ارۋاعى اداسقان، ءتانىن جەر قابىلداماعان ۆلاديمير يليچ لەنيننىڭ ەسكەرتكىشتەرى قازاق دالاسىندا كۇنى بۇگىنگە دەيىن سامساپ تۇر. دالىرەك ايتساق، بولشەۆيك كوسەمىنىڭ باقانداي 159 ەسكەرتكىشى بار، بىزدە.  بۇنى «Tengrinews.kz» ەسەپتەپ شىعىپتى.

لەنين اتانى ۇلىقتاۋدا اقمولا وبلىسى الدا تۇر. كۋلاگين باسقاراتىن وڭىردە لەنيننىڭ 49 ەسكەرتشى انىقتالعان. ال كەرەكۋ وڭىرىندە 44, سولتۇستىك قازاقستان وبلىسىندا 24 تاس تۇعىر بار.

بۇل ماقتانىش پا، الدە وتارشىلدىق سانادان ارىلا الماۋشىلىق پا؟ قازاقستاننىڭ ەگەمەندىك العانىنا بيىل شيرەك عاسىردان اسار ۋاقىت تولدى. وتكەن جىلى تاۋەلسىزدىكتىڭ 25 جىلدىعىن بوركىمىزدى اسپانعا اتىپ اتاپ وتكىزدىك. 25 جىلدىققا 25 مىڭ ادامعا سولكەباي تاعىپ، تاۋەلسىزدىكتى ۇلىقتادىق. حوش. سويتە تۇرا كەشەگى كوسەم، بۇگىنگى ەكسپونات ۆلاديمير لەنيننىڭ ەسكەرتكىشتەرى تاۋەلسىز ەلدىڭ قالالارىندا مەنمۇندالاپ تۇرعانى نەنى بىلدىرەدى.

ءبىز ماسەلەنىڭ اق-قاراسىن بىلمەك بولىپ، قر مادەنيەت جانە سپورت مينيسترلىگىنە حابارلاستىق.

«باق-تا جاريالانعان ۆلاديمير لەنيننىڭ ەسكەرتكىشتەرى تۋرالى مالىمەتكە قاتىستى الداعى ۋاقىتتا رەسمي جاۋاپ بەرەتىن بوامىز»، - دەدى مينيسترلىكتەگىلەر.

ول ول ما، جاقىندا بەلگىلى بولعانداي قازاقستاندا بۇگىندە لەنيننىڭ اتىمان اتالاتىن 352 كوشە بار ەكەن. بۇل انىعىندا، گەرونتوكراتيالىق جۇيەگە نەگىزدەلگەن بيلىكتىڭ شيرەك عاسىرلىق جۇمىسىنىڭ جەمىسى. نەمەسە حالىق ساناسى ازات بولعانىمەن، بيلىك ەسكى قوعام فورماتسياسىنان ءالى كۇنگە ارىلا الماي كەلەدى دەگەن ءسوز.

سالىستىرمالى تۇردە ايتا كەتەيىك، بىلتىر ۋكراينا راداسى كەڭەستىك كەسىر قوعاممەن بايلانىستىراتىن بارلىق اتاۋلارعا تىيىم سالدى.  ۋكراينانىڭ ءىرى قالالارىنان باستاپ، شالعايداعى اۋىلدارعا دەيىن سابەتتىك جۇيەمەن بايلانىستى بارلىق اتاۋدىڭ كوزىن جويۋعا، ءتىپتى كوممۋنيستىك پارتيانىڭ اتاۋىن دا وزگەرتۋگە شەشىم قابىلدادى. بۇل دەكوممۋنيزاتسيا دەپ اتالدى.  ناتيجەسىندە 300-گە جۋىق ەلدى-مەكەن، 7 قالا، 9 اۋدان اتاۋلارى وزگەرتىلدى. قازىر كوممۋنيستىك سيپاتتاعى 6100 كوشە اتاۋلارى وزگەرتىلۋدە.

راسىندا «كۇنكوسەمگە» كۇرەسىننەن ورىن بەرگەن جالعىز ەل ۋكراينا ەمەس. پوست كەڭەستىك ەلدەردىڭ ءبىرسىپىراسى ەسكى تاستاردان الدەقاشان ارىلعان.

ال بىزدە شە؟ بىزدە جاعداي بىلاي. سوراقىسى سول، لەنيننىڭ  ەسكەرتكىشى ەلدىڭ ەڭ ءىرى مەگاپوليسى الماتىدا دا بار. جىل سايىن قازاقستان كوممۋنيستەرى سارىارقا كينوتەاترىنىڭ ارتىنداعى ساياسي قوقىس الاڭىنا جينالىپ تۇراتىنى تاعى بار. قازاقستان كوممۋنيستەرىنىڭ «قاعباسى» ىسپەتتى سول تاس تۇعىردى قۇلاتۋعا قۇلىقتى جان جوق، ءالى. بايبەك تە، باسقاسى دا.  كەرىسىنشە 2015 جىلى كوممۋنيسيىك پارتيا وكىلدەرى لەنيننىڭ ەسكەرتكىشىن استاناعا قايتا قويۋدى سۇرادى. ءابۇيىر بولعاندا قىزىلداردىڭ ماقساتى جۇزەگە اسپادى.

ەڭ سوراقىسى سول، الاشتىڭ استاناسى سانالاتىن سەمەيدەگى لەنين كوشەسىنە  ۇلت كوسەمى ءاليحان بوكەيحاننىڭ اتىن بەرۋدى ءبىزدىڭ «Abai.kz» پورتالى بىرنەشە مارتە كوتەردى. وعان دا ء«لام-ميم» دەگەن جان تابىلمادى.

ارعى جاعىن ءوزىڭىز ويلاي بەرىڭىز...

نۇرگەلدى ابدىعانيۇلى

Abai.kz