بىلتىر رەسپۋبليكا كولەمىندەگى  مۇعالىمدەردىڭ قولداۋىمەن رەسپۋبليكالىق سالالىق كاسىپوداق ءتورايىمى  امانتاەۆا مايرا تۇرعانقىزىنا  قايتا-قايتا حات جازىپ ءجۇرىپ، مۇعالىم قۇقىن قورعاي الماعان قاراساي اۋدانىنىڭ كاسىپوداق توراعاسى  ە.قويشىباەۆتى 7 اي كۇرەسىپ ورنىنان العىزعان بولاتىنبىز.  وسى جىلدىڭ 1-ناۋرىزىندا قاراساي اۋدانىنداعى المالىباق اۋىلدىق وكرۋگىنىڭ اكىمى بايبوسىنوۆا سارا كۋزورقىزى اكىمدىك جۇمىسىن تاستاپ، ءبىراۋىزدان قاراساي اۋدانىنىڭ كاسىپوداعىنىڭ  توراعاسى بولىپ سايلانىپ،  جۇمساق كرەسلوعا جايعاستى.

جاڭا كاسىپوداق توراعاسى سايلانعالى بەرى قاراساي اۋدانىندا مۇعالىم قۇقىن تاپتاۋ تىيىلار دەگەنبىز. بىراق، ولاي بولار ءتۇرى بايقالمايدى. قازىردىڭ وزىندە ۇستازدىڭ قۇقىعىن تاپتايتىن تالاي ماسەلەلەر بولىپ تا ۇلگەردى.

25-ناۋرىز كۇنى قاراساي اۋدانىنىڭ بارلىق مەكتەپتەرىنىڭ مۇعالىمدەرى جاپپاي «سەنبىلىك» اتاۋىن جامىلىپ، ورتالىق كوشەلەردى تازالاۋعا شىقتى. سول كۇنى بۇل وقيعانى Facebook الەۋمەتتىك جەلىسىنە جاريالاۋ، اكىمدەرگە قوڭىراۋ شالۋ ارقىلى مۇعالىمدەردى سەنبىلىك الاڭىنان بوساتتىق. بۇل  رەسپۋبليكالىق  «اعارتۋشى» قوعامدىق قوزعالىسىنىڭ مۇشەلەرىنىڭ تىكەلەي ەڭبەگىمەن  جانە ءبىزدى قولداعان حالىق پەن جۋرناليستەردىڭ  ارقاسىندا جاسالدى. سول كۇنى كاسىپوداق باسشىسى قايدا بولدى؟  قوقىس تەرگەن مۇعالىمدەردى كورمەدى مە، الدە كورسە دە كورمەگەندەي بولىپ كەتە بەردى مە؟ وسىعان وراي سۇراق قويىپ قاراساي اۋداندىق كاسىپوداق توراعاسى  بايبوسىنوۆا  سارا كۋزورقىزىنا حات جولداعان بولاتىنبىز. كەلگەن جاۋاپ مىناۋ:

قازاقستان رەسپۋبليكاسىنىڭ جەكە جانە زاڭدى تۇلعالاردىڭ وتىنىشتەرىن قاراۋ  ءتارتىبى   زاڭىنا سايكەس  (8 تاراۋ 2 باپ)

ءسىزدىڭ ءبىرىنشى حاتىڭىز لاۋازىمدى تۇلعالاردان اقپارات ءبىلۋدى تالاپ ەتتى. سوندىقتان  جاۋابىن بۇگىن جىبەرىپ وتىرمىز. 25.03.2017 جىلى  سەنبىلىك اۋدان باسشىسىنىڭ بۇيرىعىمەن وتكىزىلدى. سەنبىلىك – ەرىكتى قوعامدىق  شارا. ەلىمىزدىڭ ءاربىر ازاماتى قىستان كەيىن اۋلاسىن، ءوزى جۇمىس ىستەيتىن مەكەمە اۋلاسىن، ءتيىستى ۇلەسكىلەرىن تازالايدى. اۋدان باسشىسى جۇمىس كولەمى مەن كۇنىن بەلگىلەيدى.       

اۋداندىق  ءبولىم ءبولىمىنىڭ باسشىسى گ.ت.تاكيموۆامەن سۇحباتتاسۋ بارىسىندا انىقتالعانداي ەشبىر مەكتەپتە ساباق توقتاتىلىپ، وقۋ پروتسەسىنە زيا كەلتىرىلگەن جوق. سەنبىلىككە ساباعى جوق مۇعالىمدەر شىقتى.

اۋداندىق ءبىلىم بولىمىمەن قاراساي اۋداندىق كاسىپوداق ۇيىمى اراسىنداعى كەلىسىمدە كورسەتىلگەندەي، مۇعالىمدەردى ولاردىڭ تىكەلەي پەداگوگيكالىق قىزمەتىنە قاتىسى جوق جۇمىستارعا جىبەرۋگە تىيىم سالىناتىندىعىمەن  كەلىسەمىن.   قاراساي اۋداندىق كاسىپوداق ۇيىمىنىڭ ءتورايىمى رەتىندە اۋدان ۇستازدارىنىڭ زاڭسىز اۋىر جۇمىسقا جەگىلمەۋىن  باقىلاۋدا ۇستايمىن.

قۇرمەتپەن كاسىپوداق ءتورايىمى بايبوسىنوۆا س.ك

نە قولى جوق، نە ءمورى جوق اسپاننان تۇسكەندەي جاۋاپ حات ەلەكتروندى پوچتاعا  كەلدى. حاتتىڭ باسىندا اكىمدى، سەنبىلىكتى قولداپ، اياعىندا «مۇعالىمدەردى اۋىر جۇمىسقا جەگىلۋدەن قورعايمىن» دەگەنى قاي ساسقانى؟. ورتالىق كوشەلەردىڭ قوقىسىن جيناۋ اۋىر جۇمىس ەمەس پە؟

تاعى ءبىر سوزىندە «مۇعالىمدەردى ولاردىڭ تىكەلەي پەداگوگيكالىق قىزمەتىنە قاتىسى جوق جۇمىستارعا جىبەرۋگە تىيىم سالىناتىندىعىمەن  كەلىسەمىن» دەيدى. سوندا مۇعالىمدەردىڭ كوشە سىپىرۋى تىكەلەي پەداگوگيكالىق قىزمەتكە قاتىستى بولعانى ما؟   سارا حانىمعا  كاسىپوداق توراعاسىنىڭ جارعىسى مەن ءوزىنىڭ تىكەلەي ايلىق جالاقىسىن تولەپ وتىرعان مۇعالىمدەرگە قاتىستى زاڭداردى دۇرىستاپ وقىپ الۋعا كەڭەس بەرەر ەدىم.

رەسپۋبليكا كولەمىندەگى ۇستازدار بولىپ 7 اي كۇرەسكەندەگى شىندىعىمىز بەن ادىلدىگىمىز سارا كۋزورقىزىنا كرەسلو  سىيلاۋ ءۇشىن بە؟  وكىنىشتى!

وسىنىڭ بارىنە جول بەرىپ وتىرعان  وبلىستىق كاسىپوداق توراعاسى ا.وماشەۆتى ورنىنان الماي ەشتەڭە دۇرىستالمايتىن سياقتى.

ءاليا باستايقىزى

Abai.kz