اۋىلداعى شوپىر دوسىم زۆوندايدى. كۇزدە، تاۋ جاققا ۋاقىتشا كوشكەنىن، ءۇش-ءتورت ايدان بەرى جاڭالىقتان قۇر قالعانىن جەتكىزىپ جاتىر. سوسىن، مىلجىڭ سۇراقتارى باستالدى.

- ءاي، پالەنشە. قازاق مەملەكەتىنىڭ 550 جىلدىعىنا دايىندىق قالاي؟
- مەملەكەتىمىز حاندىققا اۋىسىپ كەتكەن جوق پا؟
تەلەفوننىڭ ار جاعىنداعى دوسىم قاقالىپ قالا جازدادى.
- ويباي نە، نە دەيدى؟ راس بولىپ شىقتى ما؟
- جامان ويلاما. قازاق مەملەكەتىنىڭ ەمەس، قازاق حاندىعىنىڭ 550 جىلدىعىن تويلايتىن بولدىق.
- كۇزدە باسقاشا ايتىپ ەدىك قوي.
- قازىر قىس ەمەس پە؟
- سولاي ەكەن-اۋ... ايتپاقشى، 550 جىلدىققا ارناپ، 20 سەريالى تاريحي فيلم تۇسىرەتىن ەدى...
- 20 سەريانىڭ جارتىسى عانا تۇسىرىلەتىن بولدى.
- سوندا، قازاق حاندىعىنا 275 جىل تولاتىن بولدى ما؟
دوسىمنىڭ ءوستىپ كۇيدىرەتىنى بار. اشۋلانىپ كەتە جازدادىم.
- ءاي، قايداعى 275 جىل؟ مەن ساعان 550 جىل دەگەن جوقپىن با؟
- قايدان بىلەيىن، ءۇش اي ىشىندە مەملەكەتتىگىمىز حاندىققا اينالىپ، تاريحي سەريالار ەكى ەسە ازايىپتى. تاريح تا ەكى ەسە كەمىگەن بولار.
- تاريح ەمەس، مۇناي باعاسىنا بايلانىستى بيۋدجەت قىسقاردى.
- سولاي دەمەيسىڭ بە؟ تاعى نە قىسقارادى؟
- يت ءبىلىپ پە؟ ءبارىن ۇنەمدەۋگە كىرىستىك.
- ە، اقشا جەتپەسە اناۋ سەناتتى قىسقارتا سالماي ما؟ ماجىلىستەگى دەپۋتاتتار سانىن دا 25 ادامعا ازايتا سالسىن.
- نەگە دەپۋتات سانى 25 بولۋ كەرەك؟
- ءبىر كلاستا (سىنىپتا) 25 وقۋشى عانا وتىرماي ما؟ ءبارى بىردەي قول كوتەرسە، ولاردىڭ سانىن كوبەيتىپ نە كەرەك؟

شوپىر دوسىما قاتتى اشۋلانىپ، تۇتقانى قويا سالدىم. 
ساياسي ساۋاتى جوق، جۇرتقا اقىل ايتقىسى كەلەدى. "ساباكى" دەسە...