پرەمەر-مينيستر باقىتجان ساعىنتاەۆ EXPO-2017 كورمەسىن وتكىزۋگە كوپ قاراجاتتىڭ جۇمسالىپ جاتقانىنا قاتىستى سىنعا جاۋاپ بەردى، - دەپ حابارلايدى Tengrinews.kzء تىلشىسى.

"الدا ءۇش اي  EXPO كورمەسىن وتكىزۋ كەرەك. مەن ءتۇسىنىپ وتىرمىن، ادامداردىڭ كوپشىلىگى نەلىكتەن سونشا قاراجاتتىڭ جۇمسالعانىن تۇسىنبەي جاتادى. 13 ميلليارد تەڭگە بار، ونىڭ ىشىندە الماتىداعى ۋنيۆەرسيادا ويىندارىن وتكىزۋ بارىسىندا ۇنەمدەگەن 4 ميلليون تەڭگە بار. EXPO كورمەسىن وتكىزۋ استاناعا عانا ەمەس، بۇكىل ەلگە اسەر ەتەدى. سوندىقتان بۇل كورمەنى جوعارى دەڭگەيدە وتكىزىپ، ەلىمىزدىڭ بەدەلىن كورسەتەتىن ايتۋلى شارا ەتىپ وتكىزۋ كەرەك. مەنىڭشە، ءبىز EXPO-نى وتە جوعارى دەڭگەيدە وتكىزەمىز", - دەدى ساعىنتاەۆ ۇكىمەت وتىرىسى بارىسىندا.

سونداي-اق، پرەمەر-مينيستر ۋنيۆەرسيادانىڭ ۇيىمداستىرۋشىلارى مەن جوعارى ناتيجە كورسەتكەن سپورتشىلارعا العىس ايتىپ، مادەنيەت جانە سپورت مينيسترلىگىنە ۋنيۆەرسيادا جەڭىمپازدارى مەن جۇلدەگەرلەرىنە، ولاردىڭ باپكەرلەرىنە تيەسىلى تولەماقىلاردى دەر كەزىندە بەرۋدى تاپسىردى.

"سايكەسىنشە قاۋلى دايىنداپ قويىڭىزدار، ۇزاققا سوزباي پرەمەر-ءمينيستردىڭ كەڭسەسىنە اكەلىڭىزدەر. سودان الماتى اكىمدىگىمەن بىرىگە وتىرىپ قۇرىلعان سپورت عيماراتتارى مەن نىساندارىن ءالى قاراي قولدانۋ ماسەلەلەرىن شەشۋ كەرەك. (...) اسەت ورەنتايۇلى (استانا قالاسىنىڭ اكىمى يسەكەشەۆ - اۆتور.), ءسىز مينيسترلىكپەن جانە باۋىرجان قادىرعاليۇلىمەن (الماتى قالاسىنىڭ اكىمى بايبەك - اۆتور.) سويلەسىپ، ولاردىڭ وسى جۇمىستى قالاي جۇرگىزگەنىن ءبىلىپ الۋىڭىزدى سۇرايمىن. سەبەبى استانادا مۇنداي نىساندار وتە كوپ، تاجىريبەمەن ءبولىسۋ كەرەك", - دەدى ساعىنتاەۆ.

اباي-اقپارات