بۇگىن الماتى وبلىسى ءۇشارال قالاسىنىڭ اۋەجايى اشىلىپ، اۋەجايعا استانادان العاشقى رەيسپەن دەمالۋشىلار ۇشىپ كەلدى. مۇنداعى ەسكى əۋەجايدان سوڭعى ۇشاق وسىدان شيرەك عاسىر بۇرىن ۇشقان بولاتىن - دەپ حابارلايدى الماتى وبلىسى اكىمىنىڭ ءباسپاسوز قىزمەتى.

سالتاناتتى شارادا وبلىس اكىمى ا. باتالوۆ وڭىردە ءتۋريمزدى وركەندەتۋ باعىتىندا اتقارىلىپ جاتقان شارالار، سونىڭ ىشىندە ينفراقۇرىلىمدى دامىتۋ، تۋريستىك نىسانداردىڭ قۇرىلىسى جايلى ايتىپ ءوتتى.

- بۇگىن ءبارىمىز ءۇشىن - تاريحي كۇن. ەلباسىنىڭ وبلىسىمىزعا 2014 جىلى ىسساپارمەن كەلگەندە بەرگەن تاپسىرمالارىنىڭ ءبىرى - الاكول كولىندە تۋريستىك سالانى دامىتۋ بولاتىن. سوعان سايكەس وڭىردە تۋريستىك ينفراقۇرىلىم قارقىندى دامىپ، زاماناۋي تۋريستىك نىساندار، قوناق ۇيلەر كوپتەپ سالىنۋدا. سونىڭ ناتيجەسىندە الاكولگە ەلىمىزبەن قاتار تمد-دان، ءتىپتى الىس شەتەلدەردەن دە دەمالۋعا ازاماتتار كەلىپ جاتىر. الاكولدىڭ تۋريستىك پوتەنتسيالى زور. جاڭا اۋەجايدىڭ اشىلۋى تۋريستىك سالانىڭ ودان ءارى دامۋىنا تىڭ سەرپىن بەرەدى دەپ ويلايمىن، - دەدى ا. باتالوۆ.  سونىمەن قاتار الماتى وبلىسىنىڭ قۇرمەتتى ازاماتى مۇحتار جولجانوۆ، اۋداننىڭ باسقا ازاماتتارى كوپشىلىككە ءوز قۇتتىقتاۋىن جەتكىزىپ، مەملەكەتتىك قولداۋعا ريزاشىلىعىن ءبىلدىردى.

وبلىستىق جولاۋشى كولىگى جəنە اۆتوموبيل جولدارى باسقارماسىنىڭ باسشىسى ە. جاسىباەۆتىڭ ايتۋىنشا، əۋەجايدىڭ قۇرىلىسىنا وبلىستىق بيۋدجەتتەن 1 ملرد. تەڭگەدەن استام قارجى ءبولىنىپ، قۇرىلىسىن  «ASD Group» جشس مەردىگەر مەكەمەسى جۇرگىزگەن. مۇندا «جەتىسۋ» اۆياكومپانياسى قىزمەت كورسەتەدى. ەندى ءۇشارال اۋەجايى اپتاسىنا ءتورت رەت «استانا-ءۇشارال-استانا» جانە ءۇش رەت «تالدىقورعان – ءۇشارال – تالدىقورعان» باعىتىنداعى اۋە رەيستەرىن قابىلدايتىن بولادى. بۇل رەيستەردى سۋبسيديالاۋعا رەسپۋبليكالىق جانە وبلىستىق بيۋدجەتتەن 177,2 ملن.تەڭگە قارجى ءبولىندى. اتاپ وتسەك، استانادان ۇشاتىن رەيستىڭ قۇنى 16 مىڭ تەڭگەدەن، تالدىقورعان رەيسى 8 مىڭ تەڭگەدەن.

بۇعان دەيىن 2015 جىلدان باستاپ «جەتىگەن-دوستىق-جەتىگەن» باعىتىنداعى تەمىر جول قاتىناسى قولعا الىنعان بولاتىن. العاشىندا 16 ۆاگونمەن باستالىپ، قازىرگى كەزدە سۇرانىستىڭ ارتۋىنا بايلانىستى ۆاگوندار سانى 23-عا جەتكەن.

جالپى، الاكول ماڭىندا تۋريزم باعىتى بويىنشا 162 نىسان قىزمەت كورسەتەدى. «بيزنەستىڭ جول كارتاسى – 2020» باعدارلاماسىنىڭ وندىرىستىك ينفراقۇرىلىمدى دامىتۋ باعىتى بويىنشا 2014 جىلى 200 ملن. تەڭگە، 2015 جىلى 352 ملن. تەڭگە ءبولىندى. اقشي جانە كوكتۇما اۋىلدارى كارىز جۇيەسى قۇرىلىسىنىڭ قۇجاتتارىن دايىنداۋعا 21,6 ملن. تەڭگە قاراستىرىلدى. اقشي اۋىلىنىڭ دەمالىس ايماقتارىنا دەيىن باراتىن 23 شاقىرىم جولدىڭ قۇرىلىس-مونتاج جۇمىستارى جۇرگىزىلۋدە. وتكەن جىلى اۋىز سۋ قۇبىرى جۇيەسى 343 ملن. تەڭگەگە جاسالىپ، پايدالانۋعا بەرىلدى. جۋىق ارادا «تالدىقورعان-ءۇشارال» اۆتوجولىنىڭ جوندەۋ جۇمىستارى باستالادى.

2016 جىلى الاكولدە 452 مىڭنان استام ادام دەمالسا، بيىلعى جىلى 500  مىڭنان استام كەلەدى دەپ كۇتىلىپ وتىر.

Abai.kz