توقسان ەكى جاسقا قاراعان شاعىندا كورنەكتى رەجيسسەر، ۇلت انيماتسياسىنىڭ اتاسى امەن قايداروۆ دۇنيە سالدى.

امەن اقساقال 1923 جىلى قاراعاندى وڭىرىندە دۇنيەگە كەلگەن. الماتىداعى سۋرەتشىلەر ۋچيليششەسىن ءبىتىرىپ، 1958-1965 جىلدارى ماسكەۋدەگى مەملەكەتتىك كينەماتوگرافيا ينستيتۋتىنىڭ كوركەمسۋرەت فاكۋلتەتىن تامامداعان العاشقى قازاقتىڭ ءبىرى. 1965 جىلى «كازاقفيلم» كينوستۋدياسىنا رەجيسسەر بولىپ كەلىپ، ءومىرىنىڭ سوڭىنا دەيىن وتاندىق مۋلتيپليكاتسيالىق جانردىڭ دامۋىنا ۇلەس قوستى.

امەن قايداروۆقا ءوز ءىسىنىڭ شەبەرى رەتىندە وشپەس داڭق اكەلگەن قازاقتىڭ العاشقى ءمۋلتفيلمى – «قارلىعاشتىڭ قۇيرىعى نەگە ايىر؟» اتتى ەرتەگى بولاتىن. بالا تانىمىنا ساي ءساتتى شىققان ونەر تۋىندىسى ۇلتتىق انيماتسيالىق فيلمدەردىڭ كوشباسشىسى بولىپ قانا قويماي، مەملەكەت ابىرويىن اسقاقتاتقان شارا بولدى. سول كەزدەگى «كازاقفيلم» كينوستۋدياسىنا باسشىلىق ەتكەن كامال سمايلوۆتىڭ تىكەلەي قولداۋىمەن 1967 جىلى جارىققا شىققان «قارلىعاشتىڭ قۇيرىعى نەگە ايىر؟» ءمۋلتفيلمى الەمنىڭ 48 ەلىندە كورەرمەنگە ۇسىنىلىپ، لەنينگرادتا وتكەن ءىىى بۇكىلوداقتىق كينوفەستيۆالدە باس جۇلدەنى، ال، 1975 جىلى نيۋ-يورك قالاسىندا وتكەن حالىقارالىق مۋلتفيلمدەر فەستيۆالىندە قولا جۇلدەنى يەلەنگەن بولاتىن.

اباي.kz پورتالىنىڭ ۇجىمى ابىز اقساقال امەن قايداروۆتىڭ قازاسىنا بايلانىستى، مارقۇمنىڭ وتباسى مەن تۋعان-تۋىستارىنا قايعىرىپ كوڭىل ايتادى.