پاۆلودار وبلىسىندا ءاربىر 100 تۇرعىنعا شاققاندا 31 تەلەفون نۇكتەسى بار ەكەن. تەلەفون تىعىزدىعىنىڭ بۇل كورسەتكىشى بويىنشا پاۆلودار وبلىسى رەسپۋبليكادا الماتى قالاسىنان كەيىن ەكىنشى ورىنعا تۇراقتاپ وتىر. بۇل تۋرالى «قازاقتەلەكوم» اق فيليالى - پاۆلودار وبلىستىق تەلەكوممۋنيكاتسيالار ديرەكتسياسىنىڭ باس ديرەكتورى اسحات كۇزەكوۆ مىرزا باق وكىلدەرىمەن وتكىزىلگەن ءباسپاسوز ءماسليحاتىندا مالىمدەدى.

پاۆلودار وبلىسىندا ءاربىر 100 تۇرعىنعا شاققاندا 31 تەلەفون نۇكتەسى بار ەكەن. تەلەفون تىعىزدىعىنىڭ بۇل كورسەتكىشى بويىنشا پاۆلودار وبلىسى رەسپۋبليكادا الماتى قالاسىنان كەيىن ەكىنشى ورىنعا تۇراقتاپ وتىر. بۇل تۋرالى «قازاقتەلەكوم» اق فيليالى - پاۆلودار وبلىستىق تەلەكوممۋنيكاتسيالار ديرەكتسياسىنىڭ باس ديرەكتورى اسحات كۇزەكوۆ مىرزا باق وكىلدەرىمەن وتكىزىلگەن ءباسپاسوز ءماسليحاتىندا مالىمدەدى.
- ءبىزدىڭ باستى ماقساتىمىز - ساپالى ءارى ۇزدىكسىز بايلانىس قىزمەتىن ۇسىنا وتىرىپ، تۇرعىنداردىڭ سەنىمىنەن شىعۋ، قاي ۋاقىتتا بولماسىن تۇتىنۋشىلارىمىزعا قولايلىلىق تۋدىرۋ. قۇرىلىمىمىز وسى ماقساتتىڭ ۇدەسىنەن تولىقتاي شىعا الىپ وتىر. سوڭعى ون جىلدا «قازاقتەلەكوم» كومپانياسى ءوز قىزمەتىن بارىنشا جاقسارتۋ، حالىقارالىق دەڭگەيگە جەتكىزۋ باعىتىندا وراسان زور جۇمىستاردى اتقاردى. قىزمەت ساپاسىن ارتتىرۋ ماسەلەسىنە ەرەكشە ماڭىز بەردى. ناتيجەسى اۋىز تولتىرىپ ايتارلىقتاي. بۇل رەتتە جوسپارلانعان بارلىق جۇمىستارعا، ءىس-شارالارعا قارجى دا از ءبولىنىپ وتىرعان جوق. ايتا كەتەرلىگى، «قازاقتەلەكوم» اق ەلىمىزدەگى كرەديتتىك رەسۋرس المايتىن، ياعني كرەديتتىڭ كومەگىنە جۇگىنبەي-اق، ءوز دامۋىن ءوزى قامتاماسىز ەتىپ، كىرىس پەن شىعىندى وزدىگىنەن اقتاپ وتىرعان بىردەن-ءبىر كومپانيا بولىپ تابىلادى. سوندىقتان دا مۇمكىندىگى مول، تولەم قابىلەتى ويداعىداي سانالاتىن ءبىزدىڭ كومپانيامەن ارىپتەستىك بايلانىس جاساۋعا بەيىلدى باسقا قۇرىلىمدار از ەمەس. ولاردىڭ ءبارى دە «قازاقتەلەكومعا» قىزىعا قارايدى، وزدەرىنىڭ تاراپىنان ءوندىرىلىپ شىعارىلاتىن بايلانىسقا قاجەتتى تەحنيكالىق قوندىرعىلاردى، بايلانىسقا قاجەتتى جابدىقتاردى جانە باسقا دا زاتتاردى ۇسىنۋعا تىرىسادى، - دەپ اتاپ كورسەتتى باس ديرەكتور ءوز سوزىندە.
تۇتاستاي ەلىمىز سەكىلدى، داعدارىستان قيىندىقسىز وتكەن «قازاقتەلەكوم» اق قازىرگى ۋاقىتتا ءوز تۇتىنۋشىلارىنا كوممۋنيكاتسيالىق قىزمەتتىڭ اسا اۋقىمدى تۇرلەرىن ۇسىنۋدى جالعاستىرىپ كەلەدى.
كەڭەستىك وداق ىدىراپ، ەلىمىز توقىراۋدى، نارىقتىق قاتىناستارعا كوشۋدى باستان وتكەرگەن كەزەڭدەردە تەلەكوممۋنيكاتسيا سالاسى دا تالاي قيىنشىلىقتى كەشتى. جۇرتشىلىق ايلار بويى جالاقىلارىن الا الماي جۇرگەن ۋاقىتتاردا بايلانىس قۇرىلىمىنا تۇسەتىن تولەمدەر دە قوردالانىپ قالعان-تۇعىن. تۇرعىنداردىڭ تەلەفون قىزمەتىنە بەرەشەك قارىزدارى دا تىم كولەمدى بولىپ، جيناقتالىپ قالعان كۇردەلى جىلدار كەزدەستى. وسىندايدا ويعا ورالادى: «قازاقتەلەكوم» تۇرعىنداردان تۇسەتىن تولەمدەردى الا الماي، دۇركىن-دۇركىن ءباسپاسوز ءماسليحاتىن ۇيىمداستىرىپ، جۇرتشىلىققا قۇلاققاعىس ەتۋدەن ەش تانباعان ەدى. سول تۇستا ءبىر باسىلىم بەتىندە «قازاق، تولە، كوم!» دەگەن تاقىرىپپەن ارنايى ماقالا دا جارىققا شىققانىن كوزبەن كوردىك. مىنە، قازىرگى ۋاقىتتا مۇنىڭ ءبارى ارتتا قالىپ، ەل ەكونوميكاسىنىڭ كورسەتكىشتەرى جىلدار اعىمىمەن ەسەلەي ارتىپ، تۇرعىنداردىڭ تۇرمىسى مەن تابىسى تۇزەلدى. جالاقى دا ۋاقىتى بەرىلەدى. جۇرتشىلىق تەلەكوممۋنيكاتسيا قىزمەتىن پايدالانعانى ءۇشىن تولەنەتىن تولەمدەردى دە مەرزىمىندە وتەۋگە ويىستى. ناتيجەسىندە، «قازاقتەلەكوم» ءوزىنىڭ قىزمەتتىك مۇمكىندىكتەرىن جەتىلدىرۋگە، جاڭاشا ءارى ساپالى قىزمەت تۇرلەرىن ۇسىنۋعا بەت بۇردى.
بۇگىندە «قازاقتەلەكوم» اق فيليالى - پاۆلودار وبلىستىق تەلەكوممۋنيكاتسيا ديرەكتسياسى 225 625 نەگىزگى تەلەفون اپپاراتتارىنا قىزمەت كورسەتەدى. بۇل كورسەتكىشتىڭ 44 157-ءسى اۋىلدىق جەرلەرگە تيەسىلى بولىپ تابىلادى. ۇستىمىزدەگى جىلدىڭ التى ايىندا ءبىزدىڭ وبلىستا 5830 بىرلىك تەلەفون نۇكتەسى جاڭادان ورناتىلىپتى. ال قۇرىلىمنىڭ جارتىجىلدىقتاعى جوسپارى 3177 نۇكتە بولاتىن. جوسپارلانعان كورسەتكىش قانشالىقتى ارتىعىمەن وراندالعانىن وسىدان باعامداي بەرىڭىز.
وسى كۇنى جۇرتشىلىق ءوز ءومىرىن عالامتور - ينتەرنەتسىز ەلەستەتۋدەن قالىپ بارادى. «قازاقتەلەكوم» بۇل باعىتتا دا قولايلى ءارى ساپالى قىزمەت كورسەتۋدى باسشىلىققا العان. ينتەرنەتكە قاتىناۋ قىزمەتىن العا باستىرۋ باعىتىندا دا قارقىندى جۇمىستار تولاستاعان ەمەس. سوڭعى دەرەكتەرگە ءتىل بىتىرسەك، وبلىستا جالپى سانى 51 437-ءنى قۇرايتىن ينتەرنەت پايدالانۋشىلاردىڭ 41 244-ءى ADSL تەحنولوگياسى ارقىلى كەڭ جولاقتى عالامتور جەلىسىنە قوسىلعان ەكەن. بۇل دا بولسا، «قازاقتەلەكومنىڭ» كورسەتىپ وتىرعان قىزمەتى ۇلكەن سۇرانىسقا يە ەكەندىگىن ايعاقتايدى. وبلىستىق ديرەكتسيا الداعى ۋاقىتتاردا ءوسىم كورسەتكىشتەرىن ارتتىرۋدى، جەلىلەردى دامىتۋ مەن جاڭعىرتۋدى، ينتەرنەت قىزمەتىنە دەگەن تاريفتەردى تومەندەتۋدى جالعاستىرا بەرمەك.
جاڭارتىلعان دەرەكتەر بويىنشا، قازىر وبلىستىڭ تەلەكوممۋنيكاتسيا جەلىسىندە جالپى سانى 290 اتس جۇمىس ىستەپ تۇر. ولاردىڭ 169-ى اۋىلدىق ەلدىمەكەندەردە ورىن تەپكەن. ورتا ءبىلىم بەرۋ مەكەمەلەرىن ينتەرنەت جۇيەسىمەن 100 پايىز قامتۋ جۇمىستارى دا جالعاسىپ جاتىر.
ديرەكتسيانىڭ باس ديرەكتورى ا.كۇزەكوۆتىڭ ايتۋىنشا، وبلىس اكىمىنىڭ تاپسىرماسىنا سايكەس «قازاقتەلەكومنىڭ» فيليالى مادەنيەت باسقارماسىمەن بىرلەسە وتىرىپ، اۋىلدىق كىتاپحانالاردى تەلەفونداندىرۋ جوسپارىن ازىرلەپتى. ەندى مادەنيەت باسقارماسى تاراپىنان قارجىلاندىرۋ جاعى وڭ شەشىمىن تاپسا، بارلىق اۋىلدىق كىتاپحانالار تەلەفونمەن قامتاماسىز ەتىلەدى دەپ كۇتىلىپ وتىر.
وبلىستاعى ءۇش قالادا ينتەرنەتكە قوسىلۋدىڭ جەلىلەرى تاعى 15 680 پورتقا ارتتىرىلىپ، قازىر 55 838-ءدى قۇراپ وتىرسا كەرەك. مۇنىڭ ءوزى «مەگالاين» قىزمەتىن ورناتۋ بويىنشا قالالارداعى كەزەكتى ازايتۋعا مۇمكىندىك تۋدىرۋدا.
تاعى ءبىر ماڭىزدى باعىت - اۋىلدىق جەرلەردە CDMA-450 دەپ اتالاتىن سىمسىز تەلەفون جەلىسىن قۇرۋ جۇمىستارىنىڭ جالعاسىپ جاتقاندىعى. بيىلعى جىلى 9 بازالىق ستانتسيادا مونتاجداۋ جۇمىستارى اتقارىلماقشى. تۇرعىندار بىلە ءجۇرسىن دەگەن نيەتپەن ولاردى دا ايتا كەتەلىك: ەكىباستۇز اۋىلدىق ايماعى - تورتقۇدىق اۋىلى، لەبياجى اۋدانى - اققۋ سەلوسى، قاشىر اۋدانى - فەدوروۆكا اۋىلى، اقتوعاي اۋدانى - اقتوعاي سەلوسى جانە جولبولدى اۋىلى، ەرتىس اۋدانى - پانفيلوۆ جانە گولۋبوۆكا اۋىلدارى، باياناۋىل اۋدانى - ج.ايماۋىتوۆ اۋىلى، جەلەزينكا اۋدانى - ءۋاليحانوۆ اۋىلى.
سونىمەن قاتار «مەگالاين» قىزمەتىنىڭ ساپاسىن جاقسارتۋ ماقساتىندا سولنەچنىي، مايقايىڭ، قالقامان جانە شىدەرتى ەلدىمەكەندەرىندە دەرەكتەردى جونەلتۋ جەلىسىنىڭ ارنالارىن ارتتىرۋ جۇمىسى جۇرگىزىلدى.
ماڭىزدى جاڭالىقتىڭ تاعى ءبىرى - پاۆلودار-تەرەڭكول ارالىعىندا تالشىقتى-وپتيكالىق جەلىنىڭ قۇرىلىسى باستالعاندىعى. مۇنىڭ ءوزى قاشىر، ەرتىس جانە جەلەزينكا اۋداندارىنىڭ تۇرعىندارىنا ينتەرنەتكە جوعارى جىلدامدىقپەن قاتىناۋعا مۇمكىندىك بەرەدى.
ونى ايتاسىز، ۇستىمىزدەگى جىلدىڭ سوڭعى توقسانىندا ۋسپەنكا، شارباقتى، لەبياجى، قاشىر، ماي اۋداندارىنىڭ ورتالىقتارىندا IPTV تەلەارنالار جەلىسىن پايدالانۋعا ەنگىزۋ جوسپارلانعان.
وسىلايشا، «قازاقتەلەكوم اق فيليالى - پاۆلودار وبلىستىق تەلەكوممۋنيكاتسيا ديرەكتسياسى قالالارداعى قىزمەت تۇرلەرىن ىسكە قوسۋدى بارىنشا تۇگەسىپ، ەندىگى جەردە اۋىلدىق جەرلەرگە «اۋىز سالا» باستاپ وتىر. بۇل نەنى بىلدىرەدى؟ بۇل باعىتتاعى جۇمىستار وڭتايلى ءارى ساتىمەن، ەڭ باستىسى ساپالى جۇزەگە اساتىن بولسا، وندا تاياۋ ارادا اۋىلدىق ەلدىمەكەندەر تۇرعىندارى قالالىقتار سياقتى ءبىر مەزگىلدە تەلەفونمەن سويلەسۋ، ينتەرنەتكە قوسىلۋ جانە IPTV تەلەارنالار جەلىسىن پايدالانۋ مۇمكىندىگىنە قول جەتكىزەدى.
- «قازاقتەلەكوم اق وسى جىلدىڭ 1 شىلدەسىنەن باستاپ تمد ەلدەرىنە باعىتتالعان حالىقارالىق تەلەفون بايلانىسى تاريفتەرىن ايتارلىقتاي تومەندەتتى. وسىلايشا، تاريفتەردى پايدالانۋشىلاردىڭ ساناتتارى بويىنشا مولشەرلەر تەڭەستىرىلدى. بارلىق باعىتتار بويىنشا حالىقارالىق تەلەفون بايلانىسى قىزمەتتەرىنىڭ تاريفتەرى وزگەرتىلەدى. 2010 جىلدىڭ 1 شىلدەسىنەن باستاپ تمد ەلدەرىنە تەلەفون سوعۋ قۇنى قوسىمشا قۇن سالىعىن قوسا ەسەپتەگەندە 25 تەڭگەدەن، الىس شەتەلدەرگە 45 تەڭگەدەن باستالاتىن قۇندى قۇرايدى. جانە دە زاڭدى نەمەسە جەكە تۇلعالارعا وسى تاريف ورتاق بولىپ بەلگىلەندى. ياعني، جىكتەۋ بولمايدى، - دەدى ا.كۇزەكوۆ مىرزا.
«قازاقتەلەكومنىڭ بۇدان دا باسقا جوسپارلارى جەتەرلىك. ونىڭ ءبارىن الداعى ۋاقىتتا ءوز تۇرمىسىمىزدا سەزىنە جاتارمىز. ازىرگە ۇيىڭىزدە تەلەفون نۇكتەسى بولسا، وندا قولايلى تاريفتەردى پايدالانا وتىرىپ، ءبىر مەزەتتە تۋىسىڭىزعا تانىسىڭىزعا قوڭىراۋ شالىپ، ينتەرنەت اقتارىپ، جيىنى 90 ارنانى قۇرايتىن جانە ۇيعارىمىڭىزعا قاراي بىرنەشە پاكەتتەرگە ءبولىنىپ ۇسىنىلاتىن IPTV تەلەارنالار جەلىسىن پايدالانۋ مۇمكىندىگىڭىز بار.
ءساتىن سالسا، مۇنداي يگىلىكتى اۋىلدىق اعايىن دا پايدالاناتىن بولادى.
«قازاقتەلەكوم» اق فيليالى - پاۆلودار وبلىستىق تەلەكوممۋنيكاتسيالار ديرەكتسياسى رەسپۋبليكالىق اكتسيالاردىڭ دا قورىتىندىسىن جاريا ەتتى. «مەگالاين» اكتسياسى بويىنشا رەسپۋبليكا بويىنشا جەڭىمپاز اتانعانداردىڭ قاتارىندا پاۆلودارلىق رىسقالي توقسانباەۆ تا بار ەكەن. وعان ءۇي كينوتەاترى سىيعا تارتىلدى. ال تاعى ءبىر پاۆلودارلىق وتباسى - شالاباەۆتار اۋلەتى وسىنداي اكتسيا ناتيجەسىندە جەرورتا تەڭىزىنە، ونىڭ جاعالاۋىنداعى ەلدەرگە ساياحات جاساۋ جولداماسىن ۇتىپ الىپتى. قازىرگى ۋاقىتتا اتالمىش وتباسى دەمالىستارىن وتكىزىپ كەلدى. العان اسەرىمىز وراسان زور دەپ وتىر وتباسى مۇشەلەرى باق وكىلدەرىمەن بولعان كەزدەسۋدە.
«قازاقتەلەكومنىڭ» قىزمەتىن پايدالانا وتىرىپ، وسىنداي تاماشا تارتۋلاردان دا شەت قالمايتىنىڭىزعا سەنىڭىز!

اسىل ابىشەۆ.