بەيسەنبى, 20 اقپان 2020
ساياسات 10543 1 پىكىر 11 ناۋرىز, 2017 ساعات 14:55

اكىمدەر رەيتينگىسى

فوتو: sayasat.org

«ساياسات-Monitoring» اكىمدەردىڭ اقپان ايىنداعى مونيتورينگىن جاريالادى. ىسكەرلىگى مەن ۇيىمداستىرۋشىلىعىمەن كوزگە تۇسكەن اكىمدەردىڭ ىشىندە الماتى قالاسى اكىمى باۋىرجان بايبەك، استانا قالاسى اكىمى اسەت يسەكەشەۆ، قىزىلوردا وبلىسىنىڭ اكىمى قىرىمبەك كوشەرباەۆ كوش باستاپ تۇر.

رەيتينگ تۇزۋشىلەر ب.بايبەكءتىڭ ءبىرىنشى ورىنعا كوتەرىلۋىن ۋنيۆەرسيادانىڭ ءساتتى وتۋىمەن بايلانىستىرىپتى. جانە رەسەي پرەزيدەنتى ۆ.ءپۋتيننىڭ رەسمي ساپارىن دا ويداعىداي وتكىزدى دەپتى. ءجون-اق.

استانانىڭ اكىمى اسەت يسەكەشەۆءتىڭ ەكىنشى ورىنعا جايعاسۋىنا كسك قىزمەتتەرىن، بالاباقشاعا كەزەككە تۇرۋ، اۋرۋحانالارعا قارالۋ، كەزەك تۇرۋ سىقىلدى تۇرعىندرعا اسا قاجەتتى سالالارعا ە-قىزمەت ەنگىزبەكشى بولىپ جاتقان ۇمتىلىسى سەبەپكەر بولعانعا ۇقسايدى. دەگەنمەن، ءالى دە بولسا جوسپار كۇيىندە تۇرعان بۇل ىستەن گورى، يسەكەشەۆتىڭ الەۋمەتتىك جەلى ارقىلى قالا حالقىمەن تىكەلەي ءارى اشىق سويلەسىپ، بايلانىس ورناتقان اشىقتىعى كوپكە ۇناعان سىقىلدى.

ال، ۇزدىك ۇشتىكتى تۇيىندەپ تۇرعان قىزىلوردا وبلىسى اكىمى قىرىمبەك كوشەرباەۆ وتكەن ايدا قۋاندىق بيشيمباەۆتىڭ ىسىنە قاراماستان شىنى زاۋىتىنىڭ توڭىرەگىندەگى ماسەلەلەردى رەتتەپ، ونىڭ ۋاقىتىندا ىسكە قوسىلۋىنا جول اشتى. اكىمنىڭ بۇل ءىسى ونىڭ ايماق دەڭگەيىندەگى عانا ىسكەر تۇلعا ەمەس، جالپى سالماعى، ىقپالى بار اكىم ەكەنىن اڭعارتتى. سونداي-اق، وبلىستاعى ەنەرگيا جانە گازداندىرۋ ماسەلەلەرىن دە ايماق باسشىسى وڭتايلى شەشىپ وتىرعانى ەسەپكە الىنىپتى.

اكىمدەر رەيتينگىندەگى ۇزدىك ۇشتىك – وسى.

نۇرا ماتاي

Abai.kz

1 پىكىر