جاقىندا قر ءبىلىم جانە عىلىم ءمينيسترى ەرلان ساعاديەۆ مىرزانىڭ بەيرەسمي بەينە جازباسى جاريا بولدى، - دەپ حابارلايدى اباي-اقپارات.

"قازاقستان حالقىنا قايتسەم دە ءۇش ءتىلدى ۇيرەتەمىن" دەپ الا وكپە بولىپ جۇرگەن ۇكىمەت مۇشەسى ء(بىلىم ءمينيسترى) الەۋمەتتىك جەلىدە جەلپىنىپ ءان ايتىپ تۇر.

ءجاي ءان ەمەس، مينيستر مىرزا ەركىن مەڭگەرگەن اعىلشىن تىلىندەگى ءان. باتىس ءپىر تۇتاتىن ايگىلى "Queen" توبىنىڭ "Somebody to love" دەيتىن ءانى.

اكادەميك اكەنىڭ مينيستر بالاسى ەرەكەڭ، قازاق ءتىلىن  قاتىرىپ مەڭگەرمەسە دە، وزگە تىلگە ءۇيىر ەكەنىن ءاۋ باستان بىلەتىنبىز. ەندى كوزىمىز جەتتى. الەۋمەتتىك جەلىدە جۇرگەن بەينەجازبا 2016 جىلدىڭ 8-ناۋرىزى كۇنى تۇسىرىلسە كەرەك.

ءبىلىم جۇيەسىندەگى رەفورمالارى قوعامدىق ورتادا داۋ تۋدىرىپ، ءتۇرلى تالقىعا سەبەپ بولدى دەسەك تە، ەرەكەڭ ء"اۋ" دەگەندە الدىنا جان سالماتىن كورىنەدى. مىنە، مارحابات. كورىڭىز.

ايتپاقشى، ەرەكەڭ ۇكىمەتتىڭ جالعىز ءانشىسى ەمەس. بۇعان دەيىن ەكس-ەكونوميكا ءمينيسترى قۋاندىق بيشىمباەۆتىڭ تالانتىنا كۋا بولعانبىز. ساكسافوندا ويناپ، قىز-كەلىنشەكتەردىڭ جۇرەگىن جاۋلاعان بيشىمباەۆ قاماۋعا الىنىپ، ەندىگى تاعدىرى تۇمانعا اينالدى. وكىنىشتى، ارينە.

ونەرىمەن ورگە جۇزگەن مينيسترلەر لەگىن ارينە، قر مادەنيەت جانە سپورت ءمينيسترى ارىستانبەك مۇحاماديۇلى جالعايدى. مادەنيەت ءمينيسترى بارىنەن اسىپ ءتۇسىپ، ايگىلى "The Beatles" توبىنىڭ رەپەرتۋارىنان "Yesterday" ءانىن سينتەزاتوردا وينادى.

سونداي-اق، تالانتتى مينيسترلەر كوشىندە قر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ تا بار.

قازاقستانىڭ رەسەي فەدەراتسياسىنداعى توتەنشە جانە وكىلەتتى ەلشىسى يمانعالي تاسماعانبەتوۆ تە ءان سالادى.

بۇل - قر ۇلتتىق قاۋىپسىزدىك كوميتەتىنى توراعاسى كارىم ءماسىموۆ. بۇل كىسى دە اعىلشىنشا ءان سالۋعا اۋەستەردىڭ توبىنان.

ءيا، ءيا، كىل تالانتتاردان جيىلعان بۇل توپتا "استانا ەكسپو-2017" ۇك توراعاسى احمەتجان ەسىموۆ تە بار ەكەن. اقاڭ الماتىنى باسقارىپ تۇرعان تۇستا كۇيساندىقتا ويناپ، جۇرتتى تامساندىرعان-دى.

قاراعاندى وبلىسىنىڭ ەكس-اكىمى، قازىرگى ەسەپ كوميتەتىنىڭ توراعاسى نۇرمۇحامبەت ابدىبەكوۆ ءان سالعاندا كاسىبي انشىلەردى جولدا قالدىراتىنىنا مىنا بەينە جازبا دالەل.

ءانشى اكىمدەردىڭ ساپىندا قوستاناي وبلىسىنىڭ بۇرىنعى باسشىسى نۇرالى سادۋاقاسوۆتىڭ دا بارىن بىلەمىز.

سولاي، مىنە. مينيسترلەردەن تارتىپ، اكىمدەرگە دەيىن ونەردەن قۇرالاقان ەمەس.

ايتا كەتەيىك، ەندى ءبىر-ەكى ايدا ەلوردادا وتەتىن ەكسپو-2017 حالىقارالىق كورمەسىنىڭ ۇيىمداستىرۋشىلارى شەتەلدىڭ شىتىر كويلەكتى، بادەندى بيكەشتەرىن ميلليونداعان دوللارعا الدىرتپاق كورىنەدى. ءبىر عانا رياننا دەيتىن باربادوس ءانشىسى ءبىر كانسەرتى ءۇشىن 2 ميلليون دوللار سۇراپتى. حوش.

ەكسپو-2017 - حالىقارالىق كورمە. شەتەلدىك تۋريستەر كەلەدى. ءان دە، بي دە وزىمىزدەن بولسا قۇبا-قۇپ ەمەس پە؟ ۇكىمەتتىڭ "ونەرلى جاساعىن" جوعارىدا كوردىڭىزدەر. ءاندى دە ايتادى، اسپاپتا دا وينايدى. ەڭ باستىسى بۇل ازاماتتار - تۋما تالانتتار.

بىزدىكى رياسىز تالانتتى شەنەۋنىكتەر رياننانىڭ تاساسىندا قالىپ قويماسىننىڭ قامى.

سوندىقتان دا روزا القوجانىڭ ء"ان سالشى، روزا" دەگەن ءانىنىڭ ىرعاعىمەن ء"ان سالشى، ۇكىمەت، بۇل ونەر عوي كيەلى، ءان سالشى، ۇكىمەت، ءانىڭدى ەلىڭ سۇيەدى" دەپ اۋەندەتىپ وتىرعان جايىمىز بار.

نۇرگەلدى ابدىعانيۇلى

Abai.kz