدالانۋ قۇقىعىن بەرسىن! ءسويتىپ، رەسپۋبليكاداعى وزىمەن ارىپتەس جاس اكىمدەرگە ۇلگى، ونەگە كورسەتسىن!

اۋىت مۇقيبەك

Abai.kz