استانالىق بيلىك ەلوردانى قاڭعىباستاردان تازارتىپ جاتىر ەكەن. ءبىر توپ "بومجدى" اۆتوبۋسپەن قالانىڭ سىرتىنا، سىرتىنا دەگەن ءجاي ءسوز، ايدالاعا اپارىپ تاستاعان بەينە جازبا الەۋمەتتىك جەلىدە ءجۇر.

بيلىكتىڭ بۇل ارەكەتى قالادان قۋىلعان قاڭعىباستاردىڭ نارازىلىعىن تۋعىزىپ، قوعامدىق ورتا بەلسەندىلەرى دە قۇزىرلىلاردىڭ قىلىعىنا سىني پىكىر ايتىپ جاتىر.

وتكەندە "كتك" ارناسى استانادا ءۇيسىز-كۇيسىز قاڭعىپ جۇرگەن تىلەنشىلەردى جەرگىلىكتى پوليتسيا اۆتوبۋستارعا تيەپ، كوكشەتاۋ قالاسىنا تاسىپ جاتىر دەپ حابار تاراتقان ەدى.

سويتسەك، بيلىكتىڭ بۇل ءىسى ەكسپو-نىڭ ءسانى ءۇشىن بولىپ شىقتى.

ال،  كتك ارناسىنان سويلەگەن ەلوردانىڭ كەزبەسى:  "مەن كەز كەلگەن جەردە جاتا بەرەمىن. ءبىز ونسىز دا ەكسپو-عا بارمايمىز عوي", -  دەدىى.

ءيا، بارمايدى. بارسا دا ەكسپو اۋلاسىندا قازداي تىزىلگەن قۇقىق قورعاۋ ورگانىنىڭ  قىزمەتكەرلەرى ولاردى قۋىپ جىبەرەرى ءسوزسىز. ودان قالسا، ەكسپو-نىڭ بيلەتىن بومجداردىڭ قالتاسى كوتەرمەيتىنى تاعى راس.

ءبىر انىعى - قوقىس توككەندەي، ايدالاعا تاستالعان ۇيسىزدەر - قازاقستان ازاماتتارى. بيلىكتىڭ كەشەگى 18 ميلليونىنىڭ تىزىمىندە بار ازاماتتار. سوندا، بومجدار ستاتيستيكا ءۇشىن عانا كەرەك پە؟

بومج دەگەن ءسوزدىڭ ءوزىن تارقاتىپ ايتساق - تۇرعىلىقتى مەكەن-جايى جوق (بەز وپرەدەلەننوگو مەستو جيتەلستۆو) دەگەن ءسوز. مىڭداعان قازاقستاندىق ءۇيسىز-كۇيسىز، پاتەردەن-پاتەرگە قاڭعىرىپ ءجۇر، قازىر. ولار دا قاڭعىباستار ساناتىندا ما؟

شەتەلدىڭ الەكەدەي جالانعان تىمىسكى تىلشىلەرى ەلوردانى قاڭعىباستاردان تازالاۋ وپەراتسياسىنان حابارسىز قالماعانى انىق.

بيلىكتىڭ بۇل ارەكەتى - كۇيرەگەن كسرو-نىڭ كارى سۇيەك ساياساتىن ەسىمىزگە ءتۇسىردى. 1980 جىلى ماسكەۋ وليمپياداسى كەزىندە قالاداعى بارلىق بومجدى ماسكەۋدىڭ سىرتىنا قۋىپ شىققانى بار ەدى. سودان كەيىن-اق، "برەجنەۆتىڭ 112-شاقىرىمى" دەيتىن ءسوز قالعان. ەكسپو-نىڭ ءسانى ءۇشىن بومجداردى قالادان شىعارىپ جىبەرگەن بۇگىنگى بيلىكتىڭ دە ارتىنان الگىندەي ءسوز قالۋى مۇمكىن.

ءبىزدى ويلاندىرعان ماسەلە - ءۇيسىز-كۇيسىزدەر بيلىكتىڭ شىرقىن كەتىردى مە، الدە كەرىسىنشە مە؟ انىعى بيلىكتىڭ بۇل قىلىعى ءبىرىنشى كەزەكتى - ءوزىن-ءوزى الداۋ ەكەنى داۋسىز.

ايتپاقشى، استانا قالالىق ءىىد تاراتقان دەرەككە سەنسەك، استانادان ءۇش جۇزگە تارتا بومج تابىلعان. ولاردىڭ بارلىعى ارنايى ورىندارعا ءبولىنىپتى. «ەشكىمدى دە كۇشتەپ كوكشەتاۋعا اپارعانىمىز جوق» دەيدى قۇقىق قورعاۋشىلار.

نۇرزات توعجان

Abai.kz