كۇنى كەشە عانا ەلىمىزدە كەزەكتى "التىن ادام" تابىلدى. شىنىمەن تاريحي وقيعا. قازاقستان تۇرماق، الەم باق-تارى جارىسا جازۋعا ءتيىس تاريحي اشىلۋ ەدى. وكىنىشكە وراي ولاي بولمادى.

كىنا وزگەدە ەمەس، وزىمىزدە. بيلىك ەلىمىزدى تانىتۋ ءۇشىن بارىن سالىپ جاتىر. سامميتتەر، جارىستار مەن كورمەلەر، ءتۇرلى باسقوسۋلار. بىراق الەم جۇرتشىلىعىن مۇنداي وقيعالار ەمەس، تاريحي تانىم مەن تىلسىم قىزىقتىراتىنىن ۇمىتپايىق. قازاقستان كونە وركەنيەتتەر ولكەسى. وسى ۋاقىتقا دەيىن "التىن ادام", "التىن حانشايىم", كونە وبالار مەن تۇتاستاي كومىلگەن تۇلپارلار تابىلدى. مىنە كەزەكتى جاڭالىق. وسىنى الەم جۇرتشىلىعى بىلسە، تاريحقا قىزىعاتىندار ەلىمىزگە كەلەر مە ەدى؟.

مىسالى موڭعولياعا دينوزاۆر سۇيەگىن ىزدەۋشىلەر لاتىن امەريكاسىنان دا كەلىپ جاتادى. ال مىسىرعا كۇللى الەمنەن... سول مىسىردا تابىلعان پەرعاۋىنداردان، بىزدە تابىلعان التىن ساۋىتتى پاتشالار ارتىق بولماسا، كەم ەمەس. بىراق الەم حالقى بىزگە ونى كورۋگە كەلمەيدى. ويتكەنى بىلمەيدى. دۇرىس ناسيحات جوق. كەشەگى جاڭالىقتى دا جارعاق قۇلاعى جاستىققا تيمەي جارنامالاپ جاتقانى شامالى. ءتىپتى ءوز حالقىمىز دا قۇلاعدار ەمەس. تاريحىمىزدىڭ باي ەكەنىن كورسەتپەگەننەن كەيىن، كەي زىمياندار قازاقستاندا تاريح جوق دەپ جۇرگەن جوق پا؟! قىسقاسى تۋريستەردى تارتام دەسەڭ، تاريحىڭدى جاھانعا تانىت. ونىمەن كىم اينالىسۋعا ءتيىس؟ ەححح...

اسحات حاسەنعالي

Facebook-تەگى پاراقشاسىنان