قازەكەم: «ادامنىڭ سوزىنە اسپانداعى بۇلت تا اينالادى» دەگەن عوي. مەن سول بۇلتتاي بولدىم. Abai.kz اقپاراتتىق پورتالىنىڭ 27-اقپانداعى سانىندا جاريالانعان «جەلتوقسانشىنىڭ اششى شىندىعى» دەگەن ماقالانى (ب.س.نۇكەنوۆ جازعان) كورىپ، «اششى شىندىقتى نار تاۋەكەلمەن ايتقان ەكەن» دەپ ريزا بولىپ، وقىپ يلانىپ، قۇپتاپ، وعان قارسىلارعا قاتتىراق پىكىر جولداپ ەدىم.  

كەيىنگى پىكىرلەردى وقىپ جانە وزىمە تەلەفون شالعان ادال ازاماتتاردىڭ ايتقاندارىن ءتۇسىنىپ، ناعىز شىندىققا كوزىم جەتتى. سودان تۇيگەنىم: بەيسەنعازى نۇكەنوۆ سۋجۇقپاستىڭ كوكەسى ەكەن! جەلتوقسان ماسەلەسىن ءبۇلدىرىپ، وتىرىكتەن شالاپ جاساپ ءجۇر ەكەن. سونى بىلگەن سوڭ پورتالدا جازعان ويىمنىڭ اعاتتىعىنا وكىندىم. سول ءۇشىن «جەلتوقسان اقيقاتى» ۇيىمىنىڭ توراعاسى بولات  ءىنىم قۇرىمباەۆتان، ونىڭ ءادىل ءىسىن قوستاپ، قاجىماي  كومەكتەسىپ جۇرگەن ايشا، جۇلدىزاي، گۇلميرا قارىنداستارىمنان، تازا جاندى باسقا جەلتوقسانشى ءىنى-قارىنداستارىمنان دا كەشىرىم وتىنەمىن! قازەكەم: «بىلمەگەن  ۋ  ىشەدى» دەگەن دە عوي، مەن دە ويدا جوقتا سوندايعا ۇشىراپ، نۇكەنوۆتىڭ  سىلدىر-سۋدىر سوزىنە سەنىپ قالىپپىن. ويپىر-اي، شىمىرىكپەس «شەشەندەردىڭ» ءتۇر-ءتۇرى بار ەكەن-اۋ!..

قۇرمەتتى جەلتوقسانشىلار! اباي اتامىزدىڭ: «باس-باسىنا بي بولعان...» دەگەنىندەي، قازاق تاريحىنداعى جەلتوقسان كوتەرىلىسى ماسەلەسىن بۇرمالاماي، بىرنەشە ۇيىم قۇرىپ ساۋدالاي بەرمەي، مارقۇم جەلتوقساندىقتاردىڭ ارۋاعىن، تىرىلەردىڭ وزدەرىن سىيلاپ، بىردەن-ءبىر ادال ورتالىق بولۋدى ۇيعارعان «جەلتوقسان اقيقاتى» ۇيىمىن قولداڭىزدار، ونىڭ توراعاسى قۇرىمباەۆ  بولاتپەن قاناتتاس بولىڭىزدار! ويتپەسەڭىزدەر، جەلتوقسان كوتەرىلىسىن زاڭ جۇزىندە ءادىل باعالاۋعا سەلقوس بولىپ، بىلتىرعى 30 جىلدىعىندا ءتىپتى ءلام-ميم دەمەگەن بيلىك سىزدەردى بىرتە-بىرتە شىلدەي توزدىرىپ جىبەرەدى، - ويلانىڭىزدار!

عابباس قابىشۇلى

Abai.kz