«رەسەيلىكتەردىڭ شىنايى جالاقىسى 10%-عا، حالىقتىڭ تابىسى 4-5%-عا قۇلدىرادى. جىل اياعىنا دەيىن بۇل كورسەتكىش تاعى دا ۇلعايادى. ەڭبەك نارىعىنىڭ بارلىق سالاسىندا جاعداي اسقىنىپ بارادى. بۇل دەگەنىڭىز الەۋمەتتىك تۇرمىسىمىزدىڭ قۇلدىراپ كەتكەنى». يتار-تاسس تاراتقان اقپاراتتا رەسەيدىڭ بۇرىنعى قارجى ءمينيسترى كۋدرين وسىلاي دەپ مالىمدەگەن.

الەكسەي كۋدرين ءوز سوزىندە:

«تاعى ءبىر جاعىمسىز فاكت، قازىرگى جاعداي 2008-2009 جىلدارداعى داعدارىستا دا بولماپ ەدى. كۇزدە جاعدايىمىز قازىرگىدەن دە اۋىرلاي تۇسەتىنى بايقالادى. ەكونوميكالىق قىسپاق پەن داعدارىستىڭ ءبىرىنشى تولقىنى سوعىپ وتكەن رەسەيدى ەكىنشى داۋىل كۇتىپ تۇر. ول كەزدە جاعدايىمىز مۇلدە سوراقى بولۋى مۇمكىن»، - دەي كەلىپ، كوپتەگەن ءوندىرىس ورىندارىندا جۇمىسشىلاردىڭ جارتى جۇمىس كۇنىنە كوشكەنىن، بۇلاي جالعاسسا، رەسەيدىڭ الەمدىك ەكونوميكادا ۇلەسى ازايىپ، جيىرما الپاۋىت ەلدىڭ دە قاتارىنان شىعۋى مۇمكىن ەكەنىن، قازاقستانداعىداي رەسەيدە دە مەزگىلىنەن بۇرىن سايلاۋ وتكىزۋ كەرەكتىگىن ايتقان. سونداي-اق ول باتىسپەن اراسى سالقىنداعان رەسەيدى داۋىل ورتاسىندا قالعانداي دەپ سيپاتتادى.

Abai.kz