استاناداعى كوپ ساياباقتىڭ بىرىندە قر پرەزيدەنتى اكىمشىلىگىنىڭ باسشىسى ادىلبەك جاقسىبەكوۆ پەن قر ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆ جۇگىرىپ جۇرگەن كورىنەدى. ونى بەلگىلى كاسىپكەر ايدىن راحىمباەۆ بايقاپ قالىپ، سەلفيگە تۇسكەن. بۇل تۋرالى Tengrinews.kz سايتى جازدى.

جاقسىبەكوۆ پەن ءماسىموۆ قانا ەمەس، بۇ جۇگىرگەندەردىڭ اراسىندا قازاقستان دامۋ بانكى باسقارماسىنىڭ توراعاسى بولات جامىشەۆ پەن  ادىلبەك جاقسىبەكوۆتىڭ ۇلى داۋرەن جاقسىبەك تە بار. وسىنشاما شەندىنىڭ تاڭعى التىدان تۇرىپ جۇگىرۋىندە نە ءمان بار؟ بۇل جۇگىرىسپەن ولار نەنى دالەلدەمەك؟

وسى ءبىر سۇراققا وزىمىزشە جاۋاپ بەرىپ كورسەك...

ءبىزدىڭ شەندىلەر ەلگە جاقىنداۋدى شايتاناربا تىزگىندەۋ نەمەسە جۇگىرۋ دەپ تۇسىنەتىنى بار. الاياق ادام اتالىپ، ەكى ءتۇرلى شۇلىق كيىپ مارافونعا قاتىسقان ءماسىموۆتىڭ جايىن ەل ۇمىتا قويعان جوق. جاقسىبەكوۆ تە زەينەت جاسىنا كەلسە دە ارا-تۇرا قويۋ شاڭنىڭ اراسىندا دالاقتاپ قوياتىنى بار.

بۇل بىرىنشىدەن، ءبىزدىڭ ءالى دە كۇش-جىگەرىمىز ورنىندا دەگەن ەمەۋرىندى بىلدىرەدى. 52 جاسقا ەندى كەلگەن ءماسىموۆتىڭ ءالى ەنتىكپەي تالاي اسۋدى باعىندىرارى ءسوزسىز. ال، جاقسىبەكوۆتىڭ قايراتىنىڭ الداعى 5 جىلدا كەمىمەيتىنىن ەلباسىنىڭ ءوزى بولجاپ، وكىلەتتىلىگىن 2022 جىلعا دەيىن ۇزارتتى. وسىنداي كەزدە ەلباسىنىڭ الدىندا ءوزىنىڭ ءالى جاس ەكەنىن ءبىر دالەلدەپ قويۋ كەرەك بولعان سياقتى. بىراق، مەدالدىڭ ەكىنشى بەتى بار ەمەس پە؟ ول بەتتى ءبىز اشپاساق تا كورە قويدىڭىز، بىلەم...

ەكىنشىدەن، ولار "سالاۋاتتى ءومىر سالتىن ناسيحاتتادىق" دەپ ويلايتىن بولسا كەرەك. جاقسىبەكوۆ پەن ءماسىموۆ تاڭعى التى وتىزدا جۇگىرەدى ەكەن دەپ بۇكىل ەل سپورتتىق كيىممەن كوشەگە شىعىپ كەتپەسى انىق. سالاۋاتتى ءومىردى ناسيحاتتاۋدىڭ توتە جولى - مىناۋ. جاقسىبەكوۆتىڭ تۋىستارى ەلىمىزدەگى "تسەسنا بانكتىڭ" ءھام رەسەيدەگى "پليۋس بانكتىڭ" (باسقا دا بايلىقتارى جەتەرلىك) يەسى بولىپ سانالادى. ءماسىموۆتىڭ باۋىرىنا باسقان بايلىعىن ساناماي-اق قويالىق. سول مول دۇنيەنىڭ جۇزدەن ءبىر بولىگىن ءوز ەرىكتەرىمەن سپورتتىق كەشەندەر سالۋعا بەرسە، ونىسىن ناسيحات جاساسا "سالاۋاتتى ءومىر سالتىن ۇلىقتاۋ" دەگەن سول ەمەس پە؟ ايتپەسە، قيىننان قيىستىرىپ، تاڭعى التى جارىمدا باسقامەن ەمەس، بەلگىلى بيزنەسمەنمەن كەزدەسىپ قالۋى كىمدى بولسىن كۇلدىرەرى حاق.

ۇشىنشىدەن، رەسمي ۇلتتىق قاۋىپسىزدىك كوميتەتىنىڭ توراعاسى مەن پرەزيدەنت اكىمشىلىگىنىڭ باسشىسىسى تاڭعى التىدا نەگە، نە ماقساتپەن بىرگە ءجۇر؟ بۇل دوستىق قاتىناس پا، الدە ساياسي مۇددەلىك كەزدەسۋ مە؟ مۇنداي ەكى قوشقاردىڭ ءار باسقوسۋىنىڭ استارىندا ءمان جاتۋى كەرەك. بۇلاردىڭ جاي عانا تىلدەسۋىن، ول تىلدەسۋدە نە ايتىلىپ، نە كەلىسىلگەنىن ەلباسى ءبىلىپ وتىرۋعا ءتيىس. ەكەۋ ەمەس، بۇل جەردە بەس بىردەي قوشقار ءبىر-بىرىمەن مۇيىزدەسپەي قالاي قاتار جۋساپ ءجۇر. ءبارى دە - قالتالى قوشقارلار. ولار جاي عانا جۇگىردى مە، جوق، العا قويعان ماقساتتارىن پىسىقتاپ الدى ما؟

تورتىنشىدەن، "بۇل وزدەرىنە جاسالعان جارناما بولار" دەيتىندەر تابىلادى. جاقسىبەكوۆ پەن ءماسىموۆتىڭ جارناماسىن جاسايتىنداردىڭ قيالىنىڭ سونشالىق تايازدىعىنا نالۋعا بولادى. سەبەبى، ولار "جاقسىبەكوۆ پەن ءماسىموۆ "جۇگىرىپ" قايدا بارادى؟" دەگەن سۇراعىمىزعا جاۋاپ بەرە الماسى انىق. شەندىلەر جۇگىردى. جۇگىرگەن ەكەن ءبىر جەرگە بارۋى كەرەك قوي. بالكىم پرەزيدەنتتىڭ ۇيىنە بارا جاتقان شىعار. ەگەر سولاي بولسا، قانداي نيەتپەن بارا جاتىر ەكەن؟

ءشارىپحان قايسار

Abai.kz