سەرىكبەك مەيرامبەكۇلى جانبولات 1964 جىلى شىعىس قازاقستان وبلىسى اباي اۋدانىندا دۇنيەگە كەلگەن. 1981 جىلى اۋداندىق «سوۆحوز تۋى» گازەتىندە جۋرناليستىك قىزمەتىن باستاپ، سودان بەرى 30 جىلدان استام ۋاقىت بويى تەلەديدار مەن گازەت سالاسىندا تابان اۋدارماي ەڭبەك ەتىپ كەلەدى. بىلىكتى جۋرناليست، ىسكەر ۇيىمداستىرۋشى سەرىكبەك جانبولاتتىڭ اۆتورلىعىمەن قازاق تەلەديدارى سالاسىندا ءار كەزدەرى «ار» ستۋدياسى، «جىگىتتىڭ سۇلتانى»، «قىز سىنى»، «تايبۋرىل» تەلەبايگەسى، «ۇكىلى ءۇمىت» تۇركى اندەرىنىڭ بايقاۋى سىندى ءساتتى جوبالار دۇنيەگە كەلىپ، تەلەديداردىڭ التىن قورىن تولىقتىردى.

1998 جىلى «حابار» اگەنتتىگىندە «سالەم، قازاقستان» تاڭعى اقپاراتتىق-ساۋىق باعدارلاماسىن اشىپ، اقپاراتتىق ديرەكتسيانىڭ پروديۋسەرى، «جەتى كۇن» جانە «بەتپە-بەت» ساياسي-اناليتيكالىق باعدارلامالارىنىڭ رەداكتورى ءارى جۇرگىزۋشىسى بولدى. سونداي-اق قازاقستان رەسپۋبليكاسى پرەزيدەنتىنىڭ حالىقپەن العاشقى تىكەلەي ەفير ارقىلى سۇحباتىن دا وسى سەرىكبەك جانبولات جۇرگىزگەن بولاتىن. ودان كەيىن سەرىكبەك جانبولات قازاقستان ۇلتتىق ارناسى باس ديرەكتورىنىڭ ءبىرىنشى ورىنباسارى قىزمەتىن اتقارىپ جۇرگەن كەزدە تاماشا ۇيىمداستىرۋشىلىق قابىلەتىمەن قوسا، ساياساتتانۋشى ءارى ەكونوميكالىق تالداۋلارعا بەيىم مامان رەتىندە جاڭاشىلدىق كوزقاراستاعى جاڭا زامان جۋرناليستيكاسىن قالىپتاستىرۋعا ەرەكشە ۇلەس قوستى. سول كەزدە بۇكىل قازاق كورەرمەندەرىنىڭ كوزايىمىنا اينالعان «كوكپار» پىكىرتالاس، ويسايىس باعدارلاماسى رەيتينگى ەڭ جوعارى باعدارمالاردىڭ ءبىرى بولدى. تەلەديدار سالاسىندا ەڭبەك ەتكەن جىلدارى سەرىكبەك جانبولات جالپى قازاق تەلەونەر سالاسىندا باعدارلاما جۇرگىزۋشىلەرىنىڭ وزىندىك مەكتەبىن قالىپتاستىرۋعا ۇيىتقى بولدى.

سەرىكبەك جانبولاتتىڭ شەبەر ءارى جاڭاشىل ۇيىمداستىرۋشى ەكەنى اسىرەسە 2004 جىلى «ايقىن» رەسپۋبليكالىق گازەتى دۇنيەگە كەلگەن كەزدە انىق بايقالدى. جوق جەردەن جاڭا اقپاراتتىق باعىتتاعى زاماناۋي كۇندەلىكتى شىعاتىن گازەت تۋعىزۋ، ونىڭ العاشقى باس رەداكتورى رەتىندە اقپارات ايدىنداعى ورنىن ىزدەۋ، ءوزى باسقارعان ءۇش جارىم جىل ىشىندە رەسپۋبليكاداعى ەڭ ىرگەلى باسىلىمنىڭ بىرىنە اينالدىرۋى – سەرىكبەك جانبولاتتىڭ بىلىكتىلىگىن كورسەتسە كەرەك. وسى از عانا ۋاقىت ىشىندە «ايقىن» گازەتى قازاقستان رەسپۋبليكاسى پرەزيدەنتىنىڭ، جۋرناليستەر اكادەمياسىنىڭ «التىن جۇلدىز» سىيلىقتارىن جەڭىپ الدى.

2008 جىلدىڭ قازان ايىنان باستاپ رەسپۋبليكالىق قوعامدىق-ساياسي اقپاراتتىق «الاش ايناسى» گازەتىنىڭ باس رەداكتورلىعىنا تاعايىندالىپ، تاعى ءبىر جاڭا تۇرپاتتاعى زاماناۋي باسىلىمدى باسقاردى. گازەت دۇنيەگە كەلگەن جىلى-اق مادەنيەت جانە اقپارات مينيسترلىگىنىڭ «جىل جاڭالىعى»، ودان كەيىن قاتارىنان ەكى جىل «ۇزدىك باسىلىم» نوميناتسيالارىمەن ماراپاتتالدى. بۇگىن سول باسىلىم جاڭا تۇرپاتتاعى پورتال رەتىندە ەلىمىزدىڭ اقپارات كەڭىستىگىندەگى تانىمال، بىلىكتى دە بەدەلدى باسىلىمعا اينالدى.

سەرىكبەك جانبولات - تاريحي-تانىمدىق دەرەكتى فيلمدەر ءتۇسىرۋ باعىتىندا دا ۇلكەن ەڭبەك ەتىپ كەلە جاتقان جۋرناليست. ونىڭ قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆ جايلى ء«بىزدىڭ تاڭداعانىمىز ءبىرىنشىسى» دەرەكتى ءفيلمى كورەرمەندەر مەن ماماندار تاراپىنان لايىقتى باعاسىن الدى. جاس مەملەكەتىمىزدىڭ العاشقى قادامدارى مەن ونىڭ كەمەلدەنۋ جولىنداعى ەلباسىنىڭ زور ەڭبەكتەرىن پاش ەتەتىن فيلم قازاقستان ۇلتتىق ارناسىنىڭ ەفيرىنەن بىرنەشە مارتە كورسەتىلدى. سەرىكبەك جانبولاتتىڭ اقيقاتقا جول اشقان شاكارىم جايلى «مەن جاۋ ەمەسپىن»، «مۇقاعاليدىڭ شىندىعى»، «قازاقتىڭ قارا بالاسى» اتتى دەرەكتى فيلدەرى ءوز تاريحىمىزدى تانۋعا سۇبەلى ۇلەس قوسقان سالماقتى تۋىندىلاردىڭ قاتارىنا قوسىلدى.

سول سياقتى سەرىكبەك جانبولات «شىعىسىم مەنىڭ!»، «سەمەيىم ەركەم»، «شىڭعىستاۋ ارۋى» ءتارىزدى ەلگە كەڭ تاراعان بىرنەشە اندەردىڭ اۆتورى.

بەلگىلى تەلەجۋرناليست، «ايقىن» جانە «الاش ايناسى» گازەتتەرىنىڭ نەگىزىن قالاۋشىلاردىڭ ءبىرى، دەرەكتى كينوشى، سازگەر، بىلىكتى ۇيىمداستىرۋشى سەرىكبەك جانبولات قازاقستان رەسپۋبليكاسى پرەزيدەنتى سىيلىعىنىڭ لاۋرەاتى جانە پرەزيدەنت العىس حاتىنىڭ ەكى مارتە يەگەرى. قازاق جۋرناليستيكا سالاسىنا سىڭىرگەن ەڭبەگى ءۇشىن «مادەنيەت قايراتكەرى» توسبەلگىسى تابىس ەتىلدى. قازاقستان جۋرناليستەر اكادەمياسىنىڭ اكادەميگى.