قازاقستاننىڭ تۇرعىن ءۇي قۇرىلىس جيناق بانكى مەملەكەتتىڭ الەۋمەتتىك ساياساتى اياسىندا ارزان تۇرعىن ءۇي قۇرىلىسىن سالۋ بويىنشا جاڭا باعدارلامانى تانىستىردى. ول سارىلا كۇتكەن باسپاناسىنا سالىمشىلاردىڭ تەزىرەك قول جەتكىزۋىنە مۇمكىندىك بەرمەك. 

قتقجب باسشىلىعىنىڭ پىكىرىنشە، ەكىنشى دەڭگەيلى بانكتەرگە شارتتى دەپوزيت سالۋ باعدارلاماسى جىلىنا اۋدانى جۇزدەگەن مىڭ شارشى مەتر بولاتىن الەۋمەتتىك تۇرعىن ءۇي قۇرىلىسى كولەمىن ارتتىرۋعا سەپتىگىن تيگىزەتىن بولادى.   

– بانك جەلىسىمەن «قولجەتىمدى تۇرعىن ءۇي – 2020» باعدارلاماسى بويىنشا قۇرىلىس كولەمىن ارتتىرۋ ءۇشىن، مەملەكەت قوسىمشا 30 ملرد تەڭگە بولەدى. ءبىز ءوز قاراجاتىمىزدىڭ ەسەبىنەن تاعى دا 20 ملرد. تەڭگە بولۋگە جانە ونى نەبارى جىلدىق 3%-بەن دەپوزيت رەتىندە ەدب-گە ورنالاستىرۋعا ءازىرمىز. ەدب بولسا، بۇل قاراجاتتى 7 پايىزدان اسپايتىنداي ەتىپ، باعدارلاماعا قاتىساتىن قۇرىلىس سالۋشىلارعا كرەديت رەتىندە بەرۋى ءتيىس، – دەپ، قتقجب باسقارما توراعاسىنىڭ ورىنباسارى ەربول قاراشۇكەەۆ باعدارلامانىڭ ءمان-جايىن اشىپ كورسەتىپ بەردى. –2014 جىلى قتقجب جەلىسىمەن 429,3 مىڭ شارشى مەتر پايدالانۋعا بەرىلدى. قۇرىلىسقا جەڭىلدىكپەن كرەديت بەرۋ باعدارلاماسى بۇعان قوسىمشا تاعى دا 120-130 مىڭ شارشى مەتر الەۋمەتتىك تۇرعىن ءۇي سالۋعا كومەكتەسەر ەدى.   

قتقجب تانىستىرعان باعدارلاماعا بيزنەسمەندەر مەن ساياساتكەرلەر مىناداي باعا بەرىپ وتىر.

- ەگەر بانكتەر تابەتىنەن تارتىنىپ، مارجاسىن ەكى پايىزعا شەكتەسە، جامان بولماس ەدى، – دەيدى «Baur Kazakhstan» اق پرەزيدەنتى ساكەن شاكيروۆ. – قتقجب ەدب-گە 3%-بەن دەپوزيت ورنالاستىرادى. قۇرىلىس كومپانيالارى ءۇشىن 5% جامان ەمەس... مۇنىڭ الەۋمەتتىك اسەرى دە بايقالادى. قارجىلاندىرۋ دا ارزانىراق  بولادى. بۇل – كرەديتتىك اۋىرتپالىق. ول وزىندىك قۇنعا تاۋەلدى... 

بەلگىلى ءبىر سەبەپتەرمەن اتى-ءجونىن جاسىرىپ قالعان قۇرىلىس كومپانياسىنىڭ ءبىر وكىلى مىناداي پىكىر ايتتى:

- ارىپتەستەرىم مەنى كەشىرە جاتار. بىراق ءبىز ۇدايى «قۇرىلىسشىلاردا اقشا جوق» دەپ، ارزان كرەديت سۇرايمىز. مىنە، بىزگە مىناداي مۇمكىندىك ۇسىنىپ جاتىر. بىراق ءبىز... ءالى دە شاعىم ايتىپ ءجۇرمىز! راس، بيزنەسكە جاقسى پايدا كەرەك! الايدا بۇكىل ەل داعدارىسقا دايىندالىپ جاتقاندا، حالىققا بەت بۇرىپ، مەملەكەتىمىزدى قولداۋىمىز كەرەك. ءبىز مۇنداي جاعدايدا جۇمىس ىستەۋگە ءازىرمىز. «نۇرلى جول» باعدارلاماسى بويىنشا قۇرىلىس سالۋعا دا دايىنبىز.

بۇل باعدارلاما دەپۋتاتتاردان دا قولداۋ تاۋىپ جاتىر.

- جالپى العاندا، مۇنداي قادامداردى قولداۋ كەرەك. ويتكەنى، نۇسقالار قانشالىقتى كوپ بولسا، ولاردىڭ ىشىندە جەمىس بەرەتىندەرى دە سونشالىقتى مول بولماق، - دەيدى قازاقستاننىڭ «اق جول» دپ توراعاسى ازات پەرۋاشەۆ. – وكىنىشكە قاراي، بۇگىنگى كۇنگە دەيىن قولدانىلىپ كەلگەن قۇرالداردىڭ دەنىنىڭ مۇقتاج ادامداردى تۇرعىن ۇيمەن قامتاماسىز ەتۋدە اسا ناتيجەلى بولماعانىن كورىپ وتىرمىز.  سوندىقتان بۇل ماسەلەنى شەشۋگە مۇمكىندىك بەرەتىن ءارتۇرلى قۇرالداردى، ءارتۇرلى ادىستەردى قۋانا قولداپ، ءىس-جۇزىندە ولاردىڭ قالاي جۇمىس ىستەيتىنىن بايقاپ كورۋىمىز كەرەك.

اباي-اقپارات.