جۇما, 22 قاراشا 2019
الاشوردا 3198 4 پىكىر 30 ناۋرىز, 2017 ساعات 09:22

قازاقستاندا ۇلكەن تەررور قۇرباندارىن ەسكە الۋدى ۇسىندى

"نۇر وتان" پارتياسىنىڭ دەپۋتاتتىق فراكتسياسىنىڭ مۇشەلەرى ستالين داۋىرىندەگى جاپپاي قۋعىن-سۇرگىن قۇرباندارىن ەسكە الۋدى ۇسىندى. فراكتسيا مۇشەلەرىنىڭ ۇكىمەتكە جولداعان ۇندەۋىن ءماجىلىس دەپۋتاتى كارىباي مۇسىرمان وقىپ بەردى.

مۇسىرماننىڭ ايتۋىنشا، دەپۋتاتتىق ساۋالدا 1937 جىلعى قۋعىن-سۇرگىنگە 80 جىل تولۋ داتاسىن اتاپ ءوتۋ قاجەتتىگى ايتىلعان. ستاليندىك رەپرەسسيا تاريحقا ۇلكەن تەررور دەگەن اتپەن ەندى.

"وسى رەپرەسسيالار سالدارىنان كوپتەگەن ساياسي قايراتكەرلەر مەن ينتەلليگەنتسيا وكىلدەرى "حالىق جاۋى" اتانىپ، اتىلدى نەمەسە ۇزاق جىلدارعا سوتتالدى", - دەدى دەپۋتات.

تاريحشىلاردىڭ مالىمەتى بويىنشا، ستاليندىك رەپرەسسيا جىلدارىندا قازاقستاندا كەم دەگەندە 22 مىڭ ادام اتىلىپ كەتكەن.

دەپۋتاتتار عىلىمي-تاجىريبەلىك كونفەرەنتسيا ۇيىمداستىرىپ، ءبىلىم بەرۋ مەكەمەلەرىندە اشىق ساباق وتكىزۋدى، كورمەلەر اشىپ، دەرەكتى فيلمدەر جانە تەاترلاندىرىلعان قويىلىمدار كورسەتۋدى ۇسىندى.

اباي-اقپارات

4 پىكىر