وتان – قاسيەتتى ۇعىم، قاستەرلى ءسوز
اسا قامقور، ەرەكشە مەيىرىمدى اللانىڭ اتىمەن باستايمىن!
وتان – ۇلاعاتتى ۇعىم، قاسيەتتى ءسوز. حالىق ناقىلىندا: «وتان قادىرىنە جەتپەگەن ءوز قادىرىنە جەتپەيدى»، – دەگەن دانالىق وي قالعان.
اللاعا سانسىز شۇكىر، وتانىمىز بار. جاراتۋشى يەمىزدىڭ بەرگەن سىيىن، تاۋەلسىزدىكتىڭ قادىرىن تۇسىنە ءبىلۋىمىز قاجەت. اسىل ءدىنىمىز يسلامدا بەس نارسەنى: وتانىڭدى، ءدىنىڭدى، ۇياتىڭدى، جانىڭدى، دۇنيەڭدى قىزعىشتاي قورعاۋ – ساليقالى ءھام ساۋاپتى امال، ىزگى ءىس.
ءتالىمى مول ءبىر حاديسىندە پايعامبارىمىز مۇحاممەد (اللانىڭ وعان يگىلىگى مەن سالەمى بولسىن): «ەكى كوز اقىرەتتە توزاققا كۇيمەيدى: ءبىرىنشىسى، كۇناسىنا وكىنىش ءبىلدىرىپ، وڭاشادا ەگىلىپ جىلاعان كوز، ەكىنشىسى، وتاندى قورعاپ، شەكارا كۇزەتكەن كوز»، – دەگەن. ىزگى عۇلامالار: «وتاندى ءسۇيۋ – يماننان»، – دەپ پايىمدى پىكىر ايتقان.
ارداقتى اقىنىمىز مۇقاعالي ماقاتاەۆ:
«...وڭاي ءسوز عوي «وتاندى سۇيەم» دەگەن،
ءىس تىنبايدى «جانامىن، كۇيەممەنەن...» دەپ جىرلايدى. راسىندا ىزگى نيەتتى پەندە ءسوزىن امالمەن كورسەتە ءبىلۋى كەرەك. تەرەڭ ءبىلىم الىپ، جاقسى قىزمەتكەر بولۋ، ۇلاعاتتى ۇرپاق تاربيەلەپ، ۇلگىلى وتباسىن قۇرۋ، ادامعا، ەلگە زيان اكەلەتىن اللاعا ۇنامسىز ارەكەتتەن ساقتانىپ، يماندىلىققا ۇيىسۋ، مىنە، وتانعا قوسقان ۇلەس وسى بولماق.
يماندىلىق پەن ادامگەرشىلىكتى تۋ ەتىپ، ۇلكەنگە قۇرمەت، كىشىگە ىزەت كورسەتۋ، كورشىنى قادىرلەۋ، وزگەگە قامقور بولۋ – ءاربىر پەندەنىڭ ەلدىڭ دامۋ جولىنداعى قوسقان يگى پايداسى. «وتان ءۇشىن كۇرەس – ەرگە تيگەن ۇلەس»، – دەيدى حالقىمىز.
بىردە ساحابا پايعامبارىمىز مۇحاممەدتەن (اللانىڭ وعان يگىلىگى مەن سالەمى بولسىن): «ۋا، راسۋلاللا، ەڭ ابزال امال نە؟» – دەپ سۇراعاندا، اللا ەلشىسى: «شەكارانى، وتاندى قورعاۋ ءۇشىن ءبىر كۇن، ءبىر ءتۇن كۇزەتتە تۇرۋ...» دەپ جاۋاپ بەرگەن. وتاندى قورعاۋ – ءاربىر ادامنىڭ اسىل مىندەتى، پەرزەنتتىك پارىزى.
اللا تاعالا اسكەري سالاداعى باۋىرلارىمىزعا كۇش-قۋات، وتان سوعىسىنا قاتىسقان ارداگەر اقساقالدارىمىزعا، اپا-اجەلەرىمىزگە مىقتى دەنساۋلىق، جاستارىمىزعا قاجىماس قايرات ءناسىپ ەتكەي.
تاۋەلسىز ەلىمىزدىڭ ەڭسەسى بيىك، مارتەبەسى ارتا بەرسىن! دۇعامىز قابىل، مۇراتىمىز اسىل بولعاي! ءامين!
ەرجان قاجى مالعاجىۇلى،
قازاقستان مۇسىلماندارى ءدىني
باسقارماسىنىڭ توراعاسى، باس ءمۇفتي.
Abai.kz
