دۇيسەنبى, 14 قازان 2019
دەپ جاتىر 2877 0 پىكىر 30 ناۋرىز, 2017 ساعات 14:04

«حابار» ارناسى «Mەن ءانشىمىن» جوباسىن كورسەتەدى

قازاق جۇرتى ديماش قۇدايبەرگەنوۆتىڭ قىتايدىڭ «حۋنان تۆ» تەلەارناسىنداعى «مەن ءانشىمىن» (Singer 2017) بايقاۋىنا قاتىسىپ جاتقانىنان حاباردار. ۇزدىك ءانشىنى انىقتايتىن مۋزىكالىق دودا ەڭ العاش 2013 جىلى ەفيرگە شىققان. وسى جىلى بەسىنشى رەت ۇيىمداستىرىلۋدا. شوۋ اسپان استى ەلىنەن وزگە، كانادا، مالايزيا، سينگاپۋر، تايلاند جانە ەۋروپا مەملەكەتتەرىنە تارايدى. ال، 1-ساۋىردەن باستاپ قازاق ەلىندە دە كورسەتىلمەك.

بۇل جونىندە «حابار» تەلەارناسىنىڭ باس پروديۋسەرى ايدوس تۇرىسبەك مالىمدەدى. - بۇعان دەيىن ءبىز ديماشتىڭ حالىقارالىق بايقاۋداعى ونەرىن عالامتوردان ۇزىك-ۇزىك قانا كورسەك، ەندى سايىستىڭ تولىق نۇسقاسىن كورسەتۋ مۇمكىندىگى تۋىپ وتىر. مۋزىكالىق شوۋدىڭ اتموسفەراسىن، ونداعى كوڭىل-كۇي، وزگە انشىلەردىڭ بابىن، ساحنا سىرتىنداعى باسەكە – مۇنىڭ بارلىعىن «مەن ءانشىمىن» جوباسىنان تاماشالاي الاسىزدار. 22 ءساۋىر سوڭعى سايىس كۇنى. فينالدىڭ ءوزى ەكى كەزەڭنەن تۇرادى. العاشقىسىندا ديماش جەكە ورىنداسا، ەكىنشى كەزەڭدە دۋەتتە ءان ايتادى. ءانشىنىڭ جانكۇيەرلەرى ءۇشىن وسى سۇراق قىزىق بولىپ تۇر. ديماش ءبىر ساحنادا كىممەن ءان ايتۋى مۇمكىن؟ مۇنى ءدال سول كۇنى «حابار» ارناسىنان كورە الاسىزدار» - دەدى ول.

ەستەرىڭىزدە بولسا ديماش قۇدايبەرگەنوۆ العاش رەت 21 قاڭتار كۇنى فرانتسۋزدىڭ «SOS d'un terrien en détresse» انىن شىرقاپ، قىتايلىق سىنشىلار تاراپىنان جوعارى باعالاندى. كەيبىر قىتاي باسىلىمدارى ونى «ءتاڭىر ءوزى نازارىنا العان جاس ءانشى» دەپ باعالاعان ەدى. تالانتتى ونەرپاز ميللياردتاعان كورەرمەننىڭ الدىندا قىتاي، ورىس، اعىلشىن تىلدەرىندە، ال ەڭ باستىسى قازاق تىلىندە ءان سالىپ ۇلگەردى.

جاس دارىننىڭ جەتىستىكتەرىنەن كەيىن اسپان استى ەلىنىڭ قازاقستانعا قىزىعۋشىلىعى ارتا ءتۇستى. ءبىزدىڭ مۋزىكالىق اسپاپتارىمىزعا، تىلىمىزگە، ءتىپتى قانداي تاعام جەيتىنىمىز كورشىلەرگە تاڭسىق بولىپ تۇر.

- ديماشتىڭ جانكۇيەرلەرى كۇننەن-كۇنگە تاڭقالدىرۋلارىن قويمايدى. راسىمەن، ماقتانعا سالىنبايىقشى دەپ، كوپ توسىن سىيلاردى جاريالاي بەرمەيمىز. بىراق، بۇگىنگىسى ەرەكشە! قىتاي فاناتتارى ارنايى قازاقستاندى زەرتتەپ، ۆيزا اشىپ، ەلىمىزگە بارىپتى. ديماشتىڭ قارنى اشىپ قالماسىن دەپ، قازاق ۇلتتىق تاعامدارىن دايىنداپ، بۇگىنگى تۇسكى استا ءبىزدى تاڭقالدىردى. قازى-قارتا، تارى-تالقان، قۇرت-ماي، جەمىس-جيدەك ءبارى بار! جىراقتا جۇرگەن جان ءۇشىن بۇل تاعامداردىڭ ورنى ەرەكشە ەكەنى ءسوزسىز! قوراپ-قوراپ سىيلىق. ءالى اشىپ تا ۇلگەرمەي جاتىرمىز! بارلىعى انشىسىنە دەگەن نيەتى عوي جانكۇيەرلەردىڭ» - دەپ جازعان ەدى ديماشتىڭ PR- مەنەدجەرى الپامىس شاريموۆ ءوزىنىڭ ينستاگرام الەۋمەتتىك جەلىسىندەگى جەكە پاراقشاسىندا.

كىل مىقتىلار جينالعان ساحنادا شىن تالانتتى انىقتاۋ كيىننىڭ قيىنى-اق. سەبەبى ديماشتىڭ PR-مەنەدجەرى ايتىپ كەتكەندەي بۇل سايىسقا قاتىسۋشىلاردىڭ ارقايسى بىرنەشە دودالاردا باق سىناپ، بيىكتەردى باعىندىرىپ ۇلگەرگەن، ءوز ەلدەرىندە تانىمال جۇلدىزدار. بايقاۋدا قىتاي ازاماتتارىنان وزگە وڭتۇستىك كورەيا، مالايزيا، سينگاپۋر جانە قازاقستاننان كەلگەن انشىلەر قاتىسۋدا. جەرلەسىمىز ورتالىق ازيادان قاتىسقان العاشقى ونەرپاز.

قازىرگى ۋاقىتتا ديماش ون كەزەڭنەن سۇرىنبەي ءوتىپ، فينالعا جولداما الدى. ەندى ءانشى ءساۋىر ايىندا يتاليانىڭ ەڭ ايگىلى ءانشى ءھام اكتەرى ادريانو چەلەنتانونىڭ «Confessa» ءانىن ورىندايدى دەپ كۇتىلۋدە.

سونىمەن، 1-ساۋىردەن باستاپ ءار سەنبى سايىن «حابار» ارناسىنان «مەن ءانشىمىن» جوباسىن تاماشالاڭىزدار!

Abai.kz

0 پىكىر