رەسپۋبليكا كۇنى قارساڭىندا جەتىسۋ وبلىسىندا ءوڭىردىڭ 8 اۋدانى مەن 2 قالاسىنىڭ اۋىل شارۋاشىلىعى تاۋار وندىرۋشىلەرىنىڭ قاتىسۋىمەن جارمەڭكە ءوتتى، – دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

وبلىس ورتالىعى تالدىقورعان قالاسىندا وتكەن جارمەڭكەگە وبلىس اكىمىنىڭ ءبىرىنشى ورىنباسارى الىبەك جاقانباەۆ قاتىستى.

سۋرەتتى تۇسىرگەن دميتري ەروفەەۆ.

تالدىقورعان تۇرعىندارى مەن قالا قوناقتارى جارمەڭكەدە اۋىل شارۋاشىلىعى تاۋار وندىرۋشىلەرىنەن تىكەلەي قولجەتىمدى باعادا بالعىن ءارى ساپالى ونىمدەردى ساتىپ الۋعا مۇمكىندىك الدى.

جارمەڭكەدە جالپى كولەمى شامامەن 137 توننا بولاتىن 54 ءتۇرلى ءونىم ۇسىنىلدى. اتاپ ايتقاندا، 19,1 توننا كوكونىس، 12,1 توننا ەت، 3,5 توننا بالىق، 1,4 توننا ءسۇت ونىمدەرى، 20,4 توننا كارتوپ، 7,7 توننا جەمىس-جيدەك، 4 توننا قانت، 0,8 توننا بال جانە شامامەن 72 توننا باسقا دا ءتۇرلى ونىمدەر ساۋدالاندى.

سۋرەتتى تۇسىرگەن دميتري ەروفەەۆ.

ساتۋشىلار مەن كەلۋشىلەر جارمەڭكەنىڭ قوس تاراپقا دا ءتيىمدى ەكەنىن جەتكىزدى.

– بىزدە تاۋىق ەتىنەن جاسالعان ءونىمنىڭ ءتۇر-ءتۇرى بار، سونىمەن قاتار جۇمىرتقانىڭ بىرنەشە سورتىن ۇسىندىق. جارمەڭكەگە 100 كگ تاۋىق ەتى، 50 كگ بالاپان ەتى جانە قوسىمشا سۋبونىمدەر الىپ كەلدىك. ونىمدەرىمىزگە دەگەن سۇرانىس جوعارى، بۇل ءونىمنىڭ ساپالىلىعى مەن باعاسىنىڭ قولجەتىمدى بولعانىنىڭ ارقاسىندا دەپ ويلايمىن. مىسالى، ءبىر دانا جۇمىرتقانىڭ باعاسى 25 تەڭگە مەن 55 تەڭگەنىڭ ارالىعىندا، – دەيدى «كوگەر لتد» جشس فيرمالىق دۇكەنىنىڭ ساتۋشىسى ايگۇل ساتىبالدينا.

سۋرەتتى تۇسىرگەن دميتري ەروفەەۆ.

– ءبىز جارمەڭكەگە 7 قويدىڭ ەتىن الىپ كەلدىك. مال شارۋاشىلىعىمەن 10 جىلدان بەرى اينالىسامىز. تالدىقورعاندىقتاردىڭ ءبىزدىڭ ونىمىمىزگە ريزا بولاتىنىنا سەنەمىز، – دەدى اقسۋ اۋدانىنىڭ فەرمەرى سەرىكبول قايراتبەك.

– ءبىز ونىمدەردىڭ سان ءتۇرى مەن تومەن باعالارىنا ريزا بولدىق. ءبارى دە ادەمى، ۇقىپتى قويىلعان، كوز سۇيسىنەدى. ەت، بالىق، كوكونىس ساتىپ الدىق. وسىنداي جارمەڭكەلەر ءجيى ۇيىمداستىرىلسا ەكەن دەيمىز. مەرەكە قارساڭىندا حالىق يگىلىگى ءۇشىن اۋىل شارۋاشىلىعى جارمەڭكەسىنىڭ وتكىزىلگەنىنە قۋانامىز، – دەدى تالدىقورعاندىق پوگورەلوۆتار وتباسى.

سۋرەتتى تۇسىرگەن دميتري ەروفەەۆ.

نەگىزگى ازىق-تۇلىك تاۋارلارىنىڭ باعاسىن تۇراقتاندىرۋ جانە وتاندىق وندىرۋشىلەردى قولداۋ ماقساتىندا تالدىقورعاندا ۇيىمداستىرىلعان جارمەڭكەدە 128,8 ميلليون تەڭگەدەن استام سوماعا اۋىل شارۋاشىلىعى ونىمدەرىن ساتۋ جوسپارلانعان.

جەتىسۋ وبلىسىندا «اۋىل اماناتى» جوباسى اۋىل ومىرىنە تىڭ تىنىس، كاسىپكە جاڭا سەرپىن بەرىپ وتىر. بۇل باعدارلاما بۇگىندە اۋىل شارۋاشىلىعىن دامىتۋدىڭ ناقتى قۇرالىنا اينالىپ، جەرگىلىكتى حالىقتىڭ تۇرمىس ساپاسىن ارتتىرۋعا شىنايى اسەر ەتە باستاعان. ەڭ باستىسى – اۋىلداعى ادام ەندى ءوز ەڭبەگىنىڭ ناقتى ناتيجەسىن كورىپ، ءۇمىتىن ۇكىمەتكە ەمەس، ءوز ىسىنە بايلاپ وتىر.

مەملەكەت تاراپىنان ۇسىنىلعان جەڭىلدەتىلگەن نەسيەنىڭ ارقاسىندا جەتىسۋ ءوڭىرىنىڭ شارۋالارى مال جانە وسىمدىك شارۋاشىلىعىن وركەندەتىپ، اۋىل ەكونوميكاسىنىڭ دىڭگەگىن قايتا تىكتەۋدە. 2,5 پايىزدىق نەسيەمەن ىسكە قوسىلعان جوبالار بۇگىندە ءوز جەمىسىن بەرە باستادى: ءبىر اۋىلدا شاعىن ءسۇت فەرماسى بوي كوتەرسە، ەندى بىرىندە جىلىجاي كەشەنى مەن بال وندىرەتىن كووپەراتيۆ جۇمىس ىستەپ تۇر. كەشە عانا بەس-التى سيىرمەن كۇنەلتكەن شارۋا قازىر جيىرما باسقا دەيىن كوبەيتىپ، ءوز ءونىمىن نارىققا شىعارىپ وتىر. بۇل – ناقتى ناتيجە، ءتىرى مىسال.

بۇگىندە «اۋىل اماناتى» جوباسى جەتىسۋ وبلىسىن رەسپۋبليكاداعى ەڭ بەلسەندى ايماقتاردىڭ بىرىنە اينالدىردى. وبلىستىق اۋىل شارۋاشىلىعى باسقارماسىنىڭ دەرەگىنشە، 2025 جىلدىڭ وزىندە مىڭنان استام تۇرعىن جوباعا قاتىسىپ ۇلگەرگەن. ميللياردتاعان تەڭگە قاراجات اۋىلعا قۇيىلىپ، اۋىل ەكونوميكاسى جاندانىپ كەلەدى. ال بۇل دەگەنىمىز – جاڭا جۇمىس ورىندارى، تۇراقتى تابىس، اۋىلدان قالاعا ۇدەرە كوشۋدىڭ ازايۋى.

«اۋىل اماناتى» — جاي نەسيە نەمەسە الەۋمەتتىك باستاما ەمەس. بۇل — اۋىلدىڭ ءوز بولاشاعىن ءوز قولىنا الۋىنىڭ كورىنىسى. اۋىل امان بولسا، ەل امان. اۋىل ەڭسەسىن تىكتەسە، ۇلتتىڭ ىرگەسى بەكيدى. سوندىقتان بۇل جوبا — تەك ەكونوميكالىق ەمەس، رۋحاني ماعىناسى بار قادام.

بۇگىنگى اۋىل – ەرتەڭگى ەلدىڭ ايناسى. ال جەتىسۋداعى «اۋىل اماناتى» جوباسى سول اينادان جاڭا ءۇمىتتىڭ، جاڭا ءومىردىڭ ساۋلەسىن كورسەتىپ وتىر.

Abai.kz