حالىق قاجەتىنە جاراتۋ ءۇشىن بانكتەردەن نەسيە الادى. بىراق نەسيەنى وسىمىمەن قايتارادى. بىزدەگى قالىپتاسقان جىلدىق ءوسىم 18 پايىزدان كەم ەمەس. دەمەك، ءبىر ميلليون الساڭىز، 180 مىڭ تەڭگە ۇستەمەمەن قايتاراسىز. دامىعان، ەكونوميكالىق قۋاتى ارتقان ەلدەردە بۇل ءوسىم الدەقايدا تومەن، ەڭ كوبىنىكى 10 پايىزدان اسپايدى. ال ءبىزدىڭ وڭاي تابىسقا داندەپ العان كوممەرتسيالىق بانكتەرىمىز ەڭ از دەگەندە 16 پايىزدان تومەن ءتۇسىپ كورگەن ەمەس. ءجا، حالىق ونىمەن دە كەلىسكەن.

«دانىككەننەن قۇنىققان جامان» دەگەن ءسوز بار، سول ايتپاقشى، اسپانداتقان وسىمگە قۇنىعىپ العان بانكتەر اڭقاۋ حالىقتان تاعى ءبىر ءوسىم الاتىن كورىنەدى. «ۇيالماعان بۇيىرماعاندى الادى» دەمەكشى، ۇياتتى مۇلدە جيىپ قويعان ولار وزدەرىنىڭ كليەنتتەرىنەن «قارىزدىق (سسۋدالىق) ەسەپشوتتى» جۇرگىزگەنى ءۇشىن دە اقى الادى ەكەن. ونى ءماجىلىس دەپۋتاتى ايقىن قوڭىروۆ پالاتانىڭ جالپى وتىرىسىندا جاريا ەتتى. دەپۋتاتتىڭ ايتۋىنا قاراعاندا كليەنتتەرىنىڭ زاڭدى جاقسى بىلمەيتىندىگىن پايدالاناتىن بەتسىز بانكتەر نەسيە بەرۋ تۋرالى كەلىسىم-شارتقا وسىنداي تالاپتى دا ەنگىزىپ جىبەرەتىن كورىنەدى. اقشا قولىنا تيگەنىنە ءماز بولاتىن كليەنت ۇزاق-سونار كەلىسىم-شارتتىڭ بارلىق باپتارىن وقيدى دەيسىز بە، قولىن قويا سالادى. سونى پايدالانعان ارامزالار ونىڭ موينىنا قىزمەتكەرىنە ءوزى تولەۋگە ءتيىستى شىعىندى دا ارتا سالىپتى. تەك كەيبىر كوزى اشىق كليەنتتەر عانا مۇنداي ارتىق شىعىندى سوت ارقىلى قايتادان ءوندىرىپ الاتىن كورىنەدى، ال نەگىزگى حالىق ونى ماڭداي تەرى سورعالاپ تولەپ جاتىر. دەپۋتات كەلىسىم-شارتقا مۇنداي ارتىق تولەمدى ەنگىزبەۋ تۋرالى ۇلتتىق بانكتىڭ ارناۋلى ەسكەرتۋى بار ەكەنىن دە ايتتى. الايدا ونى ورىنداپ جاتقان بانكتەر شامالى، ءبارى دە اۋادان اقشا جاساۋعا ابدەن قۇنىعىپ العان. ايقىن قوڭىروۆ وسىنى ايتا وتىرىپ، ۇلتتىق بانكتىڭ وسى ماسەلەنى تەكسەرۋىن تالاپ ەتتى.  

سەرىك ەلەۋ،

ساراپشى.

اباي.kz