قر سىرتقى ىستەر مينيسترلىگىنە قىرعىز رەسپۋبليكاسى ىستەرى جونىندەگى ۋاقىتشا وكىل كايناربەك توكتومۋشەۆ شاقىرىلدى، - دەپ حابارلادى قر ءسىم ءباسپاسوز قىزمەتى.

اتالعان كەزدەسۋدە قازاقستان سىرتقى ىستەر ءمينيسترىنىڭ ورىنباسارى عالىمجان قويشىباەۆ قىرعىز ديپلوماتىنا قىرعىزستان پرەزيدەنتى المازبەك اتامباەۆتىڭ 2017 جىلدىڭ 17 اقپانىندا Euronews تەلەارناسىنا بەرگەن سۇحباتىنداعى پىكىرىنە قاتىستى «تاڭدانىس پەن نارازىلىق بىلدىرىلگەن» نوتانى تابىستادى.

بۇعان دەيىن قىزرعىز بيلىگى 2010 جىلى كورشى ەلدە بولعان داعدارىستى جاعدايدى رەتتەۋدەگى قازاقستان ءرولىن بىرنەشە رەت اتاپ وتكەن ەدى. كوپتەگەن حالىقارالىق قۇرىلىمدار دا وعان جوعارى باعا بەرگەن.

بۇل ماسەلە بويىنشا استانانىڭ رەسمي پوزيتسياسى 2010 جىلعى 19 مامىردا قر ءسىم مالىمدەمەسىندە باياندالعان. اتاپ ايتار بولساق، وندا «2010 جىلدىڭ ساۋىرىندە بولعان قايعىلى وقيعالاردىڭ العاشقى كۇنىنەن باستاپ،  قازاقستاننىڭ باۋىرلاس حالىققا ەكىجاقتى نەگىزدە كومەك پەن قولداۋ كورسەتكەنى» باسا ايتىلعان.

ەقىۇ توراعاسى بولعان قازاقستان تەز ارادا قر ءماجىلىسى توراعاسىنىڭ ورىنباسارى، ىنتىماقتاستىق بويىنشا قازاقستاندىق-قىرعىزستاندىق پارلامەنت توبىنىڭ جەتەكشىسى، ەلشى جانىبەك كارىبجانوۆتى بىشكەكتەگى ارنايى ەقىۇ ەلشىسى ەتىپ تاعايىندادى.

ودان بولەك، قر پرەزيدەنتىنىڭ قىرعىزستانداعى ارنايى ەلشىسى تاعايىندالدى، ول قىرعىزستاننىڭ ۋاقىتشا ۇكىمەتى باسشىلىعىمەن بىرقاتار كەزدەسۋلەر وتكىزىپ، داعدارىستى جاعدايدان شىعۋ جولدارىن تالقىلادى.

سونىمەن بىرگە، قازاقستان قىسقا مەرزىم ىشىندە ءوز كورشىسىنە كومەكتەر مەن كۇشتەر جىبەردى جانە ەلدەگى ەگىس ناۋقانىنا قولداۋ كورسەتىپ، تەز ارادا جانارماي مەن تۇقىم جەتكىزدى. جالپى العاندا، قىرعىزستانعا 11,6 ميلليون دوللاردان استام سوماعا قازاقستاندىق گۋمانيتارلىق كومەك جىبەرىلدى.

قازاقستان قابىلداعان وسى جانە وزگە شارالاردىڭ ناتيجەسىندە كوپتەگەن ادام شىعىنىنا اكەپ سوعاتىن ۋشىعۋلار ورىن العان جوق.

قورىتىندىلاي كەلە، قازاقستاندىق تاراپ ەكى حالىق اراسىنداعى ءداستۇرلى باۋىرلاس قارىم-قاتىناستارعا جانە قازاقستان رەسپۋبليكاسى مەن قىرعىز رەسپۋبليكاسى اراسىنداعى وداقتىق قارىم-قاتىناستار شارتىنا بەيىل ەكەندىگىن مالىمدەيدى. 

Abai.kz