ەۋرازيالىق ەكونوميكالىق وداق شەڭبەرىندە ورتاق اقشا اينالىمىن قالىپتاستىرىپ، قولدانىسقا شىت جاڭا ۆاليۋتا ەنگىزۋ تۋرالى رەسەي پرەزيدەنتى ۆ.ءپۋتيننىڭ باستاماسى سوزدەن ىسكە كوشە باستاعان سىڭايلى. (وقىساڭىز: ءپۋتيننىڭ ويى ورتاق ۆاليۋتا عانا ما؟ http://abai.kz/post/view?id=3200). شىنتۋايتىندا، ءشوپ باسىن قيمىلداتقان جايت الدەكىمدەردىڭ ءساتسىز ءازىلى نەمەسە ارانداتۋى دا بولۋى عاجاپ ەمەس...

بۇگىن الەۋمەتتىك جەلى قولدانۋشىلارى قىزۋ تالقىلاعان بۇل سۋرەتتە ەاەو-نىڭ  بولاشاقتا قولدانىسقا ەنگىزىلۋى ىقتيمال اقشا بىرلىگىنىڭ ۇلگىسى بەينەلەنگەن. «ەۆراز» اتتى اتاۋ بەرىلگەن «بانكنوتتىڭ» كىندىك اكەسى دەنيس پروكوپوۆ دەگەن ديزاينەر ەكەن. ەۋرو مەن دوللاردىڭ «شاعىلىسۋىنان» شىققان ءدۇبارا يدەيانىڭ قاعازداعى شارتتى بىرلىگى - 20 ەۆراز... ورتاق ۆاليۋتانىڭ بەتىندە ادامزاتتىڭ العاشقى عارىشكەرى يۋري گاگاريننىڭ كۇلىمسىرەگەن ءجۇزى كورىنىس تاپقان. ايتپاقشى، بانكنوتتىڭ ەگەسى وداقتاستار («بيلەت بانكا ەاس»؟..) بولعانىمەن، نومينالدى اقشادا رەسەي فەدەراتسياسىنىڭ مەملەكەتتىك گەربى نەگىزگى نىشان رەتىندە الىنىپتى...

اناۋ-مىناۋ دەۋ ارتىق بولار، بىراق، قوعامدىق پىكىردىڭ قىبىلاناماسىن اڭدىپ-باعۋعا ارنالعان بۇل قادامنىڭ استارىندا الىس ەمەس، ايلاردا رەسمي جاريا بولاتىن اقپارات جاتپاعاندىعىن كىم جوققا شىعارا الادى...

Abai.kz