بەيسەنبى, 2 ءساۋىر 2020
EXPO - 2017 3337 1 پىكىر 25 شىلدە, 2017 ساعات 17:46

تولە، قازىبەك، ايتەكە - ۇشەمدەر ەكسپو-دا ۆولونتەر بولىپ ءجۇر

تولە، قازىبەك، ايتەكە تىلەگەنوۆتەر. بۇل ۇشەۋى تاۋەلسىز قازاقستاننىڭ العاشقى ۇشەمدەرى. ولارعا قازاقتىڭ ءۇش ءبيىنىڭ ەسىمىن بەرگەن ەلباسى نۇرسۇلتان نازارباەۆ ەدى.

ولار ەلورداداعى حالىقارالىق ەكسپو-2017 كورمەسىنە ەرىكتىلەر ساپىندا قىزمەت ەتۋ ءۇشىن ارنايى كۋبا ارالدارىنان ۇشىپ جەتىپتى.

قازاقستاندىق ديپلومات يسرايل تىلەگەنوۆتىڭ شاڭىراعىندا تۋعان ۇشەمدەر اكەسىنىڭ قىزمەتىنە بايلانىستى  قازىر كۋبا ارالدارىندا تۇرىپ جاتىر. بيىل ءۇش جىگىت گاۆانا قالاسىندا ورتا مەكتەپتى اياقتادى.

«ءبىز ەكسپو  كورمەسى جايلى وتكەن جىلى ەستىدىك. سول كەزدەن باستاپ لوندون، نيۋ-يورك، گاۆانا قالالارىنداعى دوستارىمىزدى استاناعا شاقىرا باستادىق. ەكسپو-عا جىلدا بارۋعا اركىمنىڭ مۇمكىندىگى جوق قوي. سوندىقتان ءوز وتانىمىزدا ءوتىپ جاتقان كورمەگە مىندەتتى تۇردە بارىپ، ەرىكتىلەر قىزمەتىندە بولىپ، ءوز ۇلەسىمىزدى تيگىزەمىز دەپ شەشتىك" ، - دەيدى تولە.

ۇشەمدەر ورتا مەكتەپتى اعىلشىن تىلىندە وقىپ بىتىرگەندىكتەن ۆولونتەرلىك سىننان سۇرىنبەي وتكەن.

«العاشقى كۇنى ۇشەۋمىزگە بىردەي ۋنيفورما كيگىزدى، كۇزەتشىلەر اڭ-تاڭ. ولار ءۇش كۋالىكتە بىردەي فوتوسۋرەت تۇر دەپ ويلاپ قالعان عوي. مىندەتتى تۇردە باس-اياعىمىزعا دەيىن مۇقيات تەكسەرىپ شىقتى. ەكسپو-عا كەلگەلى فوتوعا تۇسپەگەن كۇنىمىز جوق. كەلۋشىلەرگە دە، قىزمەتكەرلەرگە دە ءبىزدىڭ ءتۇرىمىز قىزىق جانە كوپ ادامدار تولەنى قازاقستاندىق بوكسشى دانيار ەلەۋسىنوۆكە ۇقساتادى»، - دەدى ايتەكە.

ۇشەمدەردىڭ سىرتقى فيزيولوگياسى ۇقساس بولعانىمەن، مىنەزدەرى ءار ءتۇرلى ەكەن. قازىبەك - تۇيىق مىنەزدى بولسا، ايتەكە كەنجە بولعاندىقتان اشىق جايدارى.

بيىل قىركۇيەك ايىندا ۇشەمدەر 19 جاسقا تولاتىن كورىنەدى. تولە حالىقارالىق بيزنەس، قازىبەك - زاڭ، ال، ايتەكە - كانادانىڭ مونرەال قالاسىندا كومپيۋتەرلىك باعدارلاما بويىنشا ءبىلىم الماق.

«ۇلكەن اعامىز جانبولات امەريكا قۇراما شتاتتارىنداعى وقۋىن اياقتادى جانە قازىر استانا قالاسىندا جۇمىس ىستەپ ءجۇر. ارينە، ءبىز دە قاجەتتى ءبىلىم جيناقتاعان سوڭ، ەلگە ورالامىز.  استانانىڭ كۇننەن كۇنگە كوركەيىپ كەلە جاتقانى ءبىزدى قۋانتادى»، - دەيدى تولە.

ءتۇيىن: شەتەلدە ءبىلىم الىپ جۇرگەن قازاق جاستارىنىڭ ەلوردا تورىندە ءوتىپ جاتقان حالىقارالىق كورمەگە كومەك قولىن سوزۋعا بەيىل ەكەندىگىن وسىعان دەيىن جازعانبىز. دەيتۇرعانمەن، تاۋەلسىز قازاقستان تاريحىنداعى تۇڭعىش ۇشەمنىڭ ەكسپو-2017 كورمەسىنە ەرىكتى رەتىندە قىزمەتىن ۇسىنۋى تاريحتى جاڭعىرتۋ، تاريحتىڭ جاڭعىرۋى  دەپ تۇيدىك.

Abai.kz

1 پىكىر