اۋىل شارۋاشىلىعى مەملەكەتتىڭ الەۋمەتتىك-ەكونوميكالىق ماڭىزدى سالالارىنىڭ ءبىرى. بۇگىندە ەلىمىزدەگى اگروونەركاسىپتى كەشەندى دامىتۋ ءۇشىن ءتۇرلى باعدارلامالار قابىلدانعان. ولاردىڭ ءاربىرى ەلىمىزدىڭ اگروونەركاسىپتىك سۋبەكتىلەرىنىڭ باسەكەگە قابىلەتتىلىگىن ارتتىرىپ، سالانى دامىتۋعا باعىتتالعان، دەپ حابارلايدى وقو اكىمدىگىنىڭ ءباسپاسوز قىزمەتى. 

اۋىل شارۋاشىلىعى ونىمدەرىن مولايتىپ، ساپاسىن ارتتىرۋ جانە مال شارۋاشىلىعىن دامىتۋ ءۇشىن تىڭ عىلىمي جەتىستىكتەردى يگەرۋ قاجەتتىلىگى تۋىندايدى. وسى رەتتە، سوڭعى جىلدارى ەل اراسىندا اتى ءجيى اتالىپ جۇرگەن «گيدروپونيكا» ءادىسىن ايتۋعا بولادى. وسىمدىكتەردى جاساندى قورەكتەندىرگىش ورتادا ءوسىرۋ ارقىلى ناتيجەگە قول جەتكىزۋگە بولاتىن ءتاسىلدىڭ پايداسى ۇشان-تەڭىز دەيدى بىلەتىندەر.

جىلدى قورىتىندىلاعان باسشىلار سوزاق اۋدانىندا وسى ءادىستىڭ پايداسى تۋرالى كەڭەيتىلگەن جيىن وتكىزگەن. اۋدان اكىمى ماقسات يساەۆ قاتىسقان باسقوسۋدا اۋىلدىق وكرۋگ اكىمدەرى مەن اگروقۇرىلىم جەتەكشىلەرى جانە شارۋالار دا بولدى.

گيدروپونيكا ءادىسى جانە ونىڭ ارتىقشىلىعى مەن قولدانۋ ءتاسىلى تۋرالى كەڭىنەن ايتقان «كاز اگرو گرين» جشس-ءنىڭ باس ديرەكتورى ب.كوپباەۆ اتالعان ءادىستىڭ مەيلىنشە قىسقا مەرزىمدە قۇنارلى، ءارى مول ءونىم بەرەتىن سوڭعى تەحنولوگيا ەكەنىن ءتۇسىندىردى.

جيىندى قورتىندىلاعان اۋدان اكىمى بۇل ءادىستىڭ تيىمدىلىگىنە كوز جەتكىزىلسە، جەرگىلىكتى شارۋالار جاڭا تەحنولوگيانى مەڭگەرەتىندىگىن جەتكىزدى. اتالعان ءتاسىلدى ىسكە اسىرۋ ءۇشىن الداعى ۋاقىتتا ەكى جاقتى كەلىسىمدەر جۇرگىزىلمەك. 

اباي اقپارات