Abai.kz پورتالى 21 شىلدە كۇنى سامالگۇل ەسەنعازيەۆا اتتى ازاماتشانىڭ "كۇيەۋىم مەملەكەت قارجىسىنا قول سالعان جوق" دەگەن اشىق حاتىن جاريالاعان ەدى. "قۇقىق قورعاۋ ورگاندارىنىڭ تەپەرىشىنە شىداماي شەيىت بولعان ومىربەك جامپوزوۆتىڭ باسىنداعى جاعداي مەنىڭ كۇيەۋىم ءشارىپوۆ ەرمەك يساۇلىنىڭ باسىنا دا تۋىپ وتىر" دەپ شىرىلداعان كەلىنشەكتىڭ جانايقايىنا قر باس پروكۋرورى جاقىپ اسانوۆ قۇلاق اسپاعان سوڭ، ەندى تىكەلەي ەلباسىعا شاعىم تۇسىرمەك. ادىلدىك ىزدەپ شارق ۇرعان شىناشاقتاي قازاقتىڭ قىزى Abai.kz اقپاراتتىق پورتالىنا تاعى حات جازىپ جىبەرىپتى. حاتتىڭ ءبىر ءارپىن دە وزگەرتپەي وقىرمان نازارىنا ۇسىنىپ وتىرمىز. 

ماسەلە تۇپكىلىكتى تۇسىنىكتى بولۋى ءۇشىن سىلتەمەدەگى ماقالانى دا وقىپ شىعۋلارىڭىزدى وتىنەمىز. 

Abai.kz اقپاراتتىق پورتالى

مەنىڭ ايتايىن دەگەنىم تەك قانا شىندىق، جاي شىندىق ەمەس بارلىق سوزدەرىمە دالەلدەر بار.

مەنىڭ جۇبايىم شاريپوۆ ەرمەك ەشقانداي قىلمىس جاساعان جوق جانە باسقا ادامدار جاساعان قىلمىسقا ەشقانداي قاتىسى جوق.

ءبىزدىڭ قازاقستاننىڭ قۇقىق قورعاۋ جانە سوت ورگاندارىندا ادىلەتتىلىك جوق ەكەنىنە تولىقتاي كوزىم جەتتى.

باسىنىن باستاپ ايتاتىن بولسام، كەلەسىلەرگە كوز جەتكىزۋگە بولادى:

1. قر ۇلتتىق قاۋىپسىزدىك كوميتەتىنىڭ قىزمەتكەرلەرىنىڭ جۇمىسى: رەسمي تىركەلگەن 28 ادامنان تۇراتىن جەدەل توپ قانشاما اي بويى ارتىنان اڭدىپ، بارلىق ءجۇرىس-تۇرىسىن، سويلەسكەن سوزدەرىن جازىپ ءجۇرىپ قانداي دا ءبىر قىلمىسقا قاتىسى بار دالەل تابا الماۋىنىڭ ءوزى مەنىڭ كۋيەۋىمنىڭ قىلمىس جاساماعانىن دالەلدەيدى.

2. سوتقا دەيىنگى تەرگەپ-تەكسەرۋ كەزەڭىنەن باستاپ قىلمىستىق قۋدالاۋ جەدەل توبىنىڭ جەتەكشىسى ۇ/ق پولكوۆنيگى ءو.جاسۇزاقوۆتىڭ ماقساتى كۋيەۋىم شاريپوۆتى قالايدا وسى قىلمىستىق ىسكە قاتىسى جوعىنا قاراماستان، تىكەلەي ەش دالەل بولماسا دا قىلمىستىق جاۋاپقا تارتۋ بولدى.

كىمنىڭ تاپسىرىسى بويىنشا ىستەپ جۇرگەنى بىزگە بەيمالىم.

3. قىلمىستىق ءىس اۋەل باستان شاريپوۆ، جۇمكازيەۆ، گاپيروۆپەن الدىن الا ءسوز بايلاسىپ كاسىپكەرلەردەن تىكەلەي جانە پارا الۋ بارىسىندا ۇستالدى دەلىنگەن.

قىلمىس جاساۋعا كۇدىكتى رەتىندە ۇستالعان كەزدەن باستاپ جۇمقازيەۆ، گاپيروۆ جانە كاسىپكەرلەر مولدابەكوۆا، سارتاەۆا ءوز جاۋاپتارىندا جانە قىلمىس بارىسىن انىقتاۋ بارىسىندا شاريپوۆتىڭ قاندايدا ءبىر زاڭسىز اركەتتەرى جايلى ايتپايدى نەمەسە ەشبىر كۋا ول تۋرالى كورسەتپەيدى. ەشبىر ادامنان شاريپوۆ اراسىندا ونىڭ كىناسىن اشكەرلەۋ بويىنشا بەتتەستىرۋ وتكىزىلگەن جوق.

سوت وتىرىسى نەگىزىندە دە شاريپوۆ قىلمىسقا قاتىسى بار دەگەن بىردە-ءبىر ادام بولعان جوق جانە ايىپتاۋ جاعى شاريپوۆتىڭ قىلمىسىن دالەلەدەيتىن بىردە-ءبىر دالەل ۇسىنا المادى (سوت وتىرىسىنىڭ بەينە جانە اۋديو جازبالارىن تولىقتاي Abai.kz پورتالىنا جىبەرىپ وتىرمىن).

وسىنداي ناقتى ءمان-جايلارعا قاراماستان سوت ا.كايروۆ تاعىلعان ايىپ ەش دالەلىن تاپپاسا دا ايىپتاۋ ۇكىمىن شىعارىپ شاريپوۆتى 10 جىلعا سوتتادى.

سوت كايروۆتىڭ شىعارعان ۇكىمى تەك سارتاەۆانىڭ كورسەتپەسىنىڭ نەگىزىندە قۇرالعان.

سول سارتاەۆانىڭ ءوزى سوت وتىرىسى بارىسىندا شاريپوۆپەن ەشقاندايدا ءبىر اقشا نەمەسە كونكۋرس تۋرالى تۋرالى كەلىسسوز جۇرگىزبەگەنىن جانە ونىڭ الدىڭعى كورسەتپەلەرىندەگى شاريپوۆتىڭ فاميلياسىن تەرگەۋشىنىڭ ءوزىنىڭ قوسقانىن، ال سارتاەۆا شاريپوۆ تۋرالى ەشتەڭە ايتپاعانىن ايتتى (سوت وتىرىسىنىڭ بەينە جانە اۋديو جازبالارى بار).

مەملەكەتتىك ايىپتاۋشى باكيروۆ ۇقك تەرگەۋشىسى ءو.جاسۇزاقوۆتىڭ قيالىنان تۋىنداعان ايىپتاۋ اكتىسىن قايتالاپ وقىپ شىقتى جانە سوت كايروۆ سول ايىپتاۋ اكتىنى تولىقتاي ۇكىمگە كوشىرىپ جازعان.

وسىعان قاراعاندا، ءبىزدىڭ رەسپۋبليكامىزدا سوت ورگاندارى جانە پروكۋراتۋرا ورگاندارىندا قر ۇقك-نە باعىنىشتى، نە بولماسا قورقادى دەگەن شەشىم جاساۋعا بولادى.

وسى قىلمىستىق ءىس بويىنشا كۋا رەتىندە 72 ادامنان جاۋاپ الىندى، الايدا وسى جاۋاپ الىنعان ادامداردىڭ بارلىعى شاريپوۆتىڭ قىلمىسقا قاتىسى بار ەكەنىن كورسەتكەن جوق.

قىلمىستىق ءىس بويىنشا شاريپوۆتى جۇمقازيەۆپەن جانە گاپپيروۆپەن الدىن-الا ءسوز بايلاسىپ پارا الدى دەلىنگەن.

بىراق سوتقا دەيىنگى تەرگەۋ جانە سوت وتىرىسى بارىسىندا بۇل ايىپتارى ەشقانداي دالەل تاپپادى. ايىپتاۋ جاعىنىڭ ۇسىنعان دالەلدەرى مەن كۋالارى تەك قانا شاريپوۆتىڭ كىناسىز ەكەندىگىن دالەلدەيدى.

ءبىزدىڭ رەسپۋبليكامىزدىڭ قۇقىق قورعاۋ ورگاندارى كىناسىز ادامدارعا جالا جابۋمەن اينالىسسا بۇل بولاشاقتا ەشقانداي جاقسىلىققا اكەلمەيدى. ادامداردى، حالىقتى اشىندىرۋعا اكەلەدى.

حالىقتان بيلىك باسشىلارىنا دەگەن سەنىم كەتەدى.

مەنىڭ ءوزىم قازىر اشىنىپ، ادىلەتتىلىككە قالاي قول جەتكىزەرىمدى بىلمەي قينالىپ جۇرگەن جايىم بار. ءالى دە بولسا ەستيتىن قۇلاق تابىلار دەگەن ويدامىن.

ادىلەتتىلىك ءۇشىن كۇرەسۋ جولىندا بارىمدى سالامىن جانە ەشتەڭەدەن تايىنبايمىن.

مەنىڭ بۇل كۇرەسۋىم تەك ءوزىم ءۇشىن ەمەس، بولاشاقتا مەنىڭ باسىمداعى جاعداي باسقا ادامداردىڭ باسىنا تۋماسا ەكەن دەپ ويلايمىن.

تاعى دا ايتا كەتەتىن جاي، ۇقك-ءنىڭ قىزمەتكەرلەرى ءالى كۇنگە دەيىن مەنىڭ باسقان ءىزىمدى اڭدىپ ءجۇر. ارتتارى قۋىس بولعاننان كەيىن جاندارى شىعىپ، مەنى نە ايتادى دەپ باعىپ ءجۇر.

بۇكىل اقپارات قۇرالدارىن ماعان جاقىنداتپاي قويدى.

بار ويىم وسى ايتقاندارىم ءبىزدىڭ پرەزيدەنتىمىز ن.ءا.نازارباەۆتىڭ قۇلاعىنا جەتسە دەيمىن، مۇمكىن قۇقىق قورعاۋ ورگاندارىنىڭ زاڭسىز ىستەرىنە توقتاۋ بولار ەدى-اۋ.

پرەزيدەنتىمىزدىڭ ادال دا ادىلەتتىلىگىنە سەنەمىن، بىراق جالعىز ءوزى بارلىعىنا بىردەي جەتپەيدى عوي...

سوڭىندا ايتايىن دەگەنىم، وزدەرىڭىز ويلاپ قاراڭىزدارشى: وسى قىلمىستىق ءىس بويىنشا 100-دەن ارتىق ادام قاتىستى، ونىڭ ىشىندە 72 ادام كۋا رەتىندە، 30-دان ارتىق ادامدار قورعاۋشىلار، 11 ادام سوتتالۋشىلاردىڭ بارلىعى ءبىر اۋىزدان شاريپوۆ ەرمەكتىڭ قىلمىسقا ەشقانداي قاتىسى جوق ەكەنىن ايتتى، ال بىردە-ءبىر دالەلدەمەسى جوق، قىلمىسقا قاتىستى بىردە-ءبىر ءىستى شاريپوۆ ىستەدى دەگەن ءسوزى جوق ايىپتاۋ اكتىسىن جاساعان تەرگەۋشى جاسۇزاقوۆ، سول ايىپتاۋ اكتىنى سوت وتىرىسىندا ەش وزگەرىسسىز وقىپ شىققان پروكۋرور باكيروۆ جانە سول ايىپتاۋ اكتىنى تولىقتاي كوشىرىپ ۇكىم شىعارعان سوت كايروۆتەر اقىلدى بولىپ، باسقا 100-دەن ارتىق ادامدار اقىماق بولعانى ما؟ وسى اراسىن تۇسىنە الماي وتىرمىن.

سامالگۇل ەسەنعازيەۆا

Abai.kz