الماتى وبلىسىنىڭ ۇزدىك دارىگەرلەرىنە «لادا گرانتا» اۆتوكولىگىنىڭ كىلتى تابىستالدى. بۇل تۋرالى بۇگىن تالدىقورعان قالاسىنداعى ءى. جانسۇگىروۆ اتىنداعى مادەنيەت سارايىندا مەديتسينا قىزمەتكەرلەرى كۇنىنە وراي وتكەن سالتاناتتى شارادا بەلگىلى بولدى. دەنساۋلىق ساقتاۋ سالاسىنىڭ ماماندارىن وبلىس اكىمى اماندىق باتالوۆ قۇتتىقتادى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

قۇتتىقتاۋ تىلەگىن بىلدىرگەن وبلىس باسشىسى دەنساۋلىق ساقتاۋ سالاسىنا مەملەكەت تاراپىنان زور قولداۋ كورسەتىلىپ وتىرعانىن اتاپ ءوتتى.

- ادام جانىنىڭ اراشاسى بولىپ تابىلاتىن دارىگەرلەردىڭ قوعامداعى ورنى ەرەكشە. حالىقتىڭ دەنساۋلىعىن جاقسارتاتىن اق حالاتتى ابزال جاندارعا ەلىمىزدە ەرەكشە قۇرمەت كورسەتىلەدى. ەلباسىمىز نۇرسۇلتان ءابىشۇلى نازارباەۆتىڭ «ۇلت دەنساۋلىعى – ءبىزدىڭ جارقىن بولاشاعىمىزدىڭ نەگىزى»، - دەگەن سوزدەرى سىزدەردىڭ ماماندىقتارىڭىزدىڭ بار بولمىسىن ايقىنداپ تۇر. دەنساۋلىق ساقتاۋ سالاسى – مەملەكەتتىك ساياساتتىڭ باسىم باعىتتارىنىڭ ءبىرى. سوندىقتان ءبىزدىڭ وبلىسىمىزدا بۇل  سالاعا بولىنەتىن قارجى جىلدان جىلعا ارتىپ كەلەدى. سونىڭ ارقاسىندا ءبىزدىڭ مەديتسينالىق مەكەمەلەرىمىز ەڭ وزىق ۇلگىدەگى قۇرال-جابدىقتارمەن جابدىقتالىپ، ەمدەۋدىڭ ءتيىمدى تاسىلدەرى قولدانىلىپ كەلەدى، - دەدى وبلىس باسشىسى.

ءسوزىن ودان ءارى ساباقتاعان ا. باتالوۆ:

- قاجىرلى قىزمەتتەرىڭىزگە تابىس، وتباسىلارىڭىزعا باق-بەرەكە تىلەيمىن. سالاماتتى ۇلت قالىپتاستىرۋ جولىنداعى  ەڭبەكتەرىڭىز جانىپ، حالىقتىڭ ىستىق ىقىلاسىنا بولەنە بەرىڭىزدەر! – دەدى ىزگى تىلەگىن جەتكىزىپ.

وبلىستىق كونكۋرستىڭ قورىتىندىسىنا سايكەس جەڭىمپازدار 8 نوميناتسيا بويىنشا ماراپاتتالدى. ماسەلەن، ىلە اۋداندىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى ايدىن ەلىكباەۆ ۇزدىك دارىگەر اتانسا، ەركىن دارىگەرلىك امبۋلاتورياسىنىڭ مەڭگەرۋشىسى اسكەربەك ورالباەۆ ۇزدىك اۋىل دارىگەرى اتاندى. ەكى مامان دا وبلىس اكىمىنىڭ قولىنان «لادا گرانتا» اۆتوكولىگىنىڭ كىلتىن الدى. سونىمەن قاتار «ۇزدىك دارىگەرلىك امبۋلاتوريا»، «ۇزدىك اۋىلدىق اۋرۋحانا»، «ۇزدىك اۋداندىق ورتالىق اۋرۋحانا»، «ۇزدىك وبلىستىق مەديتسينالىق مەكەمە»، «ۇزدىك تەحنيكالىق كاسىبي ءبىلىمى بار مەديتسينالىق قىزمەتكەر»، «ۇزدىك مەنەدجەر» اتالىمدارى جەڭىمپازدارىنىڭ ەسىمدەرى دە بەلگىلى بولدى. جۇلدەگەرلەرگە 100 مىڭنان 500 مىڭ تەڭگەگە دەيىنگى اقشالاي سىيلىقتار بەرىلدى.

سونىمەن قاتار اماندىق باتالوۆ ۇزدىك قىزمەتكەرلەرگە قر دەنساۋلىق ساقتاۋ مينيسترلىگىنىڭ ناگرادالارىن، وبلىس اكىمىنىڭ قۇرمەت گراموتاسى مەن العىس حاتتارىن تابىستادى.

اتاپ ايتقاندا، «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىمەن تالدىقورعان ايماقتىق ينفەكتسيالىق اۋرۋحاناسىنىڭ ءبولىم مەڭگەرۋشىسى انجەلينا كيم مەن قاراساي اۋداندىق ورتالىق اۋرۋحاناسىنىڭ رەنتگەنولوگ دارىگەرى ەديك سانچيروۆ ماراپاتتالدى.

مەديتسينا قىزمەتكەرلەرى اتىنان دەنساۋلىق ساقتاۋ سالاسىنىڭ ارداگەرى كەنجەبەك ومىرعالي مەن تالدىقورعان قالالىق ەمحاناسىنىڭ تەراپەۆت دارىگەرى دانا التىنباەۆا ارىپتەستەرىنە ىزگى تىلەگىن ايتىپ، ماماندارعا كورسەتىلىپ وتىرعان قولداۋلار ءۇشىن ريزاشىلىعىن ءبىلدىردى.

سالتاناتتى شارا «كاسىبىڭە باسىمدى يەم» اتتى مەرەكەلىك كونتسەرتپەن جالعاستى.

وسى كۇنى ءى.جانسۇگىروۆ اتىنداعى مادەنيەت سارايىنىڭ كىرە بەرىسىندە الماتى وبلىسىندا مەملەكەتتىك – جەكەمەنشىك ارىپتەستىك نەگىزىندە  دەنساۋلىق ساقتاۋ سالاسىندا قولعا الىنعان جوبالاردى كورسەتەتىن كورمە ۇيىمداستىرىلدى.

وبلىس اكىمى مەملەكەتتىك-جەكە مەنشىك ارىپتەستىكتىڭ مەملەكەت باسشىسىنىڭ بەرگەن نەگىزگى تاپسىرمالارىنىڭ ءبىرى ەكەندىگىن اتاپ ءوتتى.

- ءبىزدىڭ وڭىرىمىزدە مەملەكەتتىك-جەكە مەنشىك ارىپتەستىك جاقسى قارقىنمەن جۇزەگە اسۋدا. قازىر ءبىز قوس تاراپقا دا ءتيىمدى بۇنداي ارىپتەستىك قاتىناستى دەنساۋلىق سالاسىندا دا پايدالانا باستادىق. وزدەرىڭىز وسى عيماراتتىڭ كارە بەرىسىندە قويىلعان كورمەدەن كورگەن جوبالارىڭىز جەمىستى ىنتىماقتاستىق قاتىناستاردىڭ تەك باستاماسى عانا. ولاردىڭ ورىندالۋى حالىقتىڭ دەنساۋلىق قورعاۋ مەن نىعايتۋ جولىندا تيگىزەر سەپتىگىنىڭ زور بولاتىندىعىنا سەنىمدىمىن، - دەدى ا.باتالوۆ.

كورمەگە قاتىسۋشىلاردىڭ مامانداندىرىلعان ارنايى قۇرىلعىلار مەن زەرتتەۋ ادىستەرىنىڭ زاماناۋي ۇلگىسىن بىرىكتىرە تانىستىرعان جوبالارى ونكولوگيالىق اۋرۋلاردى ەرتە انىقتاۋعا مۇمكىندىك بەرەتىندىگىن ەسكەرتە كەتكەن ءجون.

سونداي-اق شارا بارىسىندا كوپشىلىك نازارىنا ءوڭىردىڭ دەنساۋلىق ساقتاۋ سالاسىندا قول جەتكىزگەن جەتىستىكتەرىن كورسەتەتىن بەينەروليك ۇسىنىلدى.

Abai.kz