«ارسەلورميتتالتەمىرتاۋ» كومپانياسىنىڭ قىسقارتىلىپ جاتقان ەڭبەكاقى ماسەلەسىنە بايلانىستى داۋ-دامايىنا كەشە عانا نۇكتە قويىلدى. وبلىس پروكۋراتۋراسىنىڭ دا، مەملەكەتتىك ەڭبەك ينسپەكتسياسىنىڭ دا ەسكەرتپە-ۇيعارىمدارىن قۇلاعىنا قىستىرماعان الپاۋىت كاسىپورىن باسشىلىعىن وبلىس اكىمدىگى «قايىرىپ» اكەلىپ، جونگە سالعانداي بولدى. وسىلاي ايتۋعا بولسا، ارينە.

ال دالىرەگى – قاراعاندى وبلىسىنىڭ اكىمدىگى مەن «ارسەلورميتتالتەمىرتاۋ» كومپانياسىنىڭ باسشىلىعى، سونىمەن بىرگە اتالمىش كاسىپورىن كاسىپوداعى اراسىندا ءۇش جاقتى مەموراندۋمعا قول قويىلدى. كەشە عانا. قول جەتكىزىلىپ وتىرعان كەلىسسوزدەر ناتيجەسىنە كوز جۇگىرتەتىن بولساق، «امت» (ارسەلورميتتالتەمىرتاۋ) العاشقى رايىنان قايتتى. ياعني، كاسىپورىن قىزمەتكەرلەرى مەن جۇمىسشىلارىنىڭ ەڭبەكاقىلارى وسى ايدىڭ ون جەتىسىنە دەيىن تولىقتاي تولەنەتىن بولدى. قاڭتار ايى بويىنشا دا، ودان كەيىن دە. بىرنەشە كۇننەن بەرى پروكۋراتۋرانى دا، باسقانى دا تىڭداماي، ويعا العان ءوز مەجەسىنە قاراي «توتەسىنەن» تارتىپ كەلە جاتقان الپاۋىت «امت»-نى وبلىس اكىمدىگى قالاي «سىندىردى» - اياق استىنان؟ بۇل – جۇمباق. بۇل جاعى ازىرگە بەيمالىم. بەلگىلىسى – وبلىس اكىمى ابدىبەكوۆ مىرزانىڭ «وسى ماسەلەگە بايلانىستى ەل ۇكىمەتى ۇلكە-ە-ە-ن... جۇمىس اتقاردى» دەگەن ءبىر اۋىز ءسوزى عانا. ول قانداي جۇمىس – جانە ءبايمالىم. بۇل تۋراسىندا ءلام-ميم دەگەن تاعى ەشكىم جوق. «ABAI.KZ»-ءنىڭ «وتكەن جۇما كۇنى عانا اقشامىز جوق دەپ مالىمدەمە جاساپ ەدىڭىزدەر، اياق استىنان اقشالارىڭىز قايدان پايدا بولا قالدى؟» دەگەن سۇراعىنا كومپانيانىڭ ەڭبەك رەسۋرستارى جانە ەڭبەك قاتىناستارى جونىندەگى ديرەكتورى دميتري پاۆلوۆ مىرزا: «اقشا ءتۇسىپ جاتىر عوي، - دەپ كەلتە جاۋاپ قايتاردى، - ويتكەنى، ونىمدەرىمىزدىڭ ساتىلىمى ءجۇرىپ جاتىر. راس، ايدىڭ باسىندا جاعدايىمىز جاقسى ەمەس ەدى، ال قازىر ەسەپتەپ وتىرساق، وسى ايدىڭ ون جەتىسىنە دەيىن ءونىم ساتىلىمىنان تۇسەتىن اقشا ەڭبەكاقىنى ءجۇز پايىز تولىق بەرۋگە جەتەدى ەكەن...»

مىنە، قاراعاندىلىق تەمىرشىلەر مەن كومىرشىلەردىڭ ىرىڭ-جىرىڭى ازىرگە وسىلايشا وڭتايلانىپ قالدى. بىراق كوكەيىمىزدە كولبەڭدەپ... ءبىر سۇراق ءبارىبىر قالىپ قويدى. ول سۇراق – «مەموراندۋم ءماتىنى نەگە بۇقارالىق اقپارات قۇرالدارىنىڭ وكىلدەرىنە تولىقتاي تانىستىرىلمادى جانە اكىم ابدىبەكوۆ ايتقان «ۇكىمەت اتقارعان ۇلكە-ە-ە-ن جۇمىس... قانداي جۇمىس سوندا؟» جاسىراتىنى جوق، ۇندىلىك ماگناتتاردى اياق استىنان «سىلق ەتكىزىپ سىندىرۋ» ءۇشىن ۇكىمەت دەڭگەيىندە قانداي دا بولسىن ءبىر ارەكەتتەر جاسالعان بولسا كەرەك، ويتكەنى، مەموراندۋم ءماتىنى «امت»-نىڭ لوندونداعى باس كەڭسەسىنە، باس كەڭسەدەگى ميللياردەر ميتتال مىرزانىڭ «جان-جاقتى» تانىسۋىنا بەكەر جىبەرىلگەن جوق. البەتتە، ميتتال مىرزادان ماقۇلداۋ كەلگەن سوڭ بارىپ وبلىس اكىمدىگىندە ءۇش جاقتى مەموراندۋمعا قول قويىلدى. بىزگە دە، ءبىزدىڭ باسقا دا ارىپتەستەرىمىزگە دە، ارينە، مەموراندۋم ءماتىنى «اسىعىسپىز» دەگەن سىلتاۋمەن ادەيى تانىستىرىلماعان بولسا كەرەك. مەموراندۋمداعى ماتىندە مۇمكىن... ميتتال مىرزاعا قوسىمشا جەڭىلدىكتەر ۋادە ەتىلگەن شىعار، كىم ءبىلىپتى؟ ءبىز بۇل جاعىن بىلە المادىق. بۇل جاعىن ءبىلۋ ازىرگە مۇمكىن دە بولماي تۇر. اشىعىن ايتۋ كەرەك...

مارات ماداليموۆ. 

اباي.kz