ەستەرىڭىزدە بولسا، وسىدان ءۇش اپتا بۇرىن قازاقستان رەسپۋبليكاسىنىڭ سىرتقى ىستەر ءمينيسترى ق.ق. ءابدىراحمانوۆتىڭ اتىنا «Abai.kz» اقپاراتتىق پورتالى ارقىلى «ءۇش جىلعا بەرىلەتىن ۆيزانى بارلىق ەتنيكالىق قازاققا ورتاق ەتۋدى سۇرايمىن!» (http://abai.kz/post/53750 ) اتتى اشىق حات جاريالاعانبىز. ول اشىق حاتتى سونداي-اق «نۇر وتان» پارتياسى ارقىلى اتالعان مينيسترلىككە دە جىبەرگەنبىز. وندا، قىتايدان قازاقستانعا كەلۋگە ءوتىنىش بىلدىرگەن قانداستارىمىزعا ءۇش جىلعا كوپ مارتەلى ۆيزا بەرۋ ءتارتىبىنىڭ بارلىق ادامعا بىركەلكى اتقارىلماي جاتقانىن ايتىپ، سۇراۋ سالعانبىز. بۇگىن سىرتقى ىستەر مينيسترلىگى كونسۋلدىق قىزمەت دەپارتامەنتىنەن ديرەكتور ا. ماديەۆتىڭ قولى قويىلعان رەسمي جاۋاپ حات كەلدى.

جاۋاپ حاتتا سىرتقى ىستەر مينيسترلىگىنىڭ جاۋاپتى تۇلعاسى «ەتنيكالىق قازاقتارعا، باستاپقى ۆيزانى رەسىمدەۋدە اڭگىمە جۇرگىزىلەدى جانە العاشقى قازاقستان رەسپۋبليكاسى ۆيزاسى ءبىر جىلعا دەيىن، ال قايتا ءوتىنىش جاساعاندا اڭگىمەلەسۋسىز ۆيزا 3 جىلعا دەيىن بەرىلەدى» دەپتى.

دەمەك، ءۇش جىلعا كوپ مارتەلى ۆيزا ەكىنشى رەت ۆيزا اشتىرۋعا ءوتىنىش بەرگەندەرگە بەرىلەدى. ءوتىنىش بەرۋشىنىڭ جاسىنا قارامايدى. قىتايدان اتاجۇرتقا كەلۋگە بەت العان قانداستارىمىز وسى مۇمكىندىكتى تولىق پايدالانۋىن وتىنەمىز. كونسۋلدىق قىزمەتكەرلەرى دە بۇل قاعيدانى بۇلجىتپاي ورىندايدى دەگەن سەنىمدەمىز. بۇل ۆيزا بەرۋ ءتارتىبى كەزەكتى ازايتۋعا سەپتىگىن تيگىزەدى.

اۋىت مۇقيبەك

 20.06.2017

استانا

Abai.kz