قىرعىز رەسپۋبليكاسى جوعارعى كەڭەسىنىڭ دەپۋتاتى قانىبەك يماناليەۆ قىرعىز ءالىپبيىن لاتىنعا كوشىرۋ كەرەك دەگەن ۇسىنىس ايتىپتى.

جاقىندا قازاقستان پرەزيدەنتى نۇرسۇلتان نازارباەۆ "بولاشاققا باعدار: رۋحاني جاڭعىرۋ" اتتى ماقالاسىندا "2025 جىلعا دەيىن قازاق ءالىپبيىن لاتىنعا كوشىرۋ" كەرەك دەدى.

ادەتىنشە، بوتەن ەلدىڭ ىشكى ىسىنە ارالاسىپ، بۇلىك سالماسا، باسى اۋىرىپ، بالتىرى سىزدايتىن رەسەي ءباسپاسوزى  نازارباەۆتىڭ ماقالاسىنا قاتىستى سىن ايتۋعا بىلەك سىبانا كىرىسىپ كەتتى.

ولارعا قوسىلىپ، "ورىس الەمىنەن"اداسىپ قالامىن"  دەگەن سميرنوۆا دەيتىن دەپۋتات جىلاپ-سىقتادى. مەيلى، شارباعىمىزعا تاس لاقتىراتىن كورشىمىزدىڭ بۇل قىلىعىن بۇرىن دا كورگەنبىز.

ەندى جاقىندا، الاتاۋدىڭ ارعى بەتىندەگى قىرعىز باۋىرلار (دەپۋتاتتارى) پرەزيدەنت نازارباەۆتىڭ باستاماسىن قولداپ، كيريليتساداعى قىرعىز ءالىپبيىن لاتىنعا اۋىستىرۋ كەرەكتىگىن ايتىپتى.

"تۇركىمەنستان، وزبەكستان كوشتى. ەندى مىنە قازاقستان دا لاتىنعا اۋىسىپ جاتىر. بىلەمىن، قازىر ءبىزدىڭ بيۋدجەتىمىزدە بۇعان اقشا جوق. بىراق، 2030-2040 جىلدارى مۇنى جۇزەگە اسىرۋعا ابدەن بولادى عوي", - دەيدى دەپۋتات قانىبەك يماناليەۆ.

قىرعىزدىڭ وپپوزيتسيالىق "اتا-مەكەن" پارتياسىنىڭ وكىلى بيىلدان باستاپ لاتىن ءتىلى ماماندارىن ازىرلەي بەرۋ كەرەكتىگىن ايتقان.

"كيريليتسادان باس تارتۋ - ۇلتتىڭ بىرتەكتىلىكتى ساقتاپ قالۋدىڭ جولى", - دەيدى قانىبەك بايكە.

1991 جىلدان بەرى قىرعىز جۇرتىنىڭ  لاتىنعا اۋىسپاق بولعان بىرنەشە تالپىنىسىن بىلەمىز. اۋەلى قازىر رەسەيدە بوسىپ جۇرگەن ەكس-پرەزيدەنت اسقار اقاەۆ قولدامادى.

سودان كەيىن، 2008 جىلى باسشى باكيەۆتىڭ بيلىگى تۇسىندا قىرعىز رەسپۋبليكاسىنىڭ ءبىلىم ءمينيسترى لاتىنعا كوشۋ ۇسىنىسىن كەرى قايتارعان.

ەندى پرەزيدەنت نازارباەۆتىڭ باستاماسىن ءىلىپ اكەتۋ ءۇشىن جوعارعى كەڭەس دەپۋتاتى قانىبەك يماناليەۆ ۇسىنىس ايتتى. اراگىدىك ماسكەۋگە بارعىشتاپ تۇراتىن، ءتىپتى ورىس پەن قىرعىزدىڭ گيمنىن شاتاستىرىپ الىپ جۇرگەن المازبەك اتامباەۆ دەپۋتات يماناليەۆتىڭ ۇسىنىسىنا نە جاۋاپ ايتادى؟ اتامباەۆ مىرزا كىمدى قولدايدى؟ تۇركى جۇرتىنا ءجىتى تانىس لاتىنعا اۋىسۋدى باستاپ كەتكەن نازارباەۆتى ما، الدە سولتۇستىك كورەيا مەن سيريانىڭ اۆتوريتار باسشىلارىن اشىق قولدايتىن كرەمل قوجايىنى ءپۋتيندى مە؟

نۇرزات توعجان

Abai.kz