«مەملەكەت باسشىسى وڭتۇستىك قازاقستان وبلىسىنا جۇمىس ساپارى بارىسىندا كوكونىس وندىرۋمەن اينالىساتىن رەسپۋبليكاداعى ءىرى جىلىجاي كەشەنىنىڭ جۇمىسىمەن تانىستى» دەپ حابارلايدى اقوردانىڭ ءباسپاسوز قىزمەتى.

قازاقستان پرەزيدەنتى سونداي-اق وبلىستىڭ كاسىپكەرلەرىمەن جانە اۋىل شارۋاشىلىعى تاۋارىن وندىرۋشىلەرمەن اڭگىمەلەسىپ، ءوڭىردىڭ الەۋمەتتىك-ەكونوميكالىق وڭ كورسەتكىشتەرىن اتاپ ءوتتى.

– وڭتۇستىك قازاقستان وبلىسىندا اگروونەركاسىپ كەشەنى ءۇشىن بارلىق قاجەتتى جاعداي جاسالعان. مەملەكەت اۋىل شارۋاشىلىعىن دامىتۋ ىسىنە جان-جاقتى قولداۋ كورسەتىپ، قاجەتتى قاراجات بولۋدە. بەس جىلدا وڭىردە 2,3 ميلليون توننا كوكونىس ءوندىرىلدى. قازاقستاندا مۇنداي جوعارى كورسەتكىشتەرى مەن تابيعي جاعدايلارى بار باسقا ءوڭىر جوق. قازىر ءبىز ەۋرازيالىق ەكونوميكالىق وداق ەلدەرىمەن شەكارامىزدى اشىپ جاتىرمىز. وسىعان بايلانىستى بىزگە ءوزىمىزدى عانا ەمەس، كورشى ەلدەردى دە ونىممەن قامتاماسىز ەتۋ قاجەت، – دەدى نۇرسۇلتان نازارباەۆ.

مەملەكەت باسشىسى ەلىمىزدە كولىك ينفراقۇرىلىمىن دامىتۋدىڭ قاجەتتىگىنە دە نازار اۋداردى.

– ەگەر ەلدە جاقسى جولدار بولماسا، ساۋدا دامىمايدى، سايكەسىنشە ەكونوميكا دا وركەندەمەيدى. سوندىقتان ءبىز قازىر ەلدىڭ بارلىق وڭىرىندە كولىك جەلىلەرىن سالىپ جاتىرمىز، مىڭداعان جۇمىس ورىندارى اشىلۋدا. ءار ءوڭىردىڭ الدىنا ناقتى مىندەتتەر قويىلعان، سونى ورىنداۋ جۇمىستارىن جالعاستىرۋ قاجەت، – دەدى قازاقستان پرەزيدەنتى..

اگرارلىقتار نۇرسۇلتان نازارباەۆقا اۋىل شارۋاشىلىعى سالاسىنداعى شاعىن جانە ورتا بيزنەس كاسىپورىندارىنا كورسەتىلىپ وتىرعان مەملەكەتتىك قولداۋ ءۇشىن ريزاشىلىقتارىن ءبىلدىردى.

اباي-اقپارات.