بەيسەنبى, 7 شىلدە 2022
جاڭالىقتار 6290 8 پىكىر 12 ماۋسىم, 2017 ساعات 11:38

اتامباەۆ: قىرعىزدار مەنى تىرىدەي ورتەپ جىبەرەر ەدى

 

قىرعىزستاننىڭ پرەزيدەنتى المازبەك اتامباەۆ استانادا ءوتىپ جاتقان ەكسپو-2017 حالىقارالىق كورمەسىنە ارنايى كەلىپ، كوزىمەن كورىپ كەتتى. كورمەنىڭ اشىلۋىنا قاتىستى. حالىقارالىق كورمەنىڭ اشىلۋ سالتاناتىنا ارنايى كەلگەن 17 مەملەكەتتىڭ باسشىسىمەن قاتار تۇردى. باستىسى ءوزى اعالاپ، جاعالاپ جۇرەتىن نۇرسۇلتان نازارباەۆتىڭ قوناعى بوپ قايتتى.

سودان، المازبەك بايكە ەلىنە بارىپ، بىلاي دەدى: "ەگەر مەن 3 ميلليارد دوللار جۇمساپ، استاناداعىداي كورمە وتكىزەتىن بولسام، قىرعىزدار مەنى تىرىدەي ورتەپ جىبەرەر ەدى".

راس-اۋ، ءبىر ەمەس، ەكى پرەزيدەنتىن تاقتان قۇلاتىپ، قۋىپ جىبەرىپ، ەندىگى بەسىنشى سايلاۋىنا بەلىن بەكەم بۋىپ وتىرعان قىرعىز جۇرتىنىڭ سونداي ساياسي بەلەسەندىلىگى بار. اتامباەۆتىڭ دا سايلاۋعا قايتا تۇسپەۋىنىڭ سىرى سول.

اڭگىمەمىزگە ورالايىق. قىرعىزدىڭ "akipress.org" دەيتىن سايتى تاراتقان حاباردا قىرعىز رەسپۋبليكاسىنىڭ پرەزيدەنتى بىشكەكتەگى ءبىر جيىندا المازبەك اتامباەۆ: "بىزدە شە؟ جول سالۋ ءۇشىن ميلليارد دوللار قارىز الساڭ، ارتىندا ماشاقاتى ون ەسە. وتكەن جىلى كوشپەندىلەر ويىنىن ەكىنشى مارتە وتكىزۋ ءۇشىن 30 ميلليون دوللار جۇمساپ ەك، ارتىنان قانشاما ءسوز ايتىلدى. ەگەر مەن 3 ميلليارد دوللار جۇمساپ، استاناداعىداي كورمە وتكىزەتىن بولسام، قىرعىزدار مەنى تىرىدەي ورتەپ جىبەرەر ەدى. ءبىز قارجى جاعىنان شەكتەۋلى بولىپ قالا بەرمەۋىمىز كەرەك. ەلىمىز اۋقاتتى ەلدەر ساپىندا بولۋى ءۇشىن ءوزىمىز ءبىر جولىن، امالىن تابۋىمىز كەرەك. بىزدە مۇناي مەن گاز جوق. ءبىز مۇناي مەن گازدىڭ ورنىن ادامي كاپيتالمەن تولىقتىرامىز", - دەپتى.

المازبەك بايكە بۇل ءسوزدى كۇلىپ ايتسا دا، كۇڭىرەنىپ ايتسا دا ايتتى. قىرعىزدا مۇناي مەن گازدىڭ جوقتىعى راس. ال بىزدە شە؟ بىزدە مۇنايدان دا وزگە تابيعي بايلىق جەتكىلىكتى. سوندىقتان دا مەگاجوبالارعا قارجى جۇمساپ، ءوزىمىزدى الەمگە تانىتۋعا اركەز قۇشتار بولىپ جۇرەمىز. ايتكەنمەن دە، اتامباەۆتىڭ سوزىنە قايرىلىپ ءبىر سوعۋعا تۋرا كەلەتىن سياقتى. "ەگەر مەن 3 ميلليارد دوللار جۇمساپ، استاناداعىداي كورمە وتكىزەتىن بولسام، قىرعىزدار مەنى تىرىدەي ورتەپ جىبەرەر ەدى" دەدى ول،ءا؟..

Abai.kz

8 پىكىر

ۇزدىك ماتەريالدار

اقمىلتىق

«قيالشىلدار كلۋبى»

ءامىرجان قوسان 2310
انىق-قانىعى

كىمنىڭ كىم ەكەنىن بىلە ءجۇرسىن دەپ...

اۋىت مۇقيبەك 1778