قازاقستاننىڭ ءۇشىنشى جاڭعىرۋى مەن يندۋستريالدى-يننوۆاتسيالىق دامۋ باعدارلاماسىنىڭ ۇستانىمدارىنا ساي «سامۇرىق-قازىنا» قورجىندىق كومپانيالارى نازارباەۆ ۋنيۆەرسيتەتىمەن بىرلەسە وتىرىپ عىلىمي-زەرتتەۋ زەرتحانالارىن قۇرۋ جونىندە جول كارتالارىنا قول قويدى.

اعىمداعى جىلدىڭ 5 مامىرىندا استانا قالاسىندا «سامۇرىق-قازىنا» اق قورجىندىق كومپانيالارى – «تاۋ-كەن سامۇرىق» اق، «سامۇرىق-ەنەرگو» اق، «بىرلەسكەن حيميالىق كومپانياسى» جشس مەن «نازارباەۆ ۋنيۆەرسيتەتى» دببۇ اراسىندا حيميالىق، كومىر جانە گەولوگيالىق عىلىمي-زەرتتەۋ زەرتحانالارىن قۇرۋ بويىنشا  جول كارتالارىنا قول قويىلدى.

بەكىتىلگەن جول كارتالارى شەڭبەرىندە ۋنيۆەرسيتەت نەگىزىندە تاجىريبەلىك عىلىمي-وندىرىستىك ورتالىقتار قۇرۋ جانە جابدىقتاۋ بويىنشا جۇمىس كەشەنىن وتكىزۋ جوسپارلانۋدا. بۇل باستامانى قور مەملەكەت باسشىسىنىڭ قازاقستاننىڭ ءۇشىنشى جاڭعىرۋى  تۋرالى تاپسىرماسىنا سايكەس قولعا العان.

«بۇگىندە قورجىندىق كومپانيالارىمىز مەملەكەتتىك يندۋستريالدى-يننوۆاتسيالىق دامۋ باعدارلاماسىنىڭ ۇستانىمدارىنا ساي ازىرلەنگەن باستامالاردى جۇزەگە اسىرۋدا. كەز-كەلگەن مودەرنيزاتسيانىڭ ءمانى وندىرىسكە تەحنولوگيالاردى ەنگىزۋدە. نازارباەۆ ۋنيۆەرسيتەتىمەن قارىم-قاتىناستى نىعايتۋ ارقاسىندا ءبىزدىڭ ءوسىپ كەلە جاتقان جانە جەتىلگەن كومپانيالارىمىز كاسىپورىندارى الدىندا تۇرعان ناقتىلى مىندەتتەردى شەشۋ ءۇشىن ىرگەلى زەرتتەۋلەردى جۇرگىزۋگە مۇمكىندىك الادى. نازارباەۆ ۋنيۆەرسيتەتى بولسا، ءوز كەزەگىندە زەرتحانا الاڭىنا قول جەتكىزەدى، سونىمەن قاتار تاجىريبەلىك زەرتتەۋلەردى وتكىزىپ، كومپانيالارىمىزدىڭ قاراماعىنداعى كەن ورىنداردان ماتەريالداردى سىناي الادى. وسى بىرلەسكەن جۇمىستىڭ ناتيجەسى جوعارى بولاتىنىنا ءۇمىت ارتامىز»، - دەپ اتاپ ءوتتى «سامۇرىق-قازىنا» اق باسقارما توراعاسى ومىرزاق شوكەەۆ.

«قازىرگى تاڭدا ءبىز ءوزارا سەرىكتەستىكتىڭ ءۇش نەگىزگى باعىتىن ايقىنداپ الدىق. نازارباەۆ ۋنيۆەرسيتەت پەن «سامۇرىق-قازىنا» قورىنىڭ بىرلەسكەن جوبالارعا كىرىسكەنىنە قۋانىشتىمىن. بۇل رەتتە ءبىزدىڭ فاكۋلتەت ءار الۋان سالالارداعى عالامدىق تاجىريبەسى مەن بىلىمدەرىمەن بولىسۋگە دايىن. قوردىڭ قولداۋىمەن ونەركاسىپ، بيزنەس پەن زەرتتەۋ فاكۋلتەتىمىز اراسىندا تىعىز قارىم-قاتىناستى ورناتۋ ماقساتىندا ءبىز ناقتىلى تاجىريبەلىك زەرتتەۋلەردى جۇزەگە اسىرامىز» - دەدى «نازارباەۆ ۋنيۆەرسيتەت» دببۇ پرەزيدەنتى شيگەو كاتسۋ ءوز كەزەگىندە.

جول كارتالارى اياسىندا بيىلعى جىلدىڭ كۇزىندە اگروحيميا ونىمدەرىن حالىقارالىق تالاپتارعا سايكەس سەرتيفيكاتسيالاۋ بويىنشا جۇمىس ىستەيتىن العاشقى زەرتحانالار اشىلادى دەپ كۇتىلۋدە. سونىمەن قاتار 2017 جىلدىڭ سوڭىنا دەيىن ۋنيۆەرسيتەت نەگىزىندە مۇناي ءوڭدىرۋ سالاسىندا زەرتتەۋ جۇرگىزۋ ءۇشىن ارنايى زەرتحانانى قۇرۋ كوزدەلگەن. ال تاۋ-كەن عىلىمي –وندىرىستىك ورتالىقتاردىڭ نەگىزىندە بايىتۋدان باستاپ مەتاللۋرگياعا دەيىنگى تەحنولوگيالىق تىزبەك بويىنشا ونەركاسىپتىك سىناقتار جۇزەگە اسىرىلماق.

الداعى ۋاقىتتا قور ۋنيۆەرسيتەتپەن سەرىكتەستىكتى كەڭەيتۋدى كوزدەيدى. جىل اياعىنا دەيىن قوردىڭ سالالىق قورجىندىق كومپانيالارى مەن ۋنيۆەرسيتەت اراسىندا مۇناي-گاز جانە ەنەرگەتيكا سالالارىنا قاتىستى عىلىمي-زەرتتەۋ زەرتحانالاردى قۇرۋ جونىندەگى جاڭا جول كارتالارىن بەكىتۋ جوسپارلانۋدا.

انىقتاما:

«سامۇرىق-قازىنا» ۇلتتىق ءال اۋقات قورى» اكتسيونەرلىك قوعامىنىڭ جالعىز اكتسيونەرى - قازاقستان رەسپۋبليكاسىنىڭ ۇكىمەتى. قور 2008 جىلى قازاقستان رەسپۋبليكاسى پرەزيدەنتىنىڭ جارلىعىمەن قۇرىلعان. بۇل كوممەرتسيالىق قۇرىلىم، قىزمەتى قازاقستاننىڭ ۇلتتىق ءال-اۋقاتىن كوتەرۋگە جانە ۇلتتىق ەكونوميكانى جاڭعىرتۋدى قولداۋعا باعىتتالعان ينۆەستيتسيالىق حولدينگ بولىپ تابىلادى. «سامۇرىق-قازىنا» قورى ءوز ميسسياسىن قورجىندىق كومپانيالاردىڭ ۇزاق مەرزىمدى قۇنىن كوتەرۋ جانە تۇراقتى دامۋى ءۇشىن ولاردى ءتيىمدى باسقارۋ جانە ۇلتتىق ەكونوميكانىڭ باسىمدىق سەكتورلارىن دامىتۋعا كاتاليتيكالىق ينۆەستيتسيالار سالۋ ارقىلى جۇزەگە اسىرادى. قور اكتيۆتەرى 67,4 ملرد اقش دوللارىنا جۋىق. «سامۇرىق-قازىنا» اق كومپانيالار توبىنا مۇناي-گاز، كولىك جانە لوگيستيكا، حيميالىق جانە اتوم ونەركاسىبى، تاۋ-مەتاللۋرگيالىق كەشەن، ەنەرگەتيكا، ماشينا قۇراستىرۋ سالالارىنداعى كاسىپورىندار ەنەدى.