قازىر قولدانىستاعى «حالىقتىڭ كوشى-قونى تۋرالى» قازاقستان رەسپۋبليكاسىنىڭ 2011 جىلعى 22 شىلدەدەگى №477-IV زاڭىنا ساي، ەلىمىز شەكارا اۋماعىنان تىس جەردە جاساپ جاتقان قانداستارىمىز (ەتنيكالىق قازاقتار) جەكە باسىن كۋالاندىراتىن قۇجاتتارداعى جازبا نەگىزىندە، مۇنداي جازبا بولماعان كەزدە ءوزىنىڭ ۇلتىن راستايتىن باسقا دا قۇجاتتار نەگىزىندە قازاق ەكەنىن دالەلدەسە، سول وزدەرى تۇرعان مەملەكەتتەگى قازاقستان رەسپۋبليكاسىنىڭ شەتەلدەگى مەكەمەلەرىنەن «ورالمان» مارتەبەسىن (كۋالىگىن) الا الادى جانە ورالمانداردى قابىلداۋدىڭ وڭىرلىك كۆوتاسىنا ەنە الادى. ءتىپتى قازاقستان رەسپۋبليكاسىندا تۇراقتى تۇرۋعا رۇقسات الۋعا وتىنىشتەرى مەن قۇجاتتارىن دا تاپسىرا الادى.
بۇل تۋرالى اتالعان «حالىقتىڭ كوشى-قونى تۋرالى» زاڭنىڭ 20-بابىنىڭ 1-تارماعىندا «قازاقستان رەسپۋبليكاسىنىڭ شەت ەلدەردەگى مەكەمەلەرى ۇمىتكەرلەردىڭ ورالمان مارتەبەسىن بەرۋگە جانە (نەمەسە) ورالمانداردى قابىلداۋدىڭ وڭىرلىك كۆوتاسىنا ەنگىزۋگە، سونداي-اق قازاقستان رەسپۋبليكاسىندا تۇراقتى تۇرۋعا رۇقسات الۋعا وتىنىشتەرى مەن قۇجاتتارىن قابىلدايدى جانە ولاردى تىركەلگەن كۇنىنەن باستاپ ون جۇمىس كۇنى ىشىندە حالىقتىڭ كوشى-قونى ماسەلەلەرى جونىندەگى ۋاكىلەتتى ورگانعا جىبەرەدى» – دەپ كورسەتىلگەن.
وكىنىشكە وراي، زاڭنىڭ بۇل تۇسىنان بەيحابار بولعاندىقتان، شەتەلدەگى ەتنيكالىق قازاقتار اسا قاجەتتى تيىمدىلىكتەن قۇر قالىپ وتىر.
اتالعان «حالىقتىڭ كوشى-قونى تۋرالى» زاڭنىڭ 10-بابىندا «قازاقستان رەسپۋبليكاسى سىرتقى ىستەر مينيسترلىگى مەن قازاقستان رەسپۋبليكاسىنىڭ شەتەلدەگى مەكەمەلەرى: 2)قازاقستان رەسپۋبليكاسىنىڭ حالىقتىڭ كوشى-قونى سالاسىنداعى مەملەكەتتىك ساياساتى تۋرالى اقپاراتتىڭ شەتەلدە تاراتىلۋىنا جاردەمدەسەدى;»، سونداي-اق «قازاقستان رەسپۋبليكاسىنا ءوز ەركىمەن قونىس اۋدارۋعا نيەت بىلدىرگەن ەتنيكالىق قازاقتارعا كەلۋ، ونىڭ ىشىندە ورالمانداردى قابىلداۋدىڭ وڭىرلىك كۆوتالارى شەڭبەرىندە قازاقستان رەسپۋبليكاسىنىڭ ۇكىمەتى ايقىنداعان وڭىرلەرگە كەلۋ شارتتارى، قابىلداۋ شارتتارى مەن الەۋمەتتىك قولداۋ شارالارى تۋرالى اقپارات بەرەدى;» – دەپ اشىق جازىلعان.
ەگەر، اتاجۇرتىنا ءبىر جولا كوشۋگە نيەت بىلدىرگەن شەتەلدەگى ەتنيكالىق قازاقتار «ورالمان» مارتەبەسىنە وزدەرى قونىستانعان ەلدەردە تۇرىپ قول جەتكىزسە، اتالعان زاڭنىڭ 23-بابىندا كورسەتىلگەن «ورالماندار جانە ولاردىڭ وتباسى مۇشەلەرى قازاقستان رەسپۋبليكاسىنىڭ اۋماعىنا كەلگەن كەزدە قازاقستان رەسپۋبليكاسىنىڭ حالىقارالىق شارتتارىنا جانە (نەمەسە) كەدەن زاڭناماسىنا سايكەس، كولىك قۇرالدارىن قوسا العاندا، جەكە پايدالانۋعا ارنالعان مۇلكىنە كەدەندىك تولەمدەردى تولەۋدەن بوساتىلادى.» – دەگەن نورما بويىنشا، وزدەرىنە تيەسىلى اۆتو كولىگى مەن زاتتارىن الىپ وتۋگە زور قولايلىق تۋر ەدى.
ودان قالا بەردى، شەكارا اتتاعان سوڭ ءوزى قونىستانعان بىردەن بارىپ اۋىلدىق ەلدىمەكەندەردەن شارۋاشىلىق قۇرۋ ءۇشىن جەر تەلىمدەرىن الۋعا ءوتىنىش بەرە الدى. «ورالمان» مارتەبەسىنىڭ ۋاقىتى ءبىر جىل عانا ەكەنىن ەسكەرسەك، قانداستارىمىز ۋاقىت پەن يگىلىكتەن تەڭ ۇتارى شىندىق!
سوندىقتان، قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىمەن سايكەسە وتىرىپ، قازاقستان رەسپۋبليكاسى سىرتقى ىستەر مينيسترلىگى ءوزىنىڭ شەتەلدەگى مەكەمەلەرىنە «حالىقتىڭ كوشى-قونى تۋرالى» زاڭنىڭ وسى باپتارىن اتقارۋدى، ەلىمىزگە كوشىپ كەلۋگە ءوتىنىش بىلدىرگەن قازاقتارعا اقپارات بەرۋ جۇمىسىن جەدەلدەتىپ قولعا الۋىن سۇرايمىن. سونداي-اق، شەتەلدەگى قانداستارىمىزدىڭ دا «حالىقتىڭ كوشى-قونى تۋرالى» زاڭنىڭ بۇل تيىمدىلىگىنەن ۇتىمدى پايدالانۋىن ەسكەرتەمىن!

اۋىت مۇقيبەك

Abai.kz