استانامىزدا الەمدىك جانە ءداستۇرلى دىندەر ليدەرلەرىنىڭ V سەزى وتكەنى بەلگىلى. سەزدە البەتتە، ەلىمىزدىڭ پرەزيدەنتى نۇرسۇلتان نازارباەۆ ءسوز سويلەدى. سوزىندە قازىرگىدەي اۋمالى-توكپەلى زامان بارىسىنداعى «بالاقتان شاۋىپ، باسقا وزعان» ءدىني ەكسترەميزم ماسەلەسىنە كەڭىنەن توقتالدى. سونىمەن بىرگە، وتكەن IV سەزدە ءوزىنىڭ باستاماسىمەن قۇرىلعان ءدىني ليدەرلەر كەڭەسىنىڭ ماڭىزدىلىعىن اتاپ ءوتتى. كوپ-كوپ نارسەلەر اتالىپ ايتىلدى، نەگىزىنەن.

-         ءدىني ليدەرلەر كەڭەسىنىڭ الەمدىك رۋحاني-ادامگەرشىلىك قۇندىلىقتاردى نىعايتۋ، دىندەر مەن مادەنيەتتەردىڭ اراسىنداعى ءوزارا تۇسىنىستىك پەن پەن كەلىسىمگە قول جەتكىزۋ ىسىندە ماڭىزدى رول اتقاراتىنىنا سەنىمدىمىن. الەم دامۋىنىڭ قازىرگى بارىسى جاھاندىق كونفەسسياارالىق ديالوگتىڭ وسىنداي بىرەگەي تەتىگىنە دەگەن سۇرانىستىڭ ءوسىپ كەلە جاتقانىن كورسەتىپ وتىر، - دەدى، نۇرسۇلتان نازارباەۆ سويلەگەن سوزىندە، - اسكەري جانە ىشكى قاقتىعىستار كوبەيدى، مۇنداي قاقتىعىستارعا قاتىسۋشى تاراپتار ادامداردىڭ ءدىني ۇستانىمىن وزدەرىنە وتە ءتيىمدى پايدالانۋدا. ءبىزدى وسىنداي قاقتىعىستاردىڭ ءبىرى، مۇسىلمانداردىڭ ەڭ باستى كيەسى، يسلام الەمىنىڭ بەسىگى – مەككە مەن مادينەگە جاقىن ماڭدا – يەمەندە تۇتانعانى الاڭداتپاي تۇرا المايدى. بىرقاتار ەكسترەميستىك توپتاردىڭ ءىس-قيمىلدارى ءتۇرلى كونفەسسيانى ۇستانۋشىلاردىڭ اراسىندا جاۋلىق تۋدىرىپ، ازيا مەن افريكاداعى كوپ قوعامدى جىككە بولۋدە. ۋكراينانىڭ شىعىسىندا قالالار مەن اۋىلداردى اتقىلاۋ كەزىندە كوپتەگەن حرامداردىڭ ءبۇلىنىپ جاتقاندىعى تۋرالى حابارلار دا الاڭداتادى...

وسىلاي دەپ ءبىر قويعان قازاق ەلىنىڭ پرەزيدەنتى يراك پەن سيريادا مىڭداعان جىلدار بويىنا ساقتالىپ كەلگەن كوپتەگەن مادەني مۇرالاردىڭ ادەيى قيراتىلۋىن دا قىنجىلىسپەن ايتىپ ءوتتى. قىسقاسىنان قايىرعاندا، قازاق ەلى عانا ەمەس، سونىمەن بىرگە الەمدىك دىندەر ليدەرلەرى باسقوسۋىنىڭ نەگىزىن قالاۋشى كوشباسشى رەتىندە دە نۇرەكەڭ ءبىراز دا ءبىراز ماسەلەلەردىڭ باسىن قايىردى. دۇرىس شىعار-اۋ، جالپى العاندا، دەگەنمەن دە «كوڭىل دەگەن كوك دونەن» شىركىننىڭ تىم-تىم ارىدەگى... تىم ارىدەگى تۇپكىرىنەن كوڭىلسىزدەۋ-كوڭىلسىزدەۋ دە كەيبىر ويلار كولبەڭ-كولبەڭ ەتە قالادى. وسىندايدا. كولبەڭ-كولبەڭ ەتە قالادى دا، ءدال وسى «الەمدىك دىندەر ليدەرلەرى» دەگەن جاپ-جاڭا ءسوز تىركەستەرىنە قاتىستى اندا-مۇندا ايتىلىپ قالىپ جاتقان كەيبىر دە كەيبىر سوزدەر ەسىمىزگە تۇسە كەتەدى – اياق استىنان. ماسەلەن، بەلگىلى ساياساتتانۋشى ءارى قوعام قايراتكەرى ايدوس سارىم مىرزانىڭ سوزدەرى.

-         الەمدەگى دىنارالىق كەلىسىم دەيسىزدەر مە؟ ال ءوز ەلىمىزدىڭ ىشىندەگى دىلارالىق كەلىسىمنىڭ جوقتىعىن قالاي تۇسىندىرەمىز، - دەيدى ايدوس مىرزا، - ءوز ءىشىمىزدى تۇگەندەپ، بارلىق كۇشتەر جيىلىپ، ۇلتتىق رۋح، ۇستىن، ۇستانىم، ميسسيا، مۇرات دەگەن وزەكتى ماسەلەلەر بويىنشا بارلىعىن ءبىر جاعىنا شىعاراتىن كەز كەلگەن جوق پا؟ الەمدىك دىندەردى تاتۋلاستىرا الماسپىز، ال بىراق ورىس تەلەديدارى بۇگىنگىدەي داۋلەت قۇرا بەرسە، ءتۇبى جەرىمىزدىڭ تۇتاستىعىنان ايىرىلۋ قاۋپى بار ەكەنىن مويىندالىقشى... (http://abai.kz/post/view?id=3685)

راس، ۇلكەن ساياساتتىڭ  ۇلكەن وكىلدەرىنىڭ اندا-ساندا ۇلكەن ءبىر قالادا باس قوسىپ، اناۋ-مىناۋ ماسەلەلەردى «تاس-تالقان» ەتىپ تالقىلاپ تۇرعانى دۇرىس تا شىعار، ايتسە دە، الەمدىك دىنارالىق تاتۋلىقتى تۋ ەتكەن قازاق بيلىگى ەل ىشىندەگى دىلارالىق كەلىسىم مەن مامىلەنى دە مىقتاپ ەسكەرىپ جۇرگەنى ابزال شىعار.

مارات ماداليموۆ

Abai.kz