قازاقستان رەسپۋبليكاسىنىڭ

تۇڭعىش پرەزيدەنتى،

ەلباسى ن.ءا.نازارباەۆقا

اسا مارتەبەلى نۇرسۇلتان ءابىشۇلى!

ءبىز، قازاقستاننىڭ ءبىر توپ شىعارماشىل جاستارى ءسىزدىڭ «بولاشاققا باعدار: رۋحاني جاڭعىرۋ» اتتى جولداۋىڭىزدىڭ ماقساتتارى مەن ۇستانىمدارىنا قولداۋ بىلدىرەمىز.

بۇگىنگى جاستار اراسىندا سالاۋاتتى ءومىر سالتى مەن ءبىلىمدى بولۋ ۇلگىگە اينالىپ، ولار جاڭا كاسىپ يگەرىپ، اعىلشىن ءتىلىن مەڭگەرۋگە بار كۇش-جىگەرىن جۇمساپ ءجۇر. الەمدىك ەكونوميكالىق، عىلىمي كەڭىستىككە ەنۋىمىزدىڭ العىشارتى ءالىپبيىمىزدىڭ لاتىن قارپىنە اۋىسۋ بولعاندىقتان، ءبىز ءسىز باستاعان لاتىنداندىرۋ جوباسىن قولدايمىز.

ءسىز بەلگىلەگەن «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «قازاقستاننىڭ قاسيەتتى رۋحاني قۇندىلىقتارى» «مادەني-گەوگرافيالىق بەلدەۋ» باعدارلامالارى ارقىلى ءاربىر جاس ازامات وڭىرلەردەگى تاريحي، مادەني، رۋحاني ورىنداردى ارالاۋ ارقىلى ۇلتتىق تانىمى كەڭەيەدى جانە ۇلتتىق قۇندىلىقتارىن ماقتان ەتە الادى. بۇل – وتاندىق برەندتىڭ قالىپتاسۋىنا ۇلكەن ۇلەس قوساتىن جوبا دەپ ويلايمىز.

ءسىز مەجەلەگەن XXI عاسىردىڭ الەمدىك كارتاسىندا ەشكىمگە ۇقسامايتىن، دەربەس ورنى بار ۇلت بولۋىمىز ءۇشىن «جاھانداعى زاماناۋي قازاقستاندىق مادەنيەت» جوباسىنا دا قولداۋ بىلدىرەمىز، ءارى سول ماقسات جولىندا ايانباي ەڭبەك ەتەمىز. جوعارىدا اتالعان جوبالاردىڭ رۋحاني، اقپاراتتىق-تانىمدىق اسپەكتىسى گۋمانيتارلىق عىلىمدارعا ارقا سۇيەيتىنى ءمالىم. سونى ەسكەرىپ، ءسىز «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» اتتى جوباسىن قۇردىڭىز. «الەمدەگى ۇزدىك 100 وقۋلىقتىڭ» قازاق تىلىندە شىعۋى، جاستاردىڭ جاڭا زامان تالابىنا ساي يكەمدەلۋىنە ىقپال ەتەدى. «سانامىزدى وزگەرتپەي، ساپامىزدى ارتتىرا المايمىز» دەگەن ءسوزىڭىز، بىزدەر تابان تىرەر قاعيدالى تۇسىنىك بولادى.

ولاي بولسا، ءسىزدىڭ سىندارلى ساياساتىڭىزعا ارقاشان قولداۋ ءبىلدىرىپ، قازاق ەلىنىڭ جالىندى جاستارىنا ارتقان سەنىمىڭىزدى اقتاۋعا ۋادە بەرەمىز.

قازاقستتانىڭ ءبىر توپ شىعارماشىل جاستارى:

امانجول التاەۆ، ايتىسكەر;

التىناي نوگەربەك، تەاتر جانە كينو ءارتىسى;

ءادىل احمەتوۆ، تەاتر جانە كينو ءارتىسى;

ديماش قۇدايبەرگەنوۆ، ءانشى;

جانار دۇعالوۆا، ءانشى:

ايگەرىم بەكەتاەۆا، بالەت ءسوليسى;

ەرلان رىسقالي، ءداستۇرلى ءانشى;

ايبەك بەكبوسىن; كۇيشى;

ايدوس ەسماعامبەتوۆ، ءمۇسىنشى;

سالتانات احمەتوۆا، وپەرا ءسوليسى.

Abai.kz