ەندى قازاقستان پرەزيدەنتتىگىنە ۇمىتكەرلەر وزدەرىن-وزدەرى ۇسىنا المايدى. ءماجىلىس داۋىس بەرگەن "قازاقستانداعى كونستيتۋتسيالىق زاڭدارعا وزگەرتۋلەر ەنگىزۋ" تۋرالى زاڭ جوباسىندا بۇل جايت انىق جازىلعان.

سونىڭ ىشىندە، "سايلاۋ" تۋرالى كونستيتۋتسيالىق زاڭعا دا وزگەرتۋلەر ەنگىزىلگەن. ءسويتىپ، ەندىگى جەردە پرەزيدەنتتىك سايلاۋعا كانديداتتار وزدەرىن-وزدەرى ۇسىنا المايتىن بولدى.

سايلاۋ پروتسەسسىنە ەنگىزىلگەن بۇل وزگەرىس قانشالىقتى ءتيىمدى؟ بۇل تالاپ حالىقارالىق تالاپتارعا ساي ما؟ حالىقارالىق قوعامدىق ۇيىمدار بۇعان نە دەيدى؟ بۇل ەلدەگى ادام قۇقىعىن بۇزباي ما؟ ءبىز ساراپشىلاردىڭ پىكىرىن ءبىلۋدى ءجون كوردىك.

ۆلاديسلاۆ كوسارەۆ، ءماجىلىس دەپۋتاتى، كوممۋنيست:

-ءدال وسى نورمانى ءبىلىمى تاياز، بىلىگى جوق كەيبىرلەۋلەر وزدەرىن-وزدەرى جارنامالاۋ ءۇشىن جانە باسقا دا ماقساتتارعا پايدالانىپ كەلدى. سوندىقتان، ەندىگى جەردە پرەزيدەنتتىككە ۇمىتكەرلەردى ساياسي پارتيالار نەمەسە رەسپۋبليكالىق قوعامدىق ۇيىمدار عانا ۇسىنۋ كەرەك دەگەن ماسەلەمەن تولىق كەلىسەمىز. 

ماجىلىستەگى ەڭ ەگدە دەپۋتات ۆلاديسلاۆ باباي كوسارەۆتىڭ ايتۋىنشا، جاڭا ەرەجەلەر ساياسي پروتسەسس مادەنيەتىن ءوسىرىپ قانا قويماي، ەلدەگى ساياسي پارتيالاردىڭ قايتا ءتىرىلىپ،جۇمىسىنىڭ جاندانۋىنا سەپ بولاتىن كورىنەدى.

ەرمۇرات باپي، جۋرناليست:

-بۇل تالاپتى قازاقستانداعى ادام قۇقىعىن اشىقتان-اشىق اياققا تاپتاۋ، بۇزۋ دەپ تۇسىنەمىن. كەز-كەلگەن قازاقستان ازاماتى سايلاۋعا قاتىسىپ، ۇمىتكەر بولۋعا قۇقىلى. بۇل ءجايت كونستيتۋتسيادا دا انىق كورسەتىلگەن. اتالعان زاڭ جوباسى اتا زاڭعا قارسى جاسالعان قىلمىسپەن تەڭ، كەرەك دەسەڭىز.

ال ەندى كونستيتۋتسيانى ارى-بەرى وزگەرتىپ، وعان رەكونسترۋكتسيا جاساي بەرۋ كىمگە ءتيىمدى؟ بۇل ەندى ءوز الدىنا بولەك اڭگىمە...

ءامىرجان قوسانوۆ، ساياساتكەر:

-بۇگىن پرەزيدەنتتىككە ۇمىتكەرلەرگە ايتارلىقتاي توسقاۋىل قوياتىن زاڭ قارالدى. سونىڭ ىشىندە، بەس جىل مەملەكەتتىك قىزمەتتە بولماعاندار سايلاۋعا تۇسە المايدى ەكەن. مەنىڭشە، بيلىك وسىنداي زاڭنامالىق وزگەرىستەر ارقىلى ءوزىنىڭ پرەزيدەنت سايلاۋى قارساڭىنداعى ۇرەيى مەن قورقىنىشىن اپ-انىق تانىتىپ وتىر.

P.S. ەستەرىڭىزگە سالا كەتەيىك، وسى ۋاقىتقا دەيىن ەلىمىزدە بولعان پرەزيدەنت سايلاۋى ناۋقانىنا كورىپكەلدەر مەن بالگەرلەر دە وزدەرىنىڭ كانديداتۋراسىن قاتارىنان بىرنەشە رەت ۇسىنعان ەدى. 

ازىرلەگەن نۇرگەلدى ابدىعانيۇلى

Abai.kz