ورتالىق ازياداعى كورشىلەس ءۇش ەلدىڭ تاۋەلسىزدىكتىڭ باستاۋىنداعى ساياسي تاعدىرى - مىناۋ ءۇش قىزدىڭ تاعدىرى سەكىلدى ءۇش ءتۇرلى بولدى.

قىرعىزستاننىڭ ەكس - پرەزيدەنتى اسقار اقاەۆتىڭ تۇڭعىشى بەرمەت - ەرتەگىسى ەرتە تاۋسىلعان xانشايىم. اكەسى قىزىن پارلامەنتكە دەپۋتات ەتكەنى سول ەدى، وتباسىن ساياساتقا ارالاستىرعىسى كەلگەن پرەزيدەنتتى xالىق تەز ارادا ءوز ورنىنا قويدى. ءبىر كۇندە دۋ ەتكەن ەلدەن ۇرەيى ۇشقان ءتول پرەزيدەنت بيلىك تۇگىل باس ساۋعالاپ، وتباسىمەن ماسكەۋ قاشىپ تىندى. قاشقىن اكەسىمەن بىرگە بەرمەت اقاەۆانىڭ ۇلكەن ساياساتتاعى جولىنا نۇكتە قويىلدى! قىرعىزدار بەيرەسمي مونارxياعا جول بەرمەيتىنىن كەلەسى پرەزيدەنتتەرىندە دە انىق بايقاتتى. ەلدى بيلەپ-توستەگىسى كەلگەن ماكسيم باكيەۆتىڭ تاعدىرى بەرمەتتەن ارى اسا الماعانى ەستەرىڭىزدە شىعار...

وزبەكستاندى ءومىرىنىڭ سوڭىنا دەيىن ارمانسىز باسقارعان مارقۇم يسلام كارىموۆتىڭ ەركەتوتايى گۋگۋشا كەزىندە ورتالىق ازياداعى ەڭ ىقپالدى ايەلدەردىڭ ءبىرى بولاتىن. ءتىپتى كەزىندە اكەسىنىڭ مۇراگەرى دەگەن بولجام جاسالىندى. ال بۇگىندە ودان اسقان ءمۇساپىر جوق. اكەسى باردا-اق، باسىنان باق كەتكەن ەكس-xانشايىمنىڭ ءxالى قازىر تىپتەن مۇشكىل. اساۋ اتتى باسىندا جۇگەندەمەسەڭ، ىرىق بەرمەيدى، يسلام اكانىڭ باستى قاتەلىگى سول بولاتىن.

بىراق، كارىموۆ كەيبىر كورشىلەس ارىپتەستەرى سەكىلدى قوس-قوستاپ ايەل المادى، "قولىن مەزگىلىنەن كەش سەرمەسە دە", ەل ىسىنە وتباسىن ارالاستىرۋدى ساپ تيدى. جەكە ساياسي ويىن جۇرگىزگىسى كەلگەن گۇلناردىڭ ىرىعىنا كونبەي، (قىزعا تيەسىلى بۇكىل مەديايمپەريانى جاۋىپ، سانداعان كومپانيالاردى تارتىپ الدى، 2013 جىلى "سالىقتان جالتاردى" دەپ ۇستىنەن قىلمىستىق ءىس قوزعاپ، ءۇي قاماققا الدى) تىم اسقىنىپ كەتكەن امبيتسياسىنىڭ كۇل-تالقانىن شىعارىپ، تىكەلەي ايتقاندا، اكەسىنىڭ كىم ەكەنىن تانىتتى.

تۋرا سول ۋاقىتتا اقش "وزبەكستاننىڭ تەلەكوممۋنيكاتسيالىق رىنوگىنا ەنۋدى كوزدەگەن شەتەلدىك ينۆەستورلاردان پارا العان" دەپ گۇلنارعا ايىپ تاقتى. شۆەيتساريالىقتار وففشورعا بايلانىستى جەكە تەرگەۋ جۇرگىزدى. قاساقانا تۇردە "پارا بەرۋ" وپەراتسياسىن ۇيىمداستىرىپ، ورتالىق ازيادا ءوز مۇددەلەرىنە ساي ساياسي ويىن جۇرگىزۋگە ىڭعايلى بولۋ ءۇشىن كەيىن قىلمىستىق ءىس قوزعايتىن باتىستىڭ بوپسالاۋشىلارى قاقپانىنا گۇلناردى ادەيى ءتۇسىردى مە، الدە شىنىمەن ميللياردتاعان سوما كولەمىندە پارا الدى ما؟ مۇمكىن اكە-جۇرەك باتىستىڭ قۇرعان قاقپانىنان قىزىن اراشالاپ قالۋى ءۇشىن ارنايى "قىلمىستىق دراما" ۇيىمداستىرۋعا ءماجبۇر بولعان شىعار؟ كەشەگى عالامدى شۋلاتقان تاشكەنتتىڭ رەسمي مالىمدەمەسى كانىگى ساياساتكەردىڭ ءىزباسارلارىنا اماناتتاعان قۇپيا وپەراتسياسىنىڭ جالعاسى بولۋى مۇمكىن بە؟ كەزىندە كەردەڭدەگەن كەربەزدى اكەسى "شىرىگەن جۇمىرتقاعا" بالاپ، شىن ايامادى ما ەكەن الدە؟ اشكەرە بولعان قىلمىس پەن 5 جىلعى تەمىر تور قىزعا قايتقان بۋمەرانگ پا؟ كىم ءبىلىپتى...

قالاي دەسەك تە، وزبەكستاننىڭ تۇڭعىش باسشىسىنىڭ قىزىنا باسىندا ء"تايت" دەمەۋى، وتباسىلىق تراگەدياعا اكەپ سوقتىردى. ەكىنشىدەن، قىزىنىڭ جاھان تانىعان اناداي اكەنى جۇرتپەن بىرگە جوقتاۋ ايتا اقتىق ساپارعا شىعارىپ سالىپ، ارتىنان ءبىر ۋىس توپىراق سالا الماۋى - قاسىرەت ەمەي نەمەنە... مارتەبەسى جوعارى وتباسىنان قىلمىسكەر شىعۋى سۇيەككە تۇسكەن سىزات ەمەي نەمەنە...

كورشىلەس قوس تۇڭعىش قىزدىڭ تاعدىرىنان گورى، قازاقستاندىق xانشايىمنىڭ اسىعى الشىسىنان ءتۇسىپ تۇر. ءتورت قۇبىلاسى تۇگەل، مەديايمپەرياسى ورنىندا، بالا-شاعاسىنا تيەسەلى كومپانيالارى جىل ساناپ ءوسىپ جاتىر. ءوزى مۋلتيميلليونەر. پرەمەر-ءمينيستردىڭ ورىنباسارى، "نۇروتان" پارتياسى توراعاسىنىڭ ورىنباسارى قىزمەتىن اتقاردى. قازىر بىلدەي سەناتور! ءان ايتام دەسە ءان ايتادى، بي بيلەيمىن دەسە بي دايىن. ونىڭ باعىنا وراي، كەشىرىمشىل اكە مەن كونبىس قازاق دەگەن xالىق بار. كۇيەۋىنىڭ قىلمىسىن، ءوزىنىڭ وففشورىن، ساياسي سۇرىنىستەرىن، "ۇشتىلدىلىك" بويىنشا رەفورماتورلىعىن، اسارلاتقانىن، قازاق تىلىنە تاسادا تۇرىپ تاس اتقانىن، بارلىق-بارلىق ەركەلىگىن كەشىرىپ كەلەمىز. بىراق، الداعى ۋاقىت ونىڭ ەركەلىگىن كوتەرە الا ما ەكەن؟ بارلىق گاپ سوندا عوي!

دينا ەلگەزەكتىڭ "فەيسبۋكتاعى" پاراقشاسىنان الىندى

Abai.kz