قازاق حاندىعىنىڭ 550 جىلدىعىنىڭ رەسمي لوگوتيپى – قازاق حاندىعىنىڭ 550 جىلدىعىنا دەگەن كوڭىل، كوزقاراسىمىزدىڭ دەڭگەيى.

بىرىنشىدەن، مىنا ەنتاڭباعا قاراپ وتىرىپ، وسى لوگوتيپتى بەكىتكەن، بەكىتتىرگەن ءبىزدىڭ بيلىكتىڭ، يدەولوگيانىڭ تىزگىنىن ۇستاعان شەنەۋنىكتەردىڭ تاريحي جادى مەن ساناسىنىڭ جايداقتىعىن، مەملەكەت، ۇلت تاريحىنان ماقۇرىم ەكەندىگىن، «قازاق» اتاۋلىعا قيامپۇرىس، مارعاۋ، قىرىن قارايتىنىن تاعى دا مويىنداۋعا تۋرا كەلەدى.

ەكىنشىدەن، مىنا ەنتاڭباعا قاراپ وتىرىپ، ەرىكسىز وسىنى مەملەكەتتىك مەيرامنىڭ ەنتاڭباسى قىلىپ وتىرعان ادامداردىڭ شىعارماشىلىق، سۋرەتكەرلىك، كوركەمدىك ورەسىنە كۇمانمەن قاراۋعا تۋرا كەلەدى.

ۇشىنشىدەن، حاندىقتىڭ تويىنداعى رەسمي ءىس-شارالاردا مىنا ەنتاڭباعا قاراپ وتىرىپ، وتىرىك ەلجىرەپ-ەمىرەنۋگە، كۇشەنىپ وتانشىل، مەملەكەتشىل بولۋعا، ىشقىنىپ حالىقتى بىرلىككە شاقىرۋعا تۋرا كەلەدى.

تورتىنشىدەن، مىنا ەنتاڭبانى تەلەديدار مەن گازەتتەردىڭ باتتيتىپ ماڭدايىنا جاپسىرىپ، كولگىرسىپ كولدەي-كولدەي باياندامالار جازۋعا، ماردىمسىپ نەشە ءتۇرلى ماقالالار مەن رەپورتاجدار جاساۋعا تۋرا كەلەدى.

بەسىنشىدەن جانە ەڭ قيىنى، مىنا ەنتاڭباعا قاراپ وتىرىپ، قازاقتىڭ كوك بايراعىنىڭ اۆتورى، سۋرەتشى، مارقۇم شاكەن نيازبەكوۆ اعامىزدىڭ ارۋاعىنىڭ الدىندا پلاگياتشىلاردىڭ كوپە-كورنەۋ قياناتى ءۇشىن كەشىرىم سۇراۋعا تۋرا كەلەدى.

وسى ءسوزىم تۋرا كەلمەسە، ايتارسىزدار...

Abai.kz