بۇگىن «ۇلا دالا قىراندارى» قوعامدىق قوزعالىسىنىڭ مۇشەسى ايدىن ەگەۋباەۆقا سوتقا شاقىرۋ قاعازى كەلىپتى. بۇل تۋرالى ايدىن قالدىبايۇلى ءوزىنىڭ «فەيسبۋك» جەلىسىندەگى پاراقشاسىندا جازدى.

قر ادىلەت مينيسترلىگىنىڭ قاراماعىنداعى استانا قالالىق ادىلەت دەپارتامەنتى ايدىن ەگەۋباەۆتى «بورىشكەر» رەتىندە اكىمشىلىك سوتقا كەلۋدى قاتاڭ مىندەتتەگەن.

شىعىس قازاقستان وبلىسىنىڭ ەكس-اكىمى بەردىبەك ساپارباەۆ پەن بەلسەندى ايدىن ەگەۋباەۆتىڭ اراسىنداعى داۋدىڭ ۋشىققانىنا ءبىراز بولعان. ەگەرەستە ەكى جاق تا يتجىعىس ءتۇسىپ جاتىر. وسى جولى ايدىن ەگەۋباەۆ ءوزىنىڭ الەۋمەتتىك جەلىدەگى جەكە پاراقشاسىندا «ماعان قارسى كۇرەس باستالدى!» دەپ جازدى. اكىمنىڭ «بىلىعىن» اشكەرەلەگەن ايدىن  ەگەۋباەۆتان ماسەلەنىڭ ءمان-جايىن سۇراعان ەدىك.

- ايەكە، مىناۋ نە قىلعان شاقىرتۋ؟

- سوت ورىنداۋشىلاردىڭ شاقىرتۋى. شىعىس قازاقستاننىڭ ءبىرشاما جەرىن قىتايلىق كومپانيالارعا زاڭسىز بەرگەن بەردىبەك ساپارباەۆپەن ارادا بولعان سوتتا ءبىز جەڭىلىس تاپتىق. سودان ايىپپۇلدى «Today.kz» سايتى مەن ماعان بىردەي مىندەتتەدى. ەندى مىنە، سوت ورىنداۋشىلار سوت شەشىمىن ورىنداماعانىم ءۇشىن، قر اكىمشىلىك كودەكسىنىڭ 669 بابى بويىنشا اكىمشىلىك سوتقا بەرىپتى.

- سوندا سوماسى قانشا، الگى ايىپپۇلدىڭ؟ سوسىن «Today.kz» بىرگە ءبولىپ تولەيتىن بولساڭىزدار، ولار تۋرالى نەگە ەش جەردە ايتىلمايدى؟

- 100 مىڭ تەڭگە. ونىڭ 15 مىڭعا جۋىعىن مەن تولەگەنمىن. ال سول سوتتان كەيىن، مەنىڭ «Today.kz» سايتىنا شىققان، ساپارباەۆقا قاتىستى ماقالامدى تەرىسكە شىعاراتىن ماتەريال بەرۋىم كەرەك بولدى. مەن سوت شەشىمىنە سايكەس، تەرىستەمەنى دايىنداپ، Today.kz-كە بەردىم. بىراق، بەلگىسىز ءبىر سەبەپتەرمەن ولار ءالى جاريالاعان جوق. سوسىن مەن سايتتى دا سوتقا بەردىم. 9.02.2017 جىلى العاشقى وتىرىس بولدى. استانا قالاسى ەسىل اۋداندىق سوتىندا اقپاننىڭ جيىرماسى كۇنى Today.kz-كە قاتىستى سوت وتىرىسى وتەدى.

- سوندا ءسىزدىڭ ساپارباەۆقا قاتىستى بارلىق ايىپتاۋلارىڭىز كۇشىن جويعانى ما؟

- جوق. شىعىس قازاقستان وبلىسىنىڭ ەكونوميكالىق مامانداندىرىلعان سوتىندا مەن ساپارباەۆتىڭ زاڭسىز ارەكەتتەرىن تولىق دالەلدەپ شىقتىم. سۋديا شاكەنوۆا دەگەن كىسى بولدى. شقو-داعى 91,443,1 گەكتار جەردىڭ قىتايلىق كومپانيالارعا زاڭسىز بەرىلگەنىن دالەلدەدىك. سوت شەشىمى بيىلعى جىلدىڭ 24 قاڭتارىنا باستاپ كۇشىنە ەنۋى ءتيىس بولاتىن. ساپارباەۆ وسىنىڭ بارلىعىن تەرىستەپ وتىر.

- ەندى نە ىستەمەكسىز؟

- ماعان وتكەندە قولىندا قۇزىرەتى بار ءبىر كىسىلەر «ساپارباەۆتان كەشىرىم سۇراي سالساڭشى» دەگەن ۇسىنىستار ايتتى. جوق، مەن نەگە ساپارباەۆتان كەشىرىم سۇراۋىم كەرەك. ەگەر بەردىبەك ساپارباەۆ تاپ-تازا ادام بولسا، كەلسىن. سول جەردە حالىقپەن كەزدەسۋ وتكىزەيىك. بەتپە-بەت كەزدەسەيىك. ول كىسى حالىقشىل اكىم ەدى عوي. حالىقپەن كەزدەسسىن، بىزبەن كەزدەسسىن. ماسەلەنى سوندا تالقىلايىق! مەن بۇل ۇسىنىستى ءبىراز جەردە ايتتىم. ازىرگە اكىم مىرزادان جاۋاپ جوق.

- ۋاقىت ءبولىپ، ماسەلەنىڭ ءجاي-جاپسارىن ايتىپ بەرگەنىڭىزگە راقمەت.

نۇرگەلدى ابدىعانيۇلى

Abai.kz