دۇيسەنبى, 21 قىركۇيەك 2020
COVID-19 قازاقستاندا. جۇقتىرعاندار — 107307. جازىلعاندار — 101941. قايتىس بولعاندار — 1671
2121 0 پىكىر 3 تامىز, 2017 ساعات 11:55

بىشكەكتە ءبىر توپ وپپوزيتسيالىق ساياساتكەر سوتتالدى

قىرعىزستان استاناسىنداعى پەرۆومايسكي اۋداندىق سوتى 2 تامىزدا پارلامەنتتىڭ بۇرىنعى دەپۋتاتى، وپپوزيتسيالىق ساياساتكەر سادىر جاپاروۆتى 11,5 جىل تۇرمە جازاسىنا كەستى.

وعان "ادامدى كەپىلگە الدى", "بۇزاقىلىق جاسادى", "وكىلەتىن اسىرا پايدالاندى" دەگەن ايىپتار تاعىلعان. جاپاروۆ 2013 جىلعى قازاندا قاراقولدا وتكەن ميتينگىگە قاتىسقان. نارازى توپ قۇمتور كەنىشىنىڭ ماڭىندا ىستىقكول وبلىسىنىڭ وكىلىن جىبەرمەي، كۇشپەن ۇستاپ قالعان ەدى. جاپاروۆ تاعىلعان ايىپتى مويىندامايتىنىن ايتتى.

ءدال وسى سوت سارسەنبى كۇنى وپپوزيتسيالىق ساياساتكەرلەر بەكبولوت تالگاربەكوۆ پەن، توروباي كولۋباەۆتى 14 جىلعا، الەكساندر گۋسەۆ پەن تويگونبەك كالماتوۆتى شارتتى تۇردە ەكى جىلعا، مارات سۋلتانوۆتى 10 جىلعا سوتتادى. بۇل سوتتالۋشىلارعا "بيلىكتى كۇشپەن باسىپ الماق بولدى" دەگەن ايىپ تاعىلعان.

بارلىق ايىپتالۋشىلار بىلتىردان بەرى قىرعىزستاننىڭ مەملەكەتتىك ۇلتتىق قاۋىپسىزدىك كوميتەتىنىڭ اباقتىسىندا وتىرعان.

بۇعان دەيىن 17 ساۋىردە پەرۆومايسكي اۋداندىق سوتى ەرنەست كارىبەكوۆكە 20 جىل، كۋبانىچبەك كادىروۆ پەن بەكتۋر اسانوۆقا 12 جىل تۇرمە جازاسىن كەسىپ، داستان سارىگۋلوۆتى ءتورت جىلعا شارتتى تۇردە سوتتاعان. بۇلارعا دا "توڭكەرىس جاساماق بولدى" دەگەن ايىپ تاعىلعان ەدى.

تۋىستارى مەن ازاماتتىق بەلسەندىلەر سوتتالعاندار ساياسي سەبەپپەن قۋعىنعا ۇشىرادى، ەش نەگىزسىز تۇرمەگە جابىلدى دەپ سانايدى. ايىپتالۋشىلاردىڭ ادۆوكاتتارى اپەللياتسيالىق ارىز تۇسىرمەك.

Abai.kz

0 پىكىر