قارا باۋىر قاسقالداق، قايدا ۇشتىڭ پىر-پىرلاپ؟

سازىڭ قالدى ءسابيدىڭ ەڭبەگىندەي بىلقىلداپ.

قارا باۋىر قاسقالداق، كەرى قايت،

سيرەپ قالعان توعايعا «قامىقپا» دەپ كوڭىل ايت، - دەپ شىرقالعان ءاننىڭ اۆتورى، سازگەر ىلەسبەك امانوۆتىڭ كەلمەستىڭ كەمەسىنە ءمىنىپ كەتكەنى جايىنداعى سۋىت حاباردى، كەشە توبانياز باۋىرىم تەلەفون ارقىلى جەتكىزگەن ەدى. 

جەلتوقسان كوتەرىلىسىنە قاتىستى شىققان بۇل ءان تالاي جانداردىڭ كوڭىلىنەن شىقتى، اسىرەسە، تۇرمەلەر مەن زونالاردان قايتىپ كەلگەن بىزدەرگە ەرەكشە ىستىق ەدى. قايىرماسىنداعى "قاڭعىپ كەلگەن شۇرەگەيى" بىزگە تىرناعى باتقان، قىلىشىنان قان تامعان قىزىل يمپەريا وكىلدەرىنە ارنالىپ ايتىلعان ىزا-كەگىمىزدى ءدال باساتىن ءسوز ەدى. ءبىز دە ايىزدارىن ءبىر قاندىرا، ناقىشىنا سالا ورىنداۋعا تىرىسىپ باققان تالاي انشىلەرگە قوسىلا شىرقاپ قويا بەرەتىنبىز.

تويشىل قازاقتىڭ ۇلكەندى-كىشىلى تويلارى مەن باسقوسۋلارىندا شىرقالىپ جۇرگەن وسى ءاننىڭ اۆتورى -ىلەسبەك اعامىزبەن تانىسۋدىڭ جولى بىلتىر سايلاۋ ناۋقانى كەزىندە تۋعان ەدى. شىمكەنت قالاسىنىڭ جەلتوقساندىق ازاماتتارى - ءسابيت، باتىرحان، توبانيازدار كۇتىپ الىپ، كەيىننەن، الماتى قالاسىندا گۇلميرا تويبولدينانىڭ داستارحانىنا جينالعان جەلتوقساندىقتاردىڭ باسقوسۋىنداعى وتىرىستا ءوزىنىڭ ورىنداۋىندا تىڭداۋ باقىتىنا يە بولعان ەدىك. كەرەمەت باسقوسۋدا تالاي اندەر ايتىلىپ، بايان پەرنەتاقتالارىندا ويناعان شەبەردىڭ ساۋساقتارى مەن قۇبىلا شىققان اسەم داۋىسى بارشامىزدى باۋراپ الىپ، قايىرماسىنا كەلگەندە : 

"...ۇيا قالسا يەسiز،

ايدىن ءۇشiن سول قايعى.

قاڭعىپ كەلگەن شۇرەگەي،

كولگە پانا بولمايدى", - دەپ قوسىلا جونەلگەنىمىزدى كورگەندە، اۆتوردىڭ جۇرەكتەن شىققان ءانى جۇرەكتەرگە جەتكەنىن كورىپ، ءوزى دە ءبىر ەرەكشە كۇيگە ەنگەنىن سىرت كوزدەن جاسىرۋ مۇمكىن بولمادى. اتتەڭ-اي، سول باسقوسۋ سوڭعى بولارىن كىم بىلگەن؟!... 

ءدال وسى ۋاقىتتا شىمكەنتتەن شىققان قارالى كوش سارىاعاشقا جاقىنداپتى. سازگەردى اكە-شەشەسى ماڭگى مەكەن تاپقان ماقتارالعا قوياتىن كورىنەدى.

ىلەسبەك كوزدەن كەتسە دە، كوڭىلدەن كەتپەيتىن اۋەنىمەن ىلەسىپ، جەلتوقساننىڭ رۋحىن كوتەرىپ كەتىپ بارا جاتقانداي كورىنەدى!...

تۋعان-تۋىستارىنا قايعىرىپ، كوڭىل ايتامىز!

قوش بول، باۋىرىم!

جاتقان جەرىڭ جانناتتان، توپىراعىڭ تورقا بولسىن!

قۇرمانعازى راحمەتوۆ

Abai.kz