جەكسەنبى, 1 تامىز 2021
جاڭالىقتار 11515 5 پىكىر 24 ءساۋىر, 2017 ساعات 16:41

"لەنيننىڭ سۇيەگىن ەلگە اكەلۋدى 514 مىڭنان استام ادام قولدايدى"

جاقىندا قازاقستان پارلامەنتىنىڭ ەڭ ەگدە دەپۋتاتى ۆلاديسلاۆ كوسارەۆ مىرزا "كرەمل كەرەكسىز ەتكەن پرولەتايريات كوسەمى ۆلاديمير لەنينىڭ دەنەسىن قازاقستانعا الدىرتۋ كەرەك" دەگەن باستاما كوتەرگەن.

كوممۋنيست دەپۋتاتتىڭ بۇل ۇسىنىسى قوعامنىڭ قىزۋ تالقىسىنا ءتۇسىپ جاتىر. جۇرت ەتەك-جەڭىن جيىپ، مەملەكەتتىك جاڭعىرۋدىڭ جاڭا باعىتىنا بەت بۇرعاندا، كوسارەۆتىڭ كوكسەگەنى نە دەستى.

ءبىز بۇعان دەيىن ۆلاديسلاۆ بوريسۇلىنا بىرنەشە مارتە حابارلاسقان ەدىك. بيىل سەكسەنگە كەلەتىن دەپۋتاتتىڭ دەنساۋلىعى سىر بەرىپ، اۋرۋحانادا جاتقانىن ونىڭ كومەكشىلەرى ايتقان.

كوپتەن كورىنبەي كەتكەن كوممۋنيست دەپۋتات ۆلاديسلاۆ كوسارەۆ جاقىندا پارلامەنتكە قايتا كەلىپتى. ءبىز دەپۋتاتتىڭ وزىنە حابارلاسىپ، لەنين "اتانىڭ" دەنەسىن ءبىزدىڭ ەلگە الدىرتۋ تۋرالى باستاماسىنىڭ ءمان-جايىن بىلدىك.

- ۆلاديسلاۆ بوريسۇلى، ءسىز ۆلاديمير لەنيننىڭ ءمايىتىن  قازاقستانعا اكەلۋ كەرەك دەپسىز. بۇل قانداي قاجەتتىلىكتەن تۋعان باستاما؟ 

- بۇل تاقىرىپتى جابۋ كەرەك دەپ ەسەپتەيمىن. سەبەبى، رەسەي فەدەراتسياسى دۋماسىنداعى "ەدينايا روسسيا" فراكتسياسى لەنيننىڭ موۆزولەيىن بۇزىپ، دەنەسىن جەر قوينىنا تاپسىرۋ تۋرالى باستاماسىن كەرى قايتاردى. بارلىعى ءوز قالپىندا قالاتىن بولدى. دەمەك، ەندى لەنيننىڭ دەنەسىن قازاقستانعا اكەلۋدىڭ دە ەش قاجەتتىلىگى جوق.

- جالپى جۇرتتى قىزىقتىراتىن سۇراق. رەسەي لەنيننىڭ دەنەسىن قازاقستانعا بەرە قويار ما ەدى؟

- بۇل قيىن پروتسەسس. دەگەنمەن، مۇمكىن بولعان سوڭ، ءبىز باستاما كوتەردىك قوي.

- سوندا دا، ايتىڭىزشى، ءسىزدىڭ بۇل ۇسىنىسىڭىزدى قازاقستاندا كىمدەر قولدايدى؟ 

- ارينە، قولايدى. ءبىزدى قولدايتىندار كوپ.

- مىسالى...

- ءبىزدىڭ ەلەكتورات. كەمىندە جارتى ميلليوننان استام ادام بىزگە داۋىس بەردى. ءبىزدىڭ پارتياعا مۇشە بولدى. ول شامامەن 514 مىڭنان استام ادام دەگەن ءسوز. مىنە، سولار قولدايدى.

- ءسىز پارلامەنتتەگى ەڭ تاجىربيەلى دەپۋتاتتاردىڭ ءبىرىسىز. جاس جاعىنان دا، دەپۋتاتتىق مەرزىم جاعىنان دا.  سىز دەپۋتات رەتىندە قازاق تاريحىنداعى ەڭسەلى تۇلعالاردىڭ دەنەسىن، بولماسا ەڭبەكتەرىن، ءتىپتى  جادىگەرلەرىن ەلگە اكەلۋ تۋرالى باستاما كوتەردىڭىز بە؟ مىسالى، بىلتىر كەيكى باتىردىڭ باس سۇيەگىن الدىرتتىق. قازىر كەڭەسارى حاننىڭ باس سۇيەگى ورىس جەرىندە جاتىر. ءسىز كەيكى باتىردىڭ باس سۇيەگىن الدىرتۋ ىسىنە ارالاستىڭىز با؟

- شىنىمدى ايتسام، مۇنداي پروتسەسستەرگە قاتىسقان ەمەسپىن. ال كەيكى باتىردىڭ باس سۇيەگىن قازاقستانعا الدىرتۋ تۋرالى باستامانى دەپۋتاتتار ەمەس، قازاقستان قوعامىنىڭ بەلسەندى وكىلدەرى، جازۋشىلار مەن تاريحشىلار كوتەردى عوي. سوندىقتان، مەن دە، مەنىڭ ارىپتەستەرىم دە وسى تەكتەس ماسەلەلەردى كوتەردى دەپ ايتا المايمىن.

- تۇسىنىكتى، ۆلاديسلاۆ بوريسۇلى، سونىمەن ۆلاديمير لەنيننىڭ دەنەسى ماۆزولەيدە قالاتىن بولدى عوي؟..

- ءدال سولاي. دۋما ماۆزولەيدى بۇزبايتىن بولدى. لەنيننىڭ دەنەسى دە سول جەردە قالادى.

- جاقسى، ۆلاديسلاۆ جولداس. دەنساۋلىعىڭىزدى كۇتىڭىز.

- سىزدەرگە دە راقمەت!

سۇحباتتاسقان نۇرگەلدى ابدىعانيۇلى

Abai.kz

 

 

 

5 پىكىر

ۇزدىك ماتەريالدار