ەلورداعا ەلباسىنىڭ ەسىمىن بەرۋدى ۇسىنىپ، ەلدىڭ ەسىندە قالعان ءماجىلىس دەپۋتاتى قۋانىش سۇلتانوۆ  سوزىنەن تايماپتى. دەپۋتات استاناعا پرەزيدەنت ەسىمىنىڭ بەرىلۋى ورىندى دەپ ءجۇر. كەشە «Nur.kz» جازعان ماتەريالدا سۇلتانوۆ سولاي دەگەن ەكەن.

«كىم نە دەسە، و دەسىن، استاناعا قاتىستى ءوز پىكىرىمدە قالامىن. ويتكەنى ەل استانانىڭ تاريحىن ءبىلىپ ءجۇرۋى كەرەك»، - دەيدى 72 جاستاعى ءماجىلىس دەپۋتاتى.

ايتپاقشى، دەپۋتات قۋانىش سۇلتانوۆ قوعام قايراتكەرى امانگەلدى ايتالىنىڭ سىن سوزىنە شامدانىپ قالعان كورىنەدى. جارامساقتاندى دەگەن سىننىڭ كوڭىلىنە تيگەنىن ايتىپتى.

ەستەرىڭىزگە سالا كەتەيىك، امانگەلدى ايتالى قۋانىش سۇلتانوۆقا قاراتا «سىناۋدى بىلمەيتىن ادامداردىڭ ماقتاۋعا دا حاقىسى جوق» دەگەندى ايتقان.

«قۇلداردىڭ ماقتاعانى ەشتەڭەنى دە بىلدىرمەيدى» دەگەن وسى ەمەس پە؟ قازاقستاندىقتار نۇرسۇلتان ءابىشۇلىنىڭ ەڭبەگىنە شىن باعاسىن بەرەدى، بىراق جارامساقتاردىڭ ماقتاۋىن حالىق قابىلدامايدى. پرەزيدەنت تە قابىلداماس دەيمىن. ماقتاۋ پسيحولوگيالىق شەگىنەن شىققاندا ماداقتاعان تۇلعاعا دا جاعىمسىز پىكىر تۋدىرادى، ماقتاتىپ وتىر دەگەندەي وي قالدىرادى، اينالىپ كەلگەندە بەدەلىنە دە كولەڭكە تۇسىرەدى. وسىدان تابىنۋسىز مادەنيەت بولمايدى، ال مادەنيەتسىز تابىنۋ قاۋىپ دەگەن ءسوز شىققان»,- دەگەن بولاتىن پروفەسسور امانگەلدى ايتالى .

ال ايتقانىم ايتقان دەگەن دەپۋتات سۇلتانوۆ بۇل پىكىردىڭ وزىنە جاسالعان قيانات ەكەنىن ايتۋدا. بىراق، سول ءسوزى ءۇشىن امانگەلدى ايتالىنى سوتقا بەرمەيدى. ال كوڭىلىنە تيگەنىن جاسىرمادى.

«مەن ول امانگەلدىنىڭ پىكىرىنە ەشتەڭە دە ايتپايمىن. ايتاتىن اڭگىمەنى سول كىسىدەن سۇراڭىز. ونىڭ سوزدەرى ماعان جاسالعان ۇلكەن قيانات»، - دەيدى سۇلتانوۆ.

Abai.kz